ფირსაკრავის უპირატესობანი

თითქმის ყველას გამოგვივლია წარსულში ის პერიოდი, როდესაც მუსიკის მოსმენა ასეთი მარტივი არ იყო. დღეს სასურველი მუსიკის პოვნა, მოსმენა და გადმოწერა ნებისმიერ სიტუაციაში, ნებისმიერი წერტილიდან არის შესაძლებელი. თუ პირადი გამოცდილება არ გაქვს, ცხოვრებაში ერთხელ მაინც, ალბათ გსმენია უფროსი თაობისგან, როგორ უსმენდენ რადიოთი საყვარელ შემსრულებლებს ან საზოგადოების თავშეყრის ადგილას პირველად მოისმენდნენ ხოლმე მსოფლიო ჰიტებს. დროის მსვლელობასთან ერთად, ტექნოლოგიამაც წინ წაიწია და ჯერ CD დისკები, შემდეგ iPod, ბოლოს კი მრავალფუნქციური მობილურები და Bluetooth ყურსასმენები შემოგვთავაზა. კიდევ უფრო დიდი ხნის წინ იყო ფირსაკრავებისა და ფირფიტების ერა. ეს პერიოდი ხასიათდებოდა განსხვავებული, თავისებური სტილით - ჰიპური კულტურითა და ვინტაჟური ელფერით. შესაძლოა, სულაც არ გამოგიცდია 20-ე საუკუნის თავისებურებები, თუმცა ამ წლების ნოსტალგია მაინც გაქვს, რადგან ეს პერიოდი მუსიკალური თვალსაზრისით გამორჩეულია და მისი თანმდევი ატრიბუტები, როგორიც ფირსაკრავები და ვინილებია, მისთვის განუყოფელია. თუ გამოგივლია, ხომ კიდევ უფრო ცხადად იგრძნობ ამ ნოსტალგიას. ამიტომაც, ფირსაკრავის კულტურა დღემდეც საკმაოდ აქტიურად ცოცხლობს, პირიქით - მეტად გამორჩეულ და საინტერესო აქსესუარად ითვლება, განსაკუთრებით მელომანებისთვის.

ხარისხი

ყველასთვის კარგად ცნობილი ფაქტია, რომ ორიგინალი რეკორდების, ვინილებისა და ფირსაკრავების ჟღერადობა ბევრად ხარისხიანია, ვიდრე სხვა ფორმატში, რასაც უბრალო მსმენელი და მელომანიც აუცილებლად შეამჩნევს. როდესაც მუსიკის სხვა ფორმატში იწერება, ორიგინალი ვერსიის შემცირება აუცილებელია, რადგან მეხსიერების დიდი ნაწილი არ დაიკავოს ჩვენს კომპიუტერებსა და თუ ტელეფონებზე, ამ პროცესის დროს ბევრი დეტალი იკარგება, შესაბამისად ხარისხიც უარესდება. რაც შეეხება ვინილს, მასზე მუსიკის მოსმენა ორიგინალ ფორმატში შეგვიძლია, როგორადაც ჩაიწერა. ამ ანალოგიის კარგი მაგალითი რომ მოვიყვანოთ, დაახლოებით ასეთი იქნება: წარმოიდგინე ფილმს კინოთეატრში უყურებ, შემდეგ კი ტელეფონში ან კომპიუტერის ეკრანზე. ცხადია, ხარისხს შორის დიდ განსხვავებას შეამჩნევ.

მუსიკის სიყვარული

გინდა თუ არა, როდესაც ვინილსა და ფირსაკრავს შეიძენ და მის მოსმენას პერიოდულად მაინც დაიწყებ, მუსიკის სიყვარული ბევრად უფრო გაგიღრმავდება, შესაბამისად გემოვნებაც დაგეხვეწება. საყვარელი შემსრულებლის ისეთ სიმღერებს აღმოაჩენ, რომელიც შენთვის აქამდე უცნობი იყო. მიუხედავად იმისა, რომ ყველას მუსიკალური გემოვნება ერთმანეთისგან განსხვავებულია, დიდია ალბათობა, რომ თუ მხოლოდ პოპის მოყვარული ხარ, შესაბამისი ვინილის მოსმენის შემდეგ როკ ჟანრის ან ბლუზის მსმენელიც გახდე. ვინილის ჩანაწერებში ხშირად ისეთი კომპოზიციებია, რომლებიც საზოგადოების დიდ ნაწილში პოპულარულობით არ სარგებლობს და მოგებაზე სულაც არ არის ორიენტირებული. ასეთი მიქსებისა და ფლეილისტების თანამდროვე პლატფორმებზე, მაგალითად Spotify-სა და Youtube-ზე (მისი ალგორითმიდან გამომდინარე) აღმოჩენა საკმაოდ რთულია.

ინვესტიცია

იმის მტკიცებას კი ბევრი არგუმენტი ნამდვილად არ სჭირდება, რომ ფირფიტების კოლექცია კარგი ინვესტიციაა. დღესაც შეგიძლია 1940-50 წელს ჩაწერილი ვინილი შეიძინო და იმ შემთხვევაში, თუ დაუზიანებელია, ზუსტად იმავე ეფექტითა და ხარისხით მოუსმინო, როგორითაც წლების წინ გამოუშვეს. თუ გარკვეული დროის გასვლის შემდეგ ესა თუ ის ალბომი მოგბეზრდა ან სხვა მიზეზით გაყიდვა მოგინდა, არც ეგაა პრობლემა, პირიქით, რაც უფრო დრო გადის, ძველი ნივთების, მათ შორის ფირფიტებისა და ანტიკური ფირსაკრავების ფასიც იზრდება. გარდა ამისა, რამდენიმე ფირფიტის შეძენის შემდეგ უკვე კოლექციონერი იქნები და სურვილი გაგიჩნდება, რაც შეიძლება მეტი საყვარელი არტისტის ალბომი შეაგროვო, თანაც, დიდი სიამოვნებით.

ამასთანავე, თანამედროვე და კომფორტულიც

დიახ, ნამდვილად თანამედროვე წაიკითხე. არ გაგიკვირდეს, წამყვანმა ბრენდებმა შეძლეს შეექმნათ ვინტაჟურისა და თანამედროვე ელემენტების იდეალური სინთეზი. მაგალითად, Lenco ერთ-ერთი ცნობილი ბრენდია, რომელმაც ჯერ კიდევ 1960-იან წლებში წარადგინა ფირსაკრავების პირველი მოდელები, მას შემდეგ კი, მოთხოვნის შესაბამისად განავითარა მათი დიზაინი, რომლებსაც დღესდღეობით ძველებური იერსახე შემორჩა, თუმცა ჩაშენებული დინამიკები და Bluetooth მხარდაჭერაც აქვს. Crosleyამ საქმეში გაბედული აღმოჩნდა და ფირფიტების წარმოება ჯერ კიდევ მაშინ დაიწყო, როდესაც CD დისკი ბაზარზე არსებობდა. სწორედ ამ დროს საზოგადოებაში თავმა იჩინა ძველი დროისა და ეპოქის სიყვარულმა, ამიტომაც ფირსაკრავებმაც დიდი პოპულარობა მოიპოვა და ეს პროცესი დღემდე წარმატებით გრძელდება.