Crosley – პატარა რადიო სადგურიდან ფირსაკრავების ყველაზე დიდ მწარმოებლამდე

Crosley ამჟამინდელი მუსიკალური ინდუსტრიის ერთ-ერთი ყველაზე დიდი ბრენდია. კომპანია განსაკუთრებით ცნობილია ვინტაჟური ფირსაკრავების წარმოებით. ქროსლი ყოველთვის ცნობილი იყო მისი ინოვაციურობითა და მუდმივად განახლებადი პროდუქტებით. დღევანდელი მსოფლიო ცნობადობის უკან დგას ბრენდის მრავალწლიანი ისტორია, გამოცდილება და არაერთი ისეთი პროდუქტის წარმოება, რომლებსაც არანარი კავშირი არ აქვს რადიოსთან თუ ფირსაკრავებთან.

კომპანიის ისტორია იწყება მე-20 საუკუნის მეორე ათწლეულში, როცა რადიო ჯერ კიდევ არ იყო ის ნივთი, რომელსაც ყველა ოჯახში წააწყდებოდით. ერთი რადიო დაახლოებით 100 დოლარი ღირდა, რაც ზოგიერთი ადამიანის იმდროინდელ თვიურ ანაზღაურებაზე მეტი იყო. ერთი სიტყვით, რადიო ფუფუნების საგანი იყო, რომლის შეძენაც მხოლოდ ერთეულებს შეეძლოთ. ეს გრძელდებოდა მანამ, სანამ ბაზარზე ინოვაციურად მოაზროვნე პაუელ ქროსლი გამოჩნდებოდა სულ ახალი კონცეფციით – პერსონალური რადიო მხოლოდ 7 დოლარად! ქროსლის ენტერპრენუარული სულისკვეთება მიმართული იყო იმისკენ, რომ ყველას უნდა ჰქონოდა მუსიკით ტკბობის შესაძლებლობა.

რადიოს ბაზარზე შესვლიდან ორი წლის შემდეგ, კროსლიმ დააარსა კომერციული რადიო სადგური Crosley radio. ის მალე იქცა ამერიკაში ყველაზე დიდ რადიო სადგურად. 1923 წლის დასაწყისში ქროსლიმ იყიდა კიდევ ერთი რადიო კომპანია Precision Equipment Co. "ტუზის" ბრენდი არმსტრონგის ლიცენზიით. 1924 წელს მან იგი გააერთიანა თავის რადიოსადგურთან და ამ კომბინაციას დაარქვა Crosley Radio Corp. ამის შემდეგ იყიდა დიდი საწარმო, რომელიც აღჭურვა ისე, რომ შესაძლებელი ყოფილიყო დღეში 5 000 ცალი რადიოს წარმოება. ქროსლიმ საავტომობილო ინდუსტრიისგან „ისესხა“ დაბალი ღირებულება–მაღალი მოცულობის წარმოების კონცეფცია, რამაც მას მიანიჭა "რადიოს ჰენრი ფორდის" ტიტული. მოგვიანებით ქროსლიმ იყიდა კიდევ ორი რადიოსაწარმო – Kanada DeForest Radio Corp. Ltd 1924 წელს და Amrad 1925 წელს. 1928 წელს კი კომპანიის გაყიდვებმა და შემოსავლებმა პიკს მიაღწია.

მომდევნო წლებში ქროსლიმ დაიწყო არა მხოლოდ რადიოების, არამედ სახლის სხვა ნივთების წარმოება. 1926 წელს კომპანიამ წარმოადგინა მაცივარი "Icyball", რომლის გამოყენება სახლებში შეიძლებოდა ელექტროენერგიის მოხმარების გარეშე, მაცივარი მუშაობდა ნავთზე. ეს იყო პირველი ნივთი საყოფაცხოვრებო ტექნიკის გრძელი რიგიდან, რომელიც 1956 წლამდე მზადდებოდა ქროსლის სახელის ქვეშ.

1931 წელს ქროსლიმ საავტომობილო ბაზარზე შესვლაც კი შეძლო. აწარმოებდა კომპაქტურ მანქანას, რომელსაც 1 გალიონით 60 კილომეტრის გავლა შეეძლო და ნამდვილად იყო მანქანა, რომელმაც საავტომობილო ბაზარზე ახალი სიტყვა თქვა.

მეორე მსოფლიო ომის დროს, ქროსლი იყო ”proximity fuze”-ის მნიშვნელოვანი მწარმოებელი, რომელსაც ომის დროს მოკავშირეები დიდ უპირატესობად იყენებდნენ. proximity fuze (სიახლოვის ფუზი) არის ფუზი, რომელიც ასაფეთქებელ მოწყობილობას ავტომატურად აფეთქებს, როდესაც სამიზნემდე მანძილი შემცირდება წინასწარ განსაზღვრულ მნიშვნელობაზე. Proximity fuzes განკუთვნილია სამიზნეებისთვის, როგორიცაა თვითმფრინავები, რაკეტები, გემები ზღვაში და სახმელეთო ჯარები.

1952 წელს ქროსლიმ გადაინაცვლა ტელევიზორების წარმოებაში. მისი პორტატული ტელევიზორი იყო ნომერ პირველი გაყიდვადი პროდუქტი ბაზარზე წლების განმავლობაში.

უკვე ყველასთვის ცნობილი ფირფიტების წარმოებაზე ქროსლი გადავიდა 90–იან წლებში. პირველი ფირფიტა გამოვიდა 1992 წელს, როდა CD დისკები ჯერ კიდევ გამეფებული იყო ბაზარზე. თავიდან ყველას ეგონა, რომ ეს წამოწყება განწირული იყო, მაგრამ დღეს უკვე 30 წელზე მეტი ხნის განმავლობაში ხალხისთვის თანამედროვე მუსიკის მიწოდების შემდეგ, კომპანია არის ვინილებისა და ფირსაკრავების ერთ–ერთი ყველაზე დიდი მწარმოებელი.

„გამოხატე შენი სტილი“ – ეს არის კომპანიის მანტრა. საკუთარ თავს გამოვხატავთ ყველა ქმედებით, არ აქვს მნიშვნელობა სად ვართ, რას ვაკეთებთ, ხელოვნებიდან დაწყებული ტანსაცმლით დამთავრებული, ყველაფერი ჩვენი მსოფლმხედველობის ნაწილია და თითოეული ჩვენი არჩევანი და ნაბიჯი ჩვენი შინაგანი მეს გამოხატულებაა. ასევეა მუსიკაც, არ აქვს მნიშვნელობა როგორი ხართ – ფერადი და მხიარული, არისტოკრატიული და მოწესრიგებული, გიჟური და ეკლექტური – Crosley არის ყველასთვის, ვისაც მუსიკა უყვარს.