რჩევები დამწყები მებაღეებისთვის

ახალბედა მებაღიდან დაწყებული პროფესიონალით დამთავრებული, ყველამ იცის, თუ რამდენად მნიშვნელოვანია მაღალი ხარისხის ბაღის ხელსაწყოები, რათა მებაღეობის პროცესი უფრო მარტივი და სასიამოვნო იყოს. დღეს მოგიყვებით ზოგიერთ ინსტრუმენტზე, რომლებიც ბაღის მოკოკლოზინებაში დაგეხმარებათ.

1. ხელთათმანები

მიუხედავად იმისა, რომ მებაღეობა მშვენიერი ჰობია, სათანადო ხელთათმანების გარეშე ის შეიძლება მტკივნეულ და ბინძურ საქმედ გადაიქცეს.

• ხელთათმანები უნდა იყოს გამძლე, მაგრამ არა ძალიან სქელი, განსაკუთრებით თესლებთან მუშაობისას ან ნერგების გადარგვისას, რათა კარგად იგრძნოთ ხელში მცენარის თესლები და ფესვები.
• ხელთათმანის მორგება მნიშვნელოვანია, რადგან ცუდად გაკეთებულ ხელთათმანს შეუძლია ბუშტუკები გაგიჩინოთ ხელზე ან უბედური შემთხვევის მიზეზი გახდეს.
• ყურადღება მიაქციეთ მასალას. წყალგამძლე, მაგრამ ჰაერის კარგად გამტარი ქსოვილები არ ჩაგიხუთავთ ხელებს და მუშაობის პროცესი იქნება კომფორტული.
• გრძელი მანჟეები იცავს მაჯებსა და წინამხრებს ნაკაწრებისგან და ხელს უშლის ნიადაგის ჩაყრას ხელთათმანის შიგნით.
• შეინახეთ ხელთათმანები მზის, წყლისა და მწერებისგან დაცულ ადგილას.

2. სეკატორი

ბაღის მაკრატელი, რომელსაც სეკატორს ეძახიან, ძალიან პრაქტიკული და საჭირო ხელსაწყოა როგორც სარეველებთან ბრძოლისთვის, ასევე ხელით რთულად მოსაგლეჯი მცენარეების მოჭრისთვის. არსებობს ორნაირი სეკატორი – ტოტების საჭრელი და ე.წ. საკვნეტი მაკრატელი, რომელსაც შედარებით პატარა და ბასრი პირები აქვს.

• ტოტების საჭრელი სეკატორი არის საუკეთესო დაზიანებული ტოტების და უხეში, დიდი მცენარეების გასასხვლელად.
• საკვნეტის გამოყენებას გირჩევთ პატარა მცენარეებთან, სადაც მეტი სიზუსტე და სინაზეა საჭირო.
• ხელსაწყო რომ მალე არ დაბლაგვდეს, აუცილებელია მისი რეცხვა და კარგად გამშრალება ყოველი გამოყენების შემდეგ.

3. ფოცხი

ფოცხი მიწის დასამუშავებლად იდეალური ხელსაწყოა. საქმიანობიდან გამომდინარე შეგიძლიათ აირჩიოთ:

• მოკლეტარიანი, პატარა ფოცხი, რომელიც დაგეხმარებათ ახლადდარგული ნერგების, ბუჩქების, ფესვების გარშემო მიწის გაფხვიერებაში.
• გრძელტარიანი ფოცხი ფოთლების, მოთიბული ბალახის მოსაგროვებლად.

4. ნიჩაბი

ხელის პატარა ნიჩაბი მშვენიერია მცენარეების გადარგვისთვის, მცირე მოცულობის ქოთნებში ჩარგვისა და სარეველების ამოძირკვისთვის.

• ფართოპირიანი ნიჩაბი უკეთესია მიწის ამოსათხრელად, ხოლო შედარებით პატარა კარგია კლდოვანი ნიადაგისა და სარეველების მოთხრისთვის.
• სახელური კომფორტულად უნდა თავსდებოდეს ხელში, რათა არც ხელი იტკინოთ და მუშაობასაც განსაკუთრებული ძალისხმევა არ დასჭირდეს.
• კარგი იქნება თუ ისეთ ნიჩაბს შეიძენთ, რომლის პირიც უჟანგავი ფოლადისგანაა დამზადებული, რადგან უფრო დიდ ხანს გაგიძლებთ.

5. თოხი

თოხი უნდა შეარჩიოთ თქვენი ბაღის ტიპის მიხედვით. ბოსტანში დაგჭირდებათ ძლიერი, ფართოპირიანი თოხი. თუ ბაღში ყვავილებს ახარებთ, რომლებსაც დელიკატური შეხება და მოვლა სჭირდებათ, თხელპირიანი თოხი დაგჭირდეთ.

• ბასრი პირის თოხი უკეთესია და მისი გამოყენება უფრო ადვილია.
• სარეველების თოხს აქვს ღია კვადრატული თავი.
• ბრტყელი თოხი კარგია ბოსტნეულის ბაღებში ნიადაგის მწკრივების გასაკეთებლად.

6. შლანგი

წყალი თქვენი ბაღის სიცოცხლის საწინდარია. მნიშვნელოვანია, რომ ირწყვებოდეს ბაღის თითოეული კუნჭული.

• ყიდვამდე წინასწარ განსაზღვრეთ რა სიგრძის შლანგი სჭირდება თქვენს ბაღს. შლანგის სიგრძე გავლენას მოახდენს წყლის წნევაზე - რაც უფრო გრძელია შლანგი, მით ნაკლებია წნევა.
• შეინახეთ შეფუთულ მდგომარეობაში მზის სხივებისგან შორს.
• ეცადეთ იყიდოთ ისეთი მასალის, რომ არც ადვილად დაზიანდეს და წყლის გადინებასაც არ შეუშალოს ხელი.

თუ ზემოთ ჩამოთვლილ ინსტრუმენტებს გამოიყენებთ, თქვენი ბაღი მუდმივად ხასხასა და აყვავებული იქნება. წარმატებულ მებაღეობას გისურვებთ.