​როგორ შევარჩიოთ საბავშვო ეტლი?

თუ სასეირნო ეტლების უამრავი სახეობის გამო დაბნეული ხართ, ვერ გადაგიწყვეტიათ რომელი შეიძინოთ, სწორ ადგილას მოხვდით. არ აქვს მნიშვნელობა, თქვენი პატარა ეზოში ჩაგყავთ, თუ მასთან ერთად პარიზში მიემგზავრებით, სასეირნო ეტლის სწორად შერჩევა ცხოვრებას საგრძნობლად გაგიადვილებთ.

პირველ რიგში, ერთი რამ დაიმახსოვრეთ, იდეალური სასეირნო ეტლი არ არსებობს. მძიმე ეტლები უფრო გამძლეა, უფრო კარგად და რბილად დადის, მაგრამ კიბეებზე ასატანად, ასევე ვიწრო გზებსა და დერეფნებში მოუხერხებელია. მსუბუქი ეტლები უფრო მოქნილია, მაგრამ სწორი გზიდან თუ გადახვევა მოგიწიათ, არათანაბარ, ან ბალახიან გზაზე მოხვდით, მანევრირება შეიძლება გაგიჭირდეთ. ოპტიმალური გამოსავალია, ორივე ტიპის ეტლის შეძენა, თუმცა ეს რა თქმა უნდა, ფინანსებთან არის დაკავშირებული. ამიტომ ვეცდებით, ჩვენი რჩევებით საუკეთესო არჩევანის გაკეთებაში დაგეხმაროთ. ქართულ ბაზარზე რამდენიმე ტიპის ეტლი არსებობს. რა გამოლევს თანამედროვე მწარმოებლების ფანტაზიას?! ქვემოთ ჩამონათვლილ ეტლებზე გაცილებით მეტ მოდელს იპოვნით დასავლეთის ქვეყნებში. თუმცა ძალიან არ გადაგტვირთავთ და ჩვენს რეალობასთან მორგებულ სიას შემოგთავაზებთ.

სასიერნო ეტლი

მსუბუქი ეტლის გამოყენება მარტივია და ამავდროულად, ის არის იაფი. ამიტომ, ხშირად დედები მასზე აკეთებენ არჩევანს. მსუბუქი ეტლებიც განსხვავდება ერთმანეთისგან. არის ყველაზე იაფიანი მოდელები, რომლებიც ძალიან მსუბუქი და მოსახერხებელია, და ასევე მოდელები, რომლებიც ცოტა უფრო მძიმეა და უფრო მეტი ფუნქცია აქვთ, მაგალითად, დაწოლის რეჟიმი. ზოგადად, რაც უფრო მეტი ფუნქცია აქვს ეტლს, მით უფრო მძიმეა ის.

ტრანსფორმერი

ტრანსოფრმერები, რომლებიც 2 პოზიციაში შეგიძლიათ გამოიყენოთ, საკმაოდ ფუნქციური, მაგრამ, რა თქმა უნდა, დიდია და ყოველდღიური მოხმარებისთვის მოუხერხებელი, განსაკუთრებით თუ საზოგადოებრივი ტრანსპორტით გიწევთ გადაადგილება. ტრანფორმერი სასეირნო ეტლიდან ტრანსფორმირდება კლასიკურ დასაწოლ პოზიციაში, რომელიც ბავშვის პირველი თვეებისთვის არის მოსახერხებელი.

3-1

3-1 რეალურად ტრანფორმერი დამატებით მანქანის სავარძელია, ამ მოდელებს სამგზავრო ეტლებსაც ეძახიან, მანქანის სავარძლის პოზიციიდან ის შეგიძლიათ მარტივად შეცვალოთ და სასეირნო ეტლად გარდაქმნათ და თან ისე, რომ ბავშვს თუ სძინავს, მას არ გაეღვიძება.

ორმაგი

ორმაგი ეტლები მხოლოდ ტყუპებისთვის არ არის. თუ 2 პატარა გყავთ, ასეთი ტიპის ეტლი ცხოვრებას ძალიან გაგიადვილებთ.

რა პარამეტრებს უნდა მიაქციოთ ყურადღება

• წონა – ეტლის წონა 5 კგ-დან იწყება. მხედველობაში გქონდეთ ის, რომ ბავშვის წონა თავის ნივთებთან ერთად შეიძლება 20 კგ-მდე ავიდეს. წონა უნდა შეარჩიოთ იმის მიხედვით, თუ სად და როგორ მიდიხართ, თუ ტრანსპორტით გიწევთ გადაადგილება, უმჯობესია არჩევანი მსუბუქ ეტლზე შეაჩეროთ, ხოლო თუ საკუთარი მანქანით მოძრაობთ, ან სეირნობა პარკებში და უსწორმასწორო ადგილებში გიწევთ, მაშინ მძიმე ეტლი შეიძლება უფრო მოსახერხებელი იყოს.
• ბორბლები – ბორბლები რეზინის, ან კაუჩუკის უნდა შეარჩიოთ. ზოგადად, რაც უფრო დიდია ბორბალი, მით უფრო მარტივად სამართავია ეტლი, თუმცა რა თქმა უნდა, ეს ეტლის წონაზეც მოქმედებს.
• პოზიცია – ყურადღება მიაქციეთ იმას, თუ რამდენი პოზიცია აქვს ეტლს. თუ ბავშვი პატარაა, დაწოლის რეჟიმი გამოგადგებათ.
• სათავსოები – ბავშვის ნივთები იმდენი გროვდება, რომ სათავსოებსაც მიაქციეთ ყურადღება.
• ქოლგა (ქოლგის ფანჯარა) – ეტლის ქოლგა მზიან და წვიმიან ამინდში საკმაოდ მოსახერხებელია, ასევე, დააკვირდით თუ აქვს ქოლგას პატარა ფანჯარა, საიდანაც თქვენს პატარას პერიოდულად დახედავთ.

დამატებითი კითხვების შემთხვევაში მოგვწერეთ facebook გვერდზე ან დაგვირეკთ 032 2 420842