მაცივარი კაცობრიობის მეგობარია. ჩვენი მარჯვენა ხელი. ჩვენი საცავი და ჩვენი იმედი. ეს იმედი რომ არ გაგვიცრუვდეს, პატარა ხრიკები უნდა ვიცოდეთ – რა არის საჭირო იმისთვის, ბოსტნეული დილით შემოტანილს და პატარძლის დაკრეფილს რომ ჰგავდეს, ხილმა ფორმა, გემო და სასარგებლო თვისებები არ დაკარგოს, ხორცი და თევზი დროზე ადრე არ გამოგვეცალოს ხელიდან?

მზად ხართ?

დავიწყეთ.

ტემპერატურა არის გადამწყვეტი!

პროდუქტი რომ უფრო დიდხანს შეინახოს, მაცივრის ტემპერატურა აუცილებლად 0°C-დან 5°C-მდე უნდა იყოს, ხოლო საყინულისა – -18°C-დან -20°C-მდე. წესით და რიგით, ყველა მაცივარს აქვს ტემპერატურის მარეგულირებელი და არ დაიზაროთ, პირველ რიგში ეს საკითხი მოაწესრიგეთ. რაც უფრო მალე დაარეგულირებთ ტემპერატურას და შემდეგ სტაბილურად შეინარჩუნებთ, მით ნაკლები ზიანი მიადგება პროდუქტს – არც მავნე ბაქტერიები გამრავლდება და არც საჭმლის გადაყრა მოგიწევთ. არ იფიქროთ, კაი რა, ერთი გრადუსი – იქით, ერთი – აქეთ, რა მნიშვნელობა აქვსო. აქვს. ყოველი გრადუსი გადამწყვეტია. მაგალითად, მწვანილს თუ 6°C-ზე შეინახავთ, სამ დღეში მოიძონძება, ხოლო 3°C-ზე შენახული ისევ შუშპარა და ქორფა იქნება.   

სწორად განათავსეთ პროდუქტი თაროებზე!

მაცივრის თაროებზე ტემპერატურა შეიძლება განსხვავებული იყოს. როგორც წესი, ზედა თაროებზე უფრო თბილა, ქვემოთ კი გრილა. პროდუქტიც ამის მიხედვით გადაანაწილეთ. ახლავე გეტყვით, როგორ:

  • უმი ხორცი, თევზი და ზღვის პროდუქტები 0°C-დან 5°C-მდე ტემპერატურაზე უნდა შეინახოთ, რომ სითბოს მოყვარული ბაქტერიები არ გამრავლდეს და არ გაფუჭდეს. ამიტომ, ქვედა თაროზე დააბრძანეთ, ან სპეციალურად ამ პროდუქტისთვის განკუთვნილ ქვედა სათავსოში, რომელიც ბევრ მაცივარს აქვს;
  • კარაქი და ყველი უფრო ნელა ფუჭდება, შესაბამისად, სჯობს ზედა სართულზე აუძახოთ. იქვე მოაკალათეთ სანელებლები და საკაზმები;
  • შუა თაროები დაუთმეთ მომზადებულ კერძებს, ქვაბებით, ან კონტეინერებით რომ ვინახავთ. გვერდით შეგიძლიათ მიუწვინოთ ძეხვეული, პიცა და მისი ნათესავები და ხილი.

პ.ს. ჰო, ხილი და ბოსტნეული ერთად არ შეინახოთ. შემდეგ პუნქტში მოგახსენებთ, რატომაც:

მიაქციეთ ყურადღება ტენიანობას!

ხილი და ბოსტნეული უფრო დიდხანს შეინახება, თუ სწორად შევურჩევთ ტენიანობას. ბოსტნეულს უფრო მაღალი ტენიანობა სჭირდება, ხილს – ნაკლები. არ დაგზარდებით და უფრო გასაგებად აგიხსნით. მოკლედ: თუ გაქვთ მაცივარში ცალკე სათავსო, აჯობებს, ბოსტნეულს იქ მოუყაროთ თავი. ასე პროდუქტი ნაკლებ სითხეს დაკარგავს და შესაბამისად, მაღალი ტენიანობა შენარჩუნდება. ხილისა და ბოსტნეულის თანაცხოვრებას რაც შეეხება, ხილი იქვე არ ჩაალაგოთ. ბოსტნეული გამოყოფს ეთილენს, ბუნებრივ აირს, რომელიც დახურულ სივრცეში სხვა პროდუქტების გადამწიფებას იწვევს. აქედან გამომდინარე, აჯობებს, ხილი ბოსტნეულს დააშოროთ და შუა თაროზე განათავსოთ.  

ნუ დატოვებთ კარს ღიას!

ზოგმა იცის, გააღებს მაცივრის კარს და დგას და დგას და დგას და ფიქრობს – რა მშია, რა გამოვიღო, ეს მინდა, თუ – ის, ის მინდა, თუ – ეს. დაკეტეთ და ისე იფიქრეთ. ყოველ გამოღებაზე მაცივარში თბილი ჰაერი იჭრება და ერთი, რომ პროდუქტი ფუჭდება და მეორე – მეტი ენერგია იწვება.

ნუ გამოტენით მაცივარს!

ღმერთმა ქნას, ყველას სავსე მაცივარი გვქონდეს, მაგრამ ნუ გაძეძგავთ ისე, რომ პროდუქტი ზედა თაროებს ებჯინებოდეს და ნემსის ჩასაგდები ადგილი აღარ იყოს. ეს ხელს შეუშლის ცივი ჰაერის ცირკულაციას, შესაბამისად, ტემპერატურა არათანაბრად გადანაწილდება და მოიმატებს, რაც ბაქტერიების გამრავლებასა და საჭმლის გაფუჭებას შეუწყობს ხელს. სულ ოხრად დაგრჩებათ მერე...

გააციეთ კერძი მაცივარში შედგმამდე!

მაცივარში შედგმამდე აუცილებლად გააგრილეთ კერძი და ნუ შემოდებთ ცხელ-ცხელ ქვაბს თაროზე. მაცივარში, ან საყინულეში, თუხთუხა ქვაბი რომ დურთოთ, ტემპერატურა აიწევს და ჯერ ერთი, სტაბილური სიგრილის გარეშე დარჩენილ სხვა პროდუქტს შეექმნება საფრთხე და მეორეც, მაცივარს უფრო მეტი გარჯა მოუწევს ტემპერატურის დასარეგულირებლად და ელექტროენერგიის გადასახადიც გაგეზრდებათ.

არ დადგათ მაცივარი გარეთ!

მაცივარს არ უხდება და არ უყვარს ტემპერატურის ცვალებადობა, ანუ, როცა ძალიან ცივა, ან როცა ზედმეტად ცხელა. ამგვარ პირობებში ვერ ინარჩუნებს სტაბილურ ტემპერატურას და ვერ შეინახავს პროდუქტს თქვენ რომ გაგიხარდებათ, ისე. ამიტომ, ნუ გააგდებთ მაცივარს კარში. იდგას სახლში, მშვიდად და კომფორტულად. ოთახის ტემპერატურაზე არც გადაცივდება და არც გადახურდება. თქვენც კმაყოფილი იქნებით და ისიც.

შეინახეთ საკვები შეფუთულ მდგომარეობაში!

კარგი იქნება, თუ საკვებს იმავე შეფუთვით შეინახავთ, რა შეფუთვითაც იყიდეთ. ხილს და ბოსტნეულს, შესაძლოა საჰაეროები ჰქონდეს კონტეინერზე, ხორცი ვაკუუმიან პაკეტში თუ დევს, დაე, იდოს. თუ არ დევს, ჩადეთ. უფრო ჰიგიენურიცაა, პრაქტიკულიც და პროდუქტიც უკეთ შეგენახებათ. და კიდევ, კარს რომ გამოაღებთ, სოსისი არ დაგეცემათ თავში.  

პროდუქციის ფილტრები
ბრენდი
ენერგომოხმარების კლასი
ფასი

 – 

  • 409
  • 5499
ფერი
    ყველაფრის ჩვენება (8)
მაცივრის ტიპი
    ყველაფრის ჩვენება (8)
გაგრილების სისტემა
    ყველაფრის ჩვენება (10)
მაცივრის საერთო ტევადობა
    ყველაფრის ჩვენება (51)
საყინულე კამერა