10 საუკეთესო მუსიკალური ალბომი თქვენი ყოველდღიური რუტინისათვის

რა შეიცვალა ბოლო ერთ წელიწადში თქვენს ცხოვრებაში? მოსუქდით, თუ გახდით? მუშაობთ, თუ დარჩით უმუშევარი? დისტანციურად შრომობთ, თუ დადიხართ პირბადეებითა და სადეზინფექციო ხსნარებით შეიარაღებული? საღამოობით რას აკეთებთ? 21:00 საათის შემდეგ მაქსიმუმ ბოლთის ცემა მოახერხოთ სახლში, ან აივანზე ჩამოჯდეთ, რადგან ვერც თქვენ გადიხართ გარეთ და ვერც გარედან მომსვლელი შემოდის თქვენთან. კომენდანტის საათის შიშით მიწაზე ჭიანჭველას ვერ გაუვლია და ცაში ფრინველს ვერ გადაუფრენია.

მთელ ამ ერთწლიან კოვიდერთფეროვნებაში იმგვარი ჩვევებიც დაგვავიწყდა, როგორიც არის, მაგალითად, განვლილი მანძილის გაზომვა მოსმენილი სიმღერების რაოდენობით, ყურსასმენებიდან გამომავალი მუსიკის ტემპში სიარული, ავტობუსში მოსასმენი საყვარელი „ფლეილისტები“, სუპერმარკეტში ჩართული სიმღერის შემთხვევით აყოლა და ურიკის მელოდიის რიტმში გორიალი... თუმცა ამასობაში ახალი ჩვევები ჩამოგვიყალიბდა – ახალი სახლურ-კორონული ჩვევები, ერთგვარ მოსაწყენ რუტინად რომ გადაიქცა. ჰოდა, აბა ჩვენ რისთვის ვართ, ცხოვრება თუ არ გაგიფერადეთ, ჩვენი წილი კარგი განწყობა და ხალისი თუ არ შემოვიტანეთ? თანაც საყვარელი მუსიკა სახლს ძალიან უხდება, მით უმეტეს, თუ ფირსაკრავი, დინამიკი და კარგი მუსიკის საუკეთესო ხარისხში მოსმენის შესაძლებლობაც გაქვთ.

1. ერთი ჭიქა ბიტლზი საუზმედ

დილის უკვდავების წყაროს, ფინჯან ყავას, ერთიორად აგემრიელებს უკვდავი ბრიტანული ბენდის მუსიკა. მხრების ასათამაშებელი სიმღერების თანხლებით სამზარეულოში ფუსფუსი გაცილებით მარტივია. და როცა ციბრუტივით ტრიალის – საუზმის მომზადების, ბავშვების მწყემსვის, ჩაცმა-დახურვისა და თავის მოწესრიგების შემდეგ, ბოლოს და ბოლოს, მანქანის საჭემდე მიაღწევთ, ინერციით ისევ Drive my Car-ის ენერგიული რიტმები გაგყვებათ და კიდევ დიდხანს ვერ მოიცილებთ აკვიატებულ მელოდიას:

Baby, you can drive my car

Yes, I'm gonna be a star

Baby, you can drive my car

And maybe I'll love you 

2. გალაქტიკის მცველები თქვენს საქმიან განწყობაზე იზრუნებენ

სამსახურის საქმეებს ფონად არაფერი უხდება ისე, როგორც  Guardians of the Galaxy-ის რიტმები. რა საქმეც არ უნდა გქონდეთ, მისი თანხლებით ყველაფერი მარტივდება. ალბომიდან, საყვარელი მუსიკოსების ხმასთან ერთად, ზღვა ენერგია იფრქვევა – მისი დახმარებით ყველაფერს მოერევით, თქვენს საქმესაც და საერთოდ, ყველა „ბოროტმოქმედს“, რომელიც წინ გადაგეღობებათ. Zoom-ის მოსაწყენი შეხვედრა თუ შეგაწყვეტინებთ ამ სიამოვნებას, ალბომის წყალობით უკვე იმდენად მოყოჩაღებული იქნებით, ჩართული კამერის უკან შემთხვევით ჩაძინება აღარ დაგემუქრებათ. 

3. ბობ დილანი სიმშვიდისა და ბალანსის მოსაპოვებლადაა შექმნილი

დამსახურებული შესვენების დროც მალე მოდის. ამ ძვირფასი ერთი საათისთვის ალბომი განსაკუთრებული რუდინებით უნდა შეირჩეს, რადგან მასზეა დამოკიდებული თქვენი დღის მეორე ნაწილი. ძნელი სათქმელია, თქვენ რა გახსენდებათ ასეთ დროს, მაგრამ ჩვენი აზრით, ბობ დილანის ხმის ტემბრს, რომელიც ნოსტალგიას, სიმშვიდეს, სიყვარულსა და იმედს აერთიანებს, არაფერი სჯობს. წლის რომელი დროც არ უნდა იყოს, ბობ დილანის მუსიკას თქვენი ფირსაკრავიდან ყოველთვის მოაქვს ვუდსტოკის სიმსუბუქე, ყვავილების სურნელი და თავისუფლების შეგრძნება.

4. ცხოვრების ხალისს აუცილებლად სჭირდება MUSE

სამუშაო ლეპტოპის დახურვას, ხშირად, ამოსუნთქვასთან ერთად, თან ახლავს შეგრძნება, რომ მორჩა, არაფრის თავი აღარ გაქვს. არადა, წინ მთელი საღამოა. MUSE მომენტალურად ჩააქრობს თქვენი სასოწარკვეთის ნაპერწკალს და ნამდვილ მეამბოხედ გადაგაქცევთ. ეს მუსიკა საკუთარ თავში ახალ ენერგიას აღმოგაჩენინებთ და მთების გადადგმას მოგანდომებთ. მთები თუ არა, სახლში ერთი-ორი ნივთი აუცილებლად გექნებათ გადასაადგილებელი. ჰოდა, სუპერძალებით დამუხტულები, მხოლოდ გადაადგილებით კი არ შემოიფარგლებით, სულაც გადაასხვაფერებთ მობეზრებულ ინტერიერს.

5. Everything Now – 21:00 საათამდე

გიცდიათ ვახშმის მომზადება Arcade Fire-ის ფონზე? ჭურჭლის რეცხვა? რა სჯობს სახლის მილაგებას, როცა ირგვლივ ყველაფერი გემსუბუქება? მათ შორის, მუსიკაც. ამ ალბომს კი ნამდვილად შეუძლია დატვირთული საღამოს ერთი-ორად გამარტივება, გალაღება და შემსუბუქება. „I guess that you've got everything now“ – და ახლა და ამ წუთას და ამ წამს ყველაფერს მოერევით, ხალისითაც კი.

6. როცა მეორე სიცოცხლე იხსნება, გარეთ კი ყველაფერი იკეტება, Queen-ის საათია

Queen-ის ეს ალბომი იმდენჯერ უქიათ და უდიდებიათ, ახალს ვერაფერს ვიტყვით. ბოლოს და ბოლოს, Queen-ია და Bohemian Rhapsody-იც ის სიმღერაა, Mamaaaa-ს Oooh-თი გაგრძელება ინსტინქტად რომ გადაგვიქცია. ჰოდა, ალბათ ზუსტად იცით, რომ ამ სიმღერას მკვდრის გაცოცხლება თუ არა, დაღილ-დაქანცულის წამოყენება და მისთვის სულის შთაბერვა ნამდვილად შეუძლია. სრული ალბომის გავლენით კი, დაძინებამდე დარჩენილი რამდენიმე საათისთვის, არათუ საკმარისი, მოჭარბებული ენერგიაც კი შეიძლება მიიღოთ.

7. და ცოტა ცხარე წიწაკა გამოსაფხიზლებლად

საკუთარი დანაწევრებული თავის და მთელი ოჯახის მუსიკის ირგვლივ გაერთიანებისთვის არაფერია პეპერსებზე უკეთესი. მათ სიმღერებზე გაზრდილი, თუ გასაზრდელი ადამიანები განსაკუთრებულ სიახლოვეს გრძნობენ, როდესაც ერთი მათგანის მიერ შეწყვეტილ Californication-ს მეორე აგრძელებს. ჩართეთ ალბომი თქვენს ფირსაკრავზე, დაისხით ერთი ჭიქა სასმელი თქვენი გემოვნებით და შევხვდეთ დღის ბოლოს on the other side.

8.  დღის მიწურულს, გარდამავალ დროში, გარდაუვალი ეგზისტენციური კრიზისის მისწრება

თუმცა დღის ბოლო მაინც დღის ბოლოა და შემოწოლილი ფიქრების კორიანტელს ვერ გავექცევით. OK Computer Radiohead-ის ერთ-ერთი საუკეთესო ალბომია, რომლის თანხლებითაც შეგიძლიათ, თქვენი გონება ამოგზაუროთ, არეული ფიქრები დაალაგოთ და დალაგებულები არიოთ. ტომ იორკის ხმა და ჯონი გრინვუდის ოსტატობა სწორედ ის კომბინაციაა, ყველაფერზე რომ დაგაფიქრებთ, მათ შორის იმაზეც, აბა დღეს თქვენ ვის რა არგეთ. მთლად ძილის წინაც ნუ მოუსმენთ. უფრო მაშინ, როცა ყველანაირი ფიზიკური აქტივობისთვის ენერგია სრულად ამოწურულია და დროა, ტვინის დარჩენილი რესურსი სწორ გზაზე დააყენოთ.

9. ახალი დღის იმედისა და თვითგამხნევებისთვის

ყველასა და ყველაფრისგან დაღლილს მხარდამჭერად David Bowie მოგევლინებათ. მას კედლების ნგრევის ძალა შესწევს, მისი დახმარებით თქვენთვის კოსმოსიც ხელმისაწვდომია, მას ძალუძს, გმირად გადაგაქციოთ. ღამით კი არაფერია უფრო იმედიანი, ვიდრე მეორე დღისა და ახალი შესაძლებლობების მოლოდინით დაძინება. 

10. მარილი

მეათე ალბომი თავად შეარჩიეთ დღის ბოლოს, იმ რამდენიმე წუთისთვის, როდესაც ყველამ ვიცით ჩვენი თავი. დაათვალიერეთ ფირფიტების კოლექცია და თავად შექმენით თქვენი ყოველდღიურობა.