ვის რა ვაჩუქოთ? საჩუქრების მაძიებელთა პრაქტიკული გზამკვლევი

წელს განსხვავებული ახალი წელი გვაქვს. პანდემიის გამო დიდ ლხინ-ნადიმებსაც უნდა მოვერიდოთ და არც სადმე წასვლის და მეგობრებთან ერთად რუზრუზის შესაძლებლობა გვექნება. რას ვიზამთ... შეზღუდვების მიუხედავად, ახალი წელი მაინც მოვა და სულ მთლად რომ არ ჩავიძიროთ მოწყენილობის ჭაობში, ძალები უნდა მოვიკრიბოთ და საკუთარ თავსაც შევუქმნათ სადღესასწაულო განწყობა და ახლობლებსაც. ხასიათის მოჩიტიანების საუკეთესო საშუალება საჩუქრებია! ვის არ უყვარს საჩუქრები! მიღება ცალკე სიამოვნებაა, გაცემა – ცალკე.  

ადრე, მაღაზია-მაღაზია წანწალისას, რაღაცას მოჰკრავდი თვალს, მოგეწონებოდა და იყიდდი, ან მიზანდასახულად გაემართებოდი და უკვე შეგულებულს შეიძენდი. ამ პირობებში როგორ მოვიქცეთ? როცა ვერც ვერსად გავდივართ და არც ფანტაზია გვაქვს ნამეტნავად მოზვავებული? ნემსები, მახათები, პაპიროსის ქაღალდები, ნარმა, მიტკალი, რა გინდა, მითხარი?!

ახლავე შეგიმცირებთ საფიქრალს და ჩამოგიწიკწიკებთ საჩუქრების სიას ნებისმიერი ასაკისა და სქესის ადამიანისთვის.

მაშ ასე:

მათთვის, ვისაც თოვლის ბაბუასი სჯერა

ვის უხარია ახალი წლის მოსვლა ისე, როგორც ბავშვებს? დღეებს ითვლიან, ცმუკავენ, თოვლის ბაბუას საჩუქრების სიებს უწერენ, ბუხარში ასძახიან თავის სურვილებს. ეს თოვლის ბაბუები კიდევ, ამ კორონას გამო, დიდ გასაჭირში არიან. ფრენების პარალელურად მარხილების მიმოსვლაც შეჩერებული ყოფილა და რა ქნას ახლა იმ პატიოსანმა კაცმა? როგორ მოაგროვოს ამდენი საჩუქარი? დროა, ონლაინშესყიდვაზე გადაერთოს ისიც. დიახ, დიახ, თოვლის ბაბუასაც კი შეუძლია ონლაინ შეიძინოს ყველაფერი – სამაგიდო თამაშები, რბილი და ხის სათამაშოები, სკუტერები და ველოსიპედები, მანქანები და კონსტრუქტორები, ჭურჭელი, ინსტრუმენტები, მოკლედ, ყველაფერი. არც აქეთ-იქით სირბილი მოუწევს და არც მარხილზე ჯანჯღარი. შეუკვეთავს, მერე კი დაჯდება, გადაიდებს ფეხს ფეხზე და მშვიდად დაელოდება ახალი წლის მოსვლას. სათამაშოები ნიდოზე

ოჯახის მუჭუჭებისთვის

ამ კატეგორიის ახლობელი დიდად მადლიერი დაგრჩებათ, თუ არჩევანს საოჯახო ტექნიკაზე შეაჩერებთ. სადღესასწაულოდ სახლს ახალი მტვერსასრუტით რომ გამოასუფთავებს, გოზინაყის თაფლს ახალ გაზქურაზე აათუხთუხებს, საცივს ახალ მაცივარში ჩააციებს, საახალწლო ფილმებს ახალ ტელევიზორში უყურებს და ახალი წლის დილას ახალი ყავის აპარატიდან რომ ჩამოისხამს ყავას, გიჟია, არ მოეწონოს? ცხადია, იტყვის, ახალი წელი ჩემთვის ასე არასოდეს დაწყებულაო. საოჯახო ტექნიკა ნიდოზე

სუფრის ლამაზად გაწყობის მოყვარულთათვის

თუ ადამიანს სუფრის გაშლა ხელოვნების დონეზე აქვს აყვანილი და უყვარს თავისი შედევრით სტუმრებთან თავის მოწონება, შეგიძლიათ ქართული ტრადიციული სუფრა აჩუქოთ. ხარისხიანი ჭურჭელიც იმგვარი საჩუქარია, არასოდეს რომ არაა ზედმეტი და ყოველთვის გამოადგება. მაგალითად, საახალწლოდ ქართული მოტივებით გაფორმებულ ულამაზეს თეფშებს თუ მიუტანთ, ნახავთ, აუცილებლად დააკოსებს სადღესასწაულო სუფრაზე. თუ არ გჯერათ, შეამოწმეთ.  BlueTabla ესკლუზიურად ნიდოზე

პრანჭიებისთვის

მარტო ჭამა-სმა დიდად შესარგი ხომ არაა საქმე. სიკოხტავეზეც ხომ უნდა ვიზრუნოთ? თუ თქვენი ახლობელი გემოვნებიანი ადამიანია და განსხვავებული აქსესუარები ხიბლავს, ქართული თემატიკის უმშვენიერესი შარფი შეგიძლიათ მიართვათ, ჟაკლინ კენედისავით მოიხდენო, დასძინოთ. ან ორიგინალური საათით გაახაროთ – შენს ნაზ და სათუთ ხელს აბრეშუმის სამაჯურიანი საათი დააკვდებაო. BlueTabla ესკლუზიურად ნიდოზე

მელომანებისთვის

თქმა არ უნდა იმას, რომ მელომანებს სიხარულით იმ შემთხვევაში ააჭყლოპინებთ, თუ საყვარელი შემსრულებლის ფირფიტას უსახსოვრებთ. იმას, დიდი ხანია რომ უნდოდა. თუ გინდათ, სულ გადაიყვანოთ ჭკუიდან, ფირსაკრავი აჩუქეთ. ამას არასოდეს დაგივიწყებთ. დიდად მადლობელი დაგრჩებათ იმ შემთხვევაშიც, თუ მაღალი ხარისხის დინამიკს, ან ყურსასმენს მიართმევთ. ფირსაკრევები და ფირფიტები ნიდოზე

სამკაულების მოტრფიალეებისთვის

სამკაული იმგვარი რამაა, ყოველთვის რომ ახარებს ადამიანს მისი მიღება. ცხადია, თუ მის გემოვნებას შეესაბამება. ზოგს სადა ნივთები მოსწონს, ზოგს – ბრჭყვიალა ბაღჩები, ზოგს ეთნო და ისტორიული მოტივები იზიდავს, ზოგიც თვლის, რომ ბრილიანტები გოგოს საუკეთესო მეგობარია. შეგვიძლია გირჩიოთ უძველესი ქართული სამკაულების ასლები – უმაღლესი ხარისხის ნაკეთობა და მართლაც ღირებული სახსოვარი. ასევე, რეკომენდაციას ვუწევთ ქართველი მეფეების მოჭრილი მონეტების მიხედვით დამზადებულ ვერცხლის გულსაკიდებს. ეს სამკაულები იმ შემთხვევაშიც გამოგადგებათ, თუ უცხოელი გყავთ დასასაჩუქრებელი და სიმბოლური დატვირთვის ძღვენს ეძებთ. BlueTabla ესკლუზიურად ნიდოზე

წიგნის ჭიებისთვის

ამბობენ, წიგნი ყველაზე კარგი საჩუქარიაო. თუ ამ მოსაზრებას ეთანხმებით და წიგნზე შეაჩერებთ არჩევანს, შეგიძლიათ საუკეთესო გამოცემები ონლაინ შეიძინოთ – მხატვრული ლიტერატურა, საბავშვო და უცხოენოვანი წიგნები, მხატვრების ალბომები, თემატური და პროფესიული ალბომები – არქიტექტურა, დიზაინი, ფოტოგრაფია, ისა, ესა. ოჰ, ოჰ, წარმოიდგინეთ, პრიალა და ტკიცინა ალბომს რომ გადაშლი და იქიდან ახლად დაბეჭდილი წიგნის სურნელი ამოიფრქვევა – მეტი კი არაფერი უნდა წიგნის მოყვარულსა და დამფასებელს.  

უცხოენოვანი წიგნები ნიდოზე

გარეგნობაზე მზრუნველებისთვის

საახალწლოდ ყველა ვცდილობთ, ლამაზად და 10 წლით ახალგაზრდად გამოვიყურებოდეთ. ვწესრიგდებით, ვიხეხებით, ვივარცხნებით, ვიღებებით... არავის აწყენს იმგვარი საჩუქარი, გალამაზებაში რომ დაეხმარება. მას, ვინც წვერს უვლის, წვერის საკრეჭი გამოადგება, ვინც იპარსავს – წვერსაპარსი. ჭარბთმიანობას თუ არ ებრძვის და ხუჭუჭა თმა ურჩევნია, არც ეპილატორი დასჭირდება და არც თმის უთო, ამიტომ კბილის ელექტრო ჯაგრისი აჩუქეთ, კბილებს ხომ აუცილებლად გაიხეხავს. სილამაზის ტექნიკა ნიდოზე

ტელეფონებს მიჯაჭვულებისთვის

იმ ვითარებაში, როცა ტელეფონი ჩვენი პური და ყველია, როცა მჯობნის მჯობნი არ ილევა და ძველის ახლით ჩანაცვლება არასოდესაა ზედმეტი, გადასარევი საჩუქარია ტელეფონი. უსარგებლო რამეს, რასაც არასოდეს გამოიყენებს, მოიბეზრებს და მალევე მიაგდებს, ტელეფონი აჩუქოთ, აჯობებს. წინასწარ შეეგუეთ, რომ მერე სოცქსელებში გამოგაჭენებთ – „ნახეეეეეეთ, ჩემმა სანტამ სურვილი ამისრულა და ჩემი ოცნების ტელეფონი მაჩუქაააააააა!!!“

მობილურები ნიდოზე

და ბოლოს, საყველაო

თუ არჩევანის გაკეთება გიჭირთ, არ იცით, რა სჭირდება ადამიანს, რა გაუხარდება, რას უფრო გამოიყენებს, ან ბოლოს და ბოლოს, კორონას გამო პირადად ვერ მოახერხებთ სტუმრობას და ადგილზე ვერ მიართმევთ საჩუქარს, შეგიძლიათ „ნიდოს“ სასაჩუქრე ბარათი გადასცეთ და მერე თვითონ აირჩევს იმას, რაც გაუხარდება.