როგორ ვივარჯიშოთ სახლში მარტივად?

გასულ წელს პანდემიის გამო მთელ მსოფლიოს მყისიერად მოუწია ყოველდღიური ცხოვრების შეცვლა და ახალ კალაპოტში გადასვლა. ფიზიკური და გონებრივი ჯანმრთელობისთვის აქტიური ცხოვრება უფრო მნიშვნელოვანი გახდა, ვიდრე ნებისმიერ სხვა დროს. ამასთანავე ვარჯიში გახდა უფრო რთულიც, რადგან სპორტული დარბაზები დაიხურა და არავინ იცის, როდის დავუბრუნდებით ცხოვრების ჩვეულ რიტმს.

ტრენერები და ფიტნესის მოყვარულები მთელ მსოფლიოში ცდილობენ გაერკვნენ, რა ბედი ელის ვარჯიშის კულტურას. ბევრს აინტერესებს, როგორ შეგვიძლია შევინარჩუნოთ ჯანმრთელობა ფიტნეს ცენტრების გარეშე. მას შემდეგ, რაც მივხვდით, რომ ძვირადღირებული და მასიური სპორტული დარბაზები კიდევ დიდ ხანს არ გაიღებოდა, დავიწყეთ იმაზე ფიქრი, თუ როგორ მიგვეღწია სასურველი შედეგისთვის მათ გარეშე.

ბოლოს როდის ივარჯიშეთ? სანამ პანდემია დაიწყებოდა დარბაზებს სტუმრობდით? ან იქნებ, გასულ შაბათ–კვირას ეზოში დარბოდით? ყოველ კვირას იწერთ სავარიჯშო აპლიკაციებს და ორშაბათობით იწყებთ ვარჯიშს, რომელსაც გაგრძელება არ უწერია? არ აქვს მნიშვნელობა წონის კლება გინდათ თუ უბრალოდ ტონუსში ყოფნა გსურთ, თუ ნამდვილად მზად ხართ კვირაში რამდენიმე საათი ვარჯიშს დაუთმოთ, ჩვენ მოგიყვებით როგორ უნდა გააეკოთოთ ეს სახლის პირობებში მინიმალური დანახარჯებით და მაქსიმალურად კომფორტულად.

ჩადეთ ინვესტიცია სპორტულ აღჭურვილობებში

სანამ აპლიკაციას გადმოწერთ ან ინტერნეტში ვიდეოებს მოძებნით, მანამდე დარწმუნდით, რომ ვარჯიშისთვის ყველა საჭირო ნივთი გაქვთ სახლში. მიუხედავად იმისა, რას ვარჯიშობთ, აუცილებლად დაგჭირდებათ სავარჯიშო ხალიჩა, ე.წ. „პარალონი“  და წყლის ბოთლი.

თუ მინიმალური თანხის დახარჯვას ფიქრობთ, მაშინ ისეთ წვრილმან აქსესუარებს გირჩევთ, როგორიცაა სავარჯიშო ბორბალი, რომელიც მკლავების, მხრებისა და მუცლის კუნთების დამუშავებაში დაგეხმარებათ, იოგას ბურთი, ფიტნეს რეზინები ან პილატესის რგოლი სხვადასხვა ვარჯიშებისთვის, ლახტი და სხვა სპორტული ნაკრებები.

ზოგი ფიქრობს, რომ დარბაზში სიარულისა და ტრენაჟორების გარეშე სასურველი შედეგის მიღწევა შეუძლებალია. რა თქმა უნდა, ისინი ცდებიან. მიზნის მისაღწევად მონდომება და ნებისყოფა სავსებით საკმარისია და თუ ამ ორს ზემოთ ნახსენებ აქსესუარებსაც შეაშველებთ, გპირდებით რამდენიმე თვეში ყველა შეამჩნევს თქვენი შრომის ნაყოფს.

თუ უკვე დიდი ხანია ვარჯიშობთ და აქამდე მოცემული „მსუბუქი“ რჩევები არ გამოგადგებათ, მაშინ თქვენთვის ტრენაჟორები გვაქვს, რომელთა მოთავსებაც თქვენსავე ოთახში შეგიძლიათ. სულერთია, რომელი სავარჯიშო მოწყობილობა გიყვართ - ველო ტრენაჟორი, ბილიკი თუ სტპერი ჩვენთან ნებისმიერ მათგანს იპოვით.

აღჭურვილობა გასაგებია, ახლა უფრო დეტალურად იმის შესახებ, თუ რითი დავიწყოთ და როგორ გავაგრძელოთ.

შეუთავსეთ ძალისმიერი ვარჯიშები კარდიო ვარჯიშებს

საუკეთესო ვარჯიშების კრებული აერთიანებს კარდიო და ძალისმიერ ვარჯიშებს. კარდიო ვარჯიშისთვის სახლის პირობებში იდეალურია სიარული, სირბილი, ხტუნვა, თხილამურები და ველოსიპედი. კუნთების მასის ასაშენებლად კი შეგიძლიათ გამოიყენოთ საკუთარი სხეულის წონა ან თუ ეს არ კმარა, დაიხმაროთ ჰანტელები, გირები, დისკი ან შტანგა. რაც შეეხება ვარჯიშებს, მონაცვლეობით აკეთეთ ჩაჯდომები, სტატიკური გაჩერება, იგივე „პლანკა“, აზიდვები და პრესის ვარჯიშები. კარდიო ვარჯიშები წონით ვარჯიშებთან ერთად მოგცემთ საუკეთესო შედეგს უმოკლეს დროში.

გადმოწერეთ აპლიკაციები ან დაესწარით ვიდეო ვარჯიშებს

დღესდღეობით უამრავი სავარჯიშო აპლიკაციაა, რომელიც რამდენიმე წამში შეგიძლიათ გადმოიწეროთ ტელეფონში ან უბრალოდ შეხვიდეთ Youtube-ზე და მოძებნოთ თქვენზე მორგებული ვიდეოგაკვეთილები. თქვენი ცხოვების სტილისა და ხასიათის მიხედვით შეარჩიეთ ცეკვები, იოგა, ქროსფიტი თუ სხვა. ამ ვიდეოების საშუალებით თქვენ აღმოაჩენთ სავარჯიშოების უამრავ იდეას სახლის პირობებში. Youtube ვიდეოები ერთ-ერთი ყველაზე სახალისო საქმეა წონის დასაკლებად. მარტივად მოძებნით ასევე მთელ რიგ ონლაინ მწვრთნელებსა თუ ფიტნეს საზოგადოებებს, რომლებსაც შეგიძლიათ შეუერთდეთ და ყოველთვიურად გარკვეული თანხა გადაიხადოთ. თუ კი სავარჯიშო პროგრამაში ან აქსესუარში ფულის გადახდა დაგენანებათ, არ დაგავიწყდეთ, რომ სპორტულ დარბაზებში სიარულის შემთხვევაში ყოველ თვე ისედაც საწევრო უნდა გეხადათ, ასე რომ ნუ დაინანებთ რამდენიმე ათეულ ლარს და მიიღეთ პერსონალური სავარჯიშო გეგმა და კვების განრიგი პროფესიონალებისგან.

არ დაგავიწყდეთ გახურება ვარჯიშამდე და გაჭიმვები ვარჯიშის შემდეგ

სახლში საუკეთესო ვარჯიშიც კი ჩავარდება, თუ დაივიწყებთ გახურებასა და გაჭიმვებს. რამდენიმე წუთის განმავლობაში კუნთებისა და სახსრების გახურება ვარჯიშის დაწყებამდე დაგეხმარებათ დაზიანებების თავიდან აცილებაში. ასევე აუცილებლად მოიმარაგეთ წყალი და დაიდგით ბოთლი ახლოს, რათა შესვენებების დროს პერიოდულად ცოტ–ცოტა წყალი დალიოთ. რაც შეეხება ბოლოს გაწელვებს, ბევრი მოვარჯიშე არ ითვალისწინებს ამ „პატარა დეტალის“ მნიშვნელობას და ჰგონიათ, რომ გაწელვები დროის ფუჭი კარგვაა. არამც და არამც! გინახავთ ვიდეოები, სადაც კარგად ჩანს, როგორ უწყდებათ კუნთები ან მყესები? ეს სწორედ იმის ბრალია, რომ გაჭიმვებს დროს სათანადოდ არ უთმობენ. არამარტო ვარჯიშის შემდეგ, ჩვენი რჩევა იქნება, რომ დღის ბოლოს დაწოლამდე ძირითადი კუნთები გაჭიმოთ. დაუთმეთ 30 წამი თითოეულ კუნთს და მაშინვე იგრძნობთ, როგორ „ისვენებს“ კუნთი. ეს რუტინა ადუნებს და ალამაზებს ნავარჯიშებ სხეულს.

ახლა, როცა უკვე გაქვთ სახლში ვარჯიშისთვის საჭირო საბაზისო ცოდნა, ვიმედოვნებთ, რომ მოტივირებული ხართ ვარჯიშის დასაწყებად. არ აქვს მნიშვნელობა რამდენად დიდი გზა გაქვთ გასავლელი სასურველ სხეულამდე ან რამდენად დამთრგუნველია გარემო თვენ გარშემო, გამამხნევებელია იმის ცოდნა, რომ შეგიძლიათ შეინარჩუნოთ ფიზიკური გამძლეობა, გონებრივი კეთილდღეობა და იმუნური სისტემა კვების დაბალანსებითა და რეგულარული ვარჯიშით სახლში ყოფნის დროსაც კი.

აქვე გთავაზობთ რამდენიმე უფასო აპლიკაციას

• Aqualert -გაძლევთ მოტივაციას დალიოთ წყალი რეგულარულად. თქვენი მონაცემების მიხედვით გამოთვლის წყლის რაოდენობას, რომელიც ყოველდღიურად გჭირდებათ და გამოგიგზავნით შეტყობინებებს დღის განმავლობაში, ინახავს მონაცემებს და გატყობინებთ თქვენს მიღწევებს.
• Lose Weight at Home in 30 Days - ასობით პროფესიონალური ვარჯიშით გეხმარებათ წონაში დაიკლოთ სწრაფად და უსაფრთხოდ. ასევე გთავაზობთ სწორი კვების უამრავ ფორმას. ინახავს მონაცემებს, გითვლით დამწვარ კალორიებს და გაჩვენებთ პროგრესს.
• Yoga for Beginner Free - Daily Workout at Home - გათვლილია ნებისმიერი ასაკის მომხმარებელზე. თქვენი შესაძლებლობებიდან გამომდინარე გთავაზობთ ვარჯიშებს, გეხმარებათ წონის კლებასა და ტონუსის შენარჩუნებაში.

თუ კი წამით მაინც რაიმე დაგეზარებათ და დანებებას გადაწყვეტთ, აუცილებლად გაიხსენეთ – რისთვის დაიწყეთ! მუდმივად იფიქრეთ მიზანზე, რომლისკენაც მიდიხართ და ეს ფიქრი მისკენ მიმავალ გზას აუცილებლად შეგიმსუბუქებთ. გისურვებთ წარმატებებს თქვენს ფიტნეს მოგზაურობაში!