კულინარია, როგორც თერაპია

როდესაც გვეკითხებიან, რა არის ჩვენი ჰობი, საყვარელი აქტივობა ან კომფორტის ზონა - კულინარიას ძალიან იშვიათად ან უფრო ხშირ შემთხვევაში - ალბათ, არც ვპასუხობთ. თუმცა, სინამდვილეში, კულინარია მხოლოდ კერძის მომზადების პროცესი არ არის, ის ერთგვარი თერაპიაა და დადებითად მოქმედებს ადამიანის მენტალურ ჯანმრთელობაზე. გამომდინარე იქედან, რომ ეს ნაკლებად გავრცელებული თეორიაა, შესაძლოა კრიტიკულად განეწყო და ირაციონალურად მიიჩნიო, თუმცა, თუ კარგად დავუკვირდებით, მასში ლოგიკურ ჯაჭვს აღმოვაჩენთ. შესაძლოა, ამ ბლოგის წაკითხვის დროს საკუთარ თავთან მრავალი ანალოგია გაავლო და ნაცნობი სიტუაციური დეტალებიც გაგახსენდეს ყოველდღიური ცხოვრებიდან.

მაშ ასე, რა აქცევს კულინარიას სასიამოვნო პროცესად?

სხვა რაკურსით

აბა, კიდევ ერთხელ წარმოიდგინე შენთვის უკვე ნაცნობი რიტუალი, თუმცა, შეეცადე სხვა კუთხით შეხედო - კვერცხის დატეხვა, მისი თქვეფა, შაქრისა და ფქვილის ერთმანეთში შერევა, ცხობის პროცესში სასიამოვნო სურნელი, რომელიც მადას კიდევ უფრო აღგიძრავს და საბოლოოდ პრიზი - კერძი, რომელიც დამსახურებულად, იმაზე გემრიელი გეჩვენება, ვიდრე შესაძლოა იყოს. შედეგი ამ ყველაფერს კიდევ უფრო სასიამოვნოს ხდის. ჩვენს საყვარელ კერძს რომ ძალუძს ხასიათი გამოგვიკეთოს, დროებით მაინც, ალბათ ყველას გამოგვიცდია. თუმცა, ამ შედეგამდე განვლილი ეტაპებიც შესაძლოა არანაკლებ სასიამოვნო აღმოჩნდეს. კიდევ უფრო დადებითი აღმოჩნდება იმ ადამიანების რეაქცია, რომლებიც შენს შექმნილ კერძს მოგიწონებენ, მადლიერებით შემოგხედავენ და სხვადასხვა კომპლიმენტით შეგაქებენ.

ცხადია, ვერ ვიტყვით, რომ თუ ცხოვრებაში მძიმე ეტაპი გვაქვს ან რაიმეს ძალიან განვიცდით, კულინარიით ჩვენი მდგომარეობიდან გამოვალთ და მომენტალურად კარგ ხასიათზე დავდგებით. თუმცა, ამ ყველაფრის გადალახვაში ჩვენს ამა თუ იმ ჰობს პატარა წვლილი მაინც შეაქვს. აი, მაგალითად, როდესაც საქმისგან გადაღლილები ვართ ან ბევრი საფიქრალი გვაქვს - უეცრად კი თავი აგვტკივდება, ყურადღების მინიმალური დოზით გადატანა - თუნდაც, სუფთა ჰაერზე გასვლა და გასეირნება ოდნავ გამოგვაკეთებს ხოლმე. ეს მხოლოდ ინდივიდუალური დაკვირვება არაა და ხშირად, უფრო მასშტაბურ სახესაც იღებს, მაგალითად - შეგიძლია Google-ის საძიებო სისტემით მარტივად მოძებნო, წაიკითხო ან მოისმინო მრავალი ისტორია ადამიანებისგან, რომლებიც მენტალურ დაავადებებს ებრძვიან (დეპრესია, ნევრული აშლილობა და სხვა) მათი საყვარელი საქმიანობით, რომელთაგანაც ერთ-ერთი კულინარიაა.

როდესაც უბრალოდ ცუდ ხასიათზე ვართ, არსებულ პრობლემაზე კიდევ უფრო ბევრს ვფიქრობთ და ეს ნეგატიური ფაზები თითქოს ერთი დაუსრულებელი წრეა. ამიტომაც, თუნდაც მცირე დროით ყურადღების სხვა დეტალებზე გადატანა გვეხმარება ნეგატიური ფიქრებისგან თავის დასაღწევად. კერძის მზადების დროს მაქსიმალურად ვფოკუსირდებით იმ საქმეზე, რომელსაც ვაკეთებთ, რომ შედეგი ისეთი გამოგვივიდეს, როგორიც გვინდა. შესაძლოა, თავიდან, რამდენიმე ცდაზე ორცხობილის ცხობისას მისი გვერდები მიგვეწვას ან სამზარეულოში სრულ არეულობაში აღმოვჩნდეთ, თუმცა გამოცდილების მიღება პროგრესის აუცილებელი წინაპირობაა. ამიტომაც, კულინარიას თერაპიულთან ძალიან მიმსგავსებული ეფექტი აქვს. გარდა ამისა, პროცესში ადამიანები კრეატიულები, დასრულებისას კი რელაქსირებულები არიან. მართალია, ამის დამადასტურებელი მეცნიერული ახსნა ან/და სამეცნიერო კვლევა არ არსებობს, მაგრამ არსებობენ ადამიანები, რომლებიც საკუთარი გამოცდილების გაზიარებით ანახებენ მსოფლიოს, როგორ შეიძლება ისეთი მარტივი და ყოველდღიური პროცესისგან - როგორიც კულინარიაა, მრავალმხრივ ისარგებლონ.

სამზარეულოს აქსესუარები

თუ ჯერ კიდევ ფიქრობ, რომ ეს ყოველივე ნაკლებად დამაჯერებელია და კიდევ უფრო კრიტიკულად განეწყვე, გირჩევთ, შენს სამზარეულოს მიაშურო და საყვარელი კერძის მომზადება დაიწყო. თან, პროცესზე იფიქრე და თან, შედეგზე. გარდა იმისა, რომ გემრიელ კერძს მიირთმევ, თვითშეფასება მოგემატება, შესაძლოა საყვარელი ადამიანებიც გააბედნიერო და რაც მთავარია, შენი გუნება-განწყობა საგრძნობლად თუ არა, ნაწილობრივ მაინც შეიცვლება. გემრიელი კერძების მოსამზადებლად სამზარეულოს აქსესუარები დაგეხმარება, რომლებიც შეგიძლია ნიდოზე დაათვალიერო.