რატომ უნდა ვასწავლოთ ბავშვს ლექსები?

ბავშვობაში ყველას გვასწავლიდნენ ლექსებს. ჩვენც დაუფიქრებლად ვიზეპირებდით მათ და ვყვებოდით ყველა შესაძლო შემთხვევის დროს. შემდეგ იგივეს ვიმეორებდით ჩვენს შვილებთან, მაგრამ ალბათ ცოტა ჩვენგანი თუ დაფიქრებულა სინამდვილეში რამდენი დადებითი თვისება აქვს ბავშვისთვის ლექსების შესწავლას. ხშირად მშობლები თავიანთი პატარებისთვის ზღაპრების ან ილუსტრირებულ წიგნებს ყიდულობენ, მაგრამ იცით თუ არა, რომ პოეზიაც ძალიან სასარგებლოა თქვენი შვილებისთვის? ბავშვებთან ერთად პოეზიის ხმამაღლა კითხვას შეიძლება ჰქონდეს სარგებელი, რომელიც წლობით გაგრძელდება.

მრავალი მიზეზი არსებობს, რის გამოც პოეზია მნიშვნელოვანია პატარა მკითხველებისთვის. კვლევებმა აჩვენა, რომ ლექსები ბავშვებს უბიძგებს კითხვისკენ, აყალიბებს ფონემატურ ცნობიერებას და ისეთ მნიშვნელოვან უნარებს, როგორიცაა ლექსიკა, თავისუფლად საუბარი, ემოციების გამოხატვა და წერა.

ფსიქოლოგები რეკომენდაციას უწევენ პოეზიას ადრეული ასაკიდანვე. დღეს შემოგთავაზებთ 6 სასარგებლო თვისებას, რაც ბავშვებს ლექსების სწავლის შედეგად უვითარდებათ.

1. მეხსიერების გაუმჯობესება

ერთ–ერთი საუკეთესო თვისება, რასაც ბავშვს ლექსების სწავლა სძენს, არის კარგი მეხსირების უნარი. შესაძლოა პატარა თავიდან ვერ ხვდებოდეს შესწავლილის შინაარს, ეს არც არის აუცილებელი, მთავარია დაზეპირების პროცესი წარიმართოს წარმატებულად. კვლევებმა აჩვენა, რომ მათ, ვისაც ბავშვობაში ლექსებს ასწავლიდნენ, შემდეგ წლებში ადვილად შეეძლოთ წაკითხულისა თუ მოსმენილის დამახსოვრება, უფრო მეტიც, ასაკის მატებასთან ერთად მეხსიერების გაუარესება არ აღენიშნებოდათ.

2. მეტყველება

როგორც ვთქვით, შეიძლება ბავშვს ლექსის შინაარსი არ ესმოდეს, მაგრამ ის მაინც სწავლობს სიტყვებს, იმდიდრებს ლექსიკას და, რაც მთავარია, უადვილდება აზრებისა და ემოციების გამოხატვა. გარდა ამისა იგი ხდება მეტად შემოქმედებითი. სცადეთ ბავშვთან ერთად ჩართოთ ფანტაზია და შექმნათ საკუთარი რითმები, გამოიყენეთ მხატვრული ენა ან გამოხატეთ ისეთი გრძნობები როგორიცაა სიხარული, მწუხარება, სიყვარული და ა.შ. ეს დაგეხმარებათ თქვენ და თქვენს პატარას შემოქმედებითი და მეტყველების უნარის განვითარებაში. როგორც ლოგოპედები ამბობენ, სიტყვებითა და ბგერებით თამაში ხელს უწყობს ვოკალური აპარატის განვითარებასა და ენის გატეხვას.

3. ეხმარება სამყაროს აღქმაში

პოეზია, როგორც ლიტერატურული ნაწარმოები ეხმარება ბავშვს ესთეტიური განათლების მიღებასა და სამყაროს უფრო მეტი გრძნობებით აღქმაში. უამრავი, თუნდაც საბავშვო, ლექსი არსებობს, რომლებსაც გამორჩეულად მუსიკალური რითმა, მაღალფარდოვანი აღწერა–დახასიათებები აქვს. ასევე ზოგიერთ ლექსში მოთხრობილია სიუჟეტი, რომელიც ეხმარება ბავშვს სოციალური ურთიერთობების, ფლორისა თუ ფაუნის შესწავლაში.

4. ემპათია

პოეზია ბავშვებისთვის არის გრძნობების გამოხატვის ჯანსაღი გზა, განსაკუთრებით ემოციურად რთულ სიტუაციებში. ის ეხმარება მათ გაერკვნენ როგორც საკუთარ თავსა და გრძნობებში, ასევე სხვების ემოციებში, რაც უვითარებს მათ ისეთ ღირებულებებსა და თვისებებს, როგორიცაა თანაგრძნობა და თანადგომა.

5. ფანტაზია

ლექსებს ბავშვები გადაჰყავს სხვადასხვა, მათთვის საინტერესო სამყაროში. თითოეული სტროფი შესაძლოა თქვენი შვილისთვის აღმოჩნდეს ახალი ფანტაზიის წყარო.

6. შემოქმედებითი უნარი

პოეზია ავითარებს შემოქმედებით უნარს არაერთი მიმართულებით. ბავშვები, რომლებსაც რითმის აღქმის უნარი კარგი აქვთ, ხშირად უკეთეს მკითხველებად და, რაც მთავარია, კარგ მწერლებად ყალიბდებიან. რითმაზე ფოკუსირება ეხმარება მათ სიტყვების სხვადასხვა ვარიაციების მოფიქრებაში, ამდიდრებს ლექსიკას და სძენს მათ მხატვრულ უნარებს.

კარგად შერჩეული ლექსები შეიძლება ბავშვისთვის აღმოჩნდეს შთაგონების წყარო და ისინი თავად გახდნენ კარგი მწერლები.

ლექსების წერა და კითხვა ნებისმიერ ასაკში სასიკეთოა. მას უამრავი სარგებელი მოაქვს. პოეზიის, როგორც საგანმანათლებლო ინსტრუმენტის გამოყენება ბავშვებში იძლევა შედეგებს, რომლებიც წლობით დაეხმარება თქვენს შვილს არაერთ სოციალურ აქტივობასა და შემოქმედებით პროცესში.

გადაავლეთ თვალი საბავშვო წიგნებს ჩვენს საიტზე.