რამდენად სწორად ვრეცხავთ ჭურჭელს?

ნიჟარაში დახვავებული ჭურჭელი სასოწარკვეთილებაში გაგდებთ? მიმხმარისა და მიმწვარის ფხეკა გაგიჟებთ? თეფშზე ცხიმის ლაქები გრჩებათ და შუშის ჭიქებს ნათითურები ეტყობა? ისევე, როგორც ყველაფერს ამქვეყნად, ჭურჭლის რეცხვასაც თავისი წესი აქვს. მიუხედავად იმისა, რომ ტექნიკის განვითარებამ ჭურჭლის სარეცხი მანქანები მოგვივლინა დამხმარედ, ყველაფერს მანქანაში ვერ დურთავ. არ შეიძლება უბრალოდ. გაფუჭდება.

ვერ გეტყვით, რომ ჩვენი ბლოგპოსტი ჭურჭლის რეცხვას შეგაყვარებთ, მაგრამ საქმეს ნამდვილად გაგიმარტივებთ.

დავიწყოთ.

1) მომზადება

სანამ საქმეს შეუდგებით, პირველ რიგში, კარგად მოათვალიერეთ სამზარეულო და ყველა გასარეცხი ნივთი ნიჟარასთან მოაგროვეთ. სხვა ოთახებშიც შეისეირნეთ. დიდი ალბათობით, ყავის ჭიქა დაგრჩებოდათ ტელევიზორის წინ. არა? მაშინ საძინებელში დაგხვდებათ, უეჭველი, წინა ღამის სუსნაობის შედეგები. მოკლედ, მოაქუჩეთ ყველაფერი. გამაღიზიანებელია, რეცხვას რომ მორჩებით, ნიჟარას ამოწმენდთ და ზედაპირებს მოამშრალებთ, მერე რომ აღმოაჩენთ კუთხეებში მიმალულ გასარეცხ ნივთებს.

რეცხვისას რეზინის ხელთათმანები ჩაიცვით – ამგვარად კანს გამოშრობისა და დაზიანებისგან დაიცავთ.

ჭურჭელზე დატოვებული ნარჩენები ნაგავში ჩაყარეთ. ნიჟარაში არ ჩააქივლოთ პირდაპირ. კარგი იქნება, თუ ზედმეტ ცხიმსაც მოაშორებთ ქაღალდის ხელსახოცით. ცხიმმა და ნარჩენებმა, შესაძლოა, საკანალიზაციო მილები გაჭედოს და დამატებითი საზრუნავი გაგიჩნდებათ. მიმწვარ-მიმხმარი თუა რამე, ცოტა ხანს ჩაალბეთ – დიდ ჭაპანწყვეტას აიცილებთ თავიდან.

აავსეთ ნიჟარა ცხელი წყლით და ჩაასხით ჭურჭლის სარეცხი საშუალება.

2) ბაქტერიების ბუდეები

ჭურჭლის გასარეცხად ღრუბელს იყენებთ? გეთანხმებით, მოსახერხებელია, მაგრამ არც თუ ჰიგიენური. ღრუბელი პირდაპირ მისწრებაა ათასგვარი საძაგელი ბაქტერიისთვის – ბოლომდე ვერასოდეს შრება, მის ფორებში ლაღობენ და ხარობენ საჭმლის ნარჩენები, შესაბამისად, სხვადასხვა ინფექციის გამომწვევი ბაქტერიებიც თამამად მრავლდებიან. აჯობებს, ჯაგრისით ჩაანაცვლოთ – ადვილად ირეცხება, მალე შრება და ბევრად უსაფრთხოა. შეიძლება თავიდან მოუხერხებელი გეჩვენოთ, მაგრამ მიეჩვევით ნელ-ნელა.

ღრუბელს რომ მოისვრით, ჩაის ტილოს პატიოსნებაშიც შეიტანეთ ეჭვი. ჩაის ტილო კი მოგვყვება სამზარეულოს ერთგვარ ტრადიციად, მაგრამ გაითვალისწინეთ, რომ ისიც ბაქტერიების ბუდეა. განსაკუთრებით, თუ ზედ ხელს იწმენდთ, ან ზედაპირებს ასუფთავებთ. თუ ვერ ელევით, რეგულარულად რეცხეთ და ხშირ-ხშირად ცვალეთ. საზიანოსთან ერთად არაესთეტიკურიცაა, სამზარეულოში ჭუჭყიანი ძონძი რომ კონწიალობს. 

3) თანმიმდევრობა

ნიჟარაში პირველ რიგში ტაფები და ქვაბები ჩაალაგეთ. ანუ ის, რაც ყველაზე ჭუჭყიანია. კარგად დალბება ნიჟარის ფსკერზე და მიმხმარი საძაგლობებიც დარბილდება. შემდეგ ჯამ-ჭურჭელი ჩააწყეთ. შუაში წყალიც მეტად სუფთაა და თეფშებიც ნაკლებად ბინძურია. ზევით მოათავსეთ ჭიქები და ლამბაქები – ყველაზე სუფთა ნივთები, რომელთა გარეცხვაც ნაკლებ ძალისხმევას მოითხოვს. რეცხვა პირველი, ზედა ფენით დაიწყეთ. ფსკერამდე რომ ჩახვალთ, მძიმე არტილერიაც კარგად ჩაჭოპჭოპებული დაგხვდებათ და მარტივად მიარეცხავთ იმასაც. დიდი ყურადღება მიაქციეთ დანა-ჩანგალსა და კოვზებს. მარტო წყლის გადავლება არ უშველის. იმგვარი რამ შეიძლება ჰქონდეს მიკრული, უცბად ვერ შენიშნავთ, არადა, უსიამოვნოა, ჩანგალზე რომ ნასუფრალის სიურპრიზი დაგხვდება...

4) გავლება/გაშრობა

ჩამორეცხეთ ქაფი და ნარჩენები სუფთა ცხელი წყლით. თუ ორგანყოფილებიანი ნიჟარა გაქვთ, გასავლებად მეორე განყოფილება გამოიყენეთ. ონკანის ქვეშ, გამდინარე წყალში გავლებისას, ქვედა ჭურჭელი დატოვეთ, სადაცაა. უკეთესად და უფრო დიდხანს გაევლება, სანამ ზედებს ახვანჩალებთ. ჰო, ჭიქებისა და ჯამების შიგნიდან გამორეცხვა არ დაგავიწყდეთ.  

თუ საკმარისი ადგილი გაქვთ, უმჯობესი იქნება, გასაშრობად ჭურჭელი საშრობზე მოათავსოთ და ჰაერზე ნებივრობის საშუალება მისცეთ. ნუ მოიკლავთ თავს მშრალებით. ასე ბევრად ჰიგიენურია და არც ზედმეტი დრო დაგეხარჯებათ. საშრობზეც ლოგიკური თანმიმდევრობით დაალაგეთ – ჯერ მძიმე და დიდი ნივთები მოათავსეთ და ზემოთკენ ააკონკოლიკავეთ პატარები. ოღონდ ისე ნუ იზამთ, თავზე დაგემხოთ ეს სათუთად ნაშენები კოშკი.  

5) პარალელური თავშესაქცევი

და ბოლოს, ჭურჭლის რეცხვისას, რომ არ მოიწყინოთ, ან ამქვეყნიურ ამაოებაზე ფიქრმა არ ჩაგითრიოთ, შეგიძლიათ რადიო ჩართოთ, მუსიკას მოუსმინოთ, ტელევიზორს გახედოთ ცალი თვალით. ბოლოს და ბოლოს, გამდინარე წყალს გაატანოთ ავი ფიქრები.  

მაინც ჩვენი გასაკეთებელია და რაც უფრო სწრაფად და ხალისიანად გავართმევთ თავს, არ სჯობს?

ნიდოზე შეგიძლიათ შეიძინოთ როგორც საოჯახო ტექნიკა, ასევე სამზარეულოს ჭურჭელი:

    წვრილი ტექნიკა (მიკროტალღური ღუმელი, ბლენდერები, ტოსტერები, ჩოპერები) აქ

    მსხვილი ტექნიკა (ჭურჭლის სარეცხი მანქანები, გაზქურები, სარეცხი მანქანები, მტვერსასრუტები) აქ

    ჭურჭელი (ტაფები, ქვაბები, დანა-ჩანგალი, ჯამები, სამზარეულოს აქსესუარები) აქ