ვინილი მოკვდა! გაუმარჯოს ვინილს!

იყო დრო, ბიტლების, ან როლინგების „პლასტინკას“ თუ იშოვიდი, მაგარი ტიპი იყავი. ცისფერი, თხელი, გამჭვირვალე ფირფიტები გახსოვთ? ცალ მხარეს რომელიღაც საბჭოთა ვოკალურ-ინსტრუმენტული ანსამბლის სიმღერა რომ იყო ჩაწერილი და მეორე მხარეს – მაგალითად, ზეპელინების, ან რამე კარგი ჯგუფის ერთი ტრეკი. მერე კასეტები გაჩნდა, ფანქრით გადახვევაც ვისწავლეთ და ფრჩხილის ლაქით ლენტის დაწებებაც. კასეტები დისკებმა ჩაანაცვლა და მოიბეზრა ხალხმა მამაპაპური ვინილები. ყრიდნენ, რამეთუ ადგილს იკავებდა და მტვერს აგროვებდა, უფრო კრეატიულები და მოცლილები ადნობდნენ და ქოთნებს აკეთებდნენ. თითქოს, ციფრულ ფორმატს საბოლოოდ უნდა დაესამარებინა ფირფიტების კულტურა, მაგრამ ნურას უკაცრავად. რაც დრო გადის, ვინილები სულ უფრო მოდური ხდება. უკვე წლებია, ფირფიტების გაყიდვების ტემპმა ქორივით ჩაუქროლა და გადაუსწრო ციფრულ გაყიდვებს. გგონიათ, გაყიდვების გაზრდა უფროსი თაობის ნოსტალგიებითაა გამოწვეული? არაფერიც. მყიდველები ძირითადად ახალგაზრდები არიან. ფირფიტას „პლასტინკას“ აღარავინ უწოდებს. „პლასტინკა“ „ვინილი“ გახდა და ვინილების მსმენელი და შემგროვებელი გემოვნებიან და დახვეწილ ადამიანთან ასოცირდა.

რატომ გახდა ფირფიტები ისევ პოპულარული და რატომ ეძებს ხალხი ფირსაკრავებს გამწარებული? ის ამბავია, რომ ყველაფერი ახალი კარგად დავიწყებული ძველია, თუ აქვს მართლაც ამ ვინილებს რაღაც თავისებური, განსაკუთრებული ხიბლი, ასე რომ აჯადოებს მელომანებს და არა მხოლოდ მათ?

ჩამოგითვლით ხუთ მიზეზს, რატომ შეიძლება გახდეს ვინილების მოსმენა/შეგროვება ინტერესის სფერო, საყვარელი ჰობი, და ბოლოს, ცხოვრების სტილი.

1. ვინილის ჟღერადობა ციფრულისას სჯობს

ნებისმიერი მელომანისთვის ფირფიტის მთავარი უპირატესობა ჟღერადობაა. ციფრული ფორმატი ხარისხს აფუჭებს, თან საგრძნობლად. მარტივად რომ ვთქვათ, გაციფრულების შემდეგ ბგერას ჟღერადობა და სიღრმე ეკარგება და უფრო ბრტყელი და ზედაპირული ხდება. შეიძლება ეს სხვაობა არაპროფესიონალისთვის შეუმჩნეველი იყოს, მაგრამ აუდიოფილები ფირფიტის განსხვავებულ, თბილ და ღრმა ბგერას არაფერზე გაცვლიან. სხვა ყველა ხმა მათთვის ტაშტის ხმაა.

2. ფირფიტები აუმჯობესებს მუსიკალურ გემოვნებას

თუ მუსიკას ვინილებით უსმენ, ეს უკვე ავტომატურად იმას ნიშნავს, რომ კარგი მუსიკალური გემოვნება გაქვს. პატარა ექსპერიმენტს შემოგთავაზებთ: გადადით და გადახედეთ ნიდოს ფირფიტების განყოფილებას. ნახეთ, თუ იპოვით „ფინქ ფლოიდის“, მაილს დევისის, ბობ დილანის საუკეთესო ალბომებს. დიახ, იპოვით (სცადეთ, თუ არ გჯერათ). აი, ჯასტინ ბიბერს კი ნამდვილად ვერ აღმოაჩენთ. არა, ვინმეს გემოვნებას კი არ ვაკნინებთ, უბრალოდ ეკონომიკის ელემენტარული წესებია – ფირფიტების მსმენელები უფრო დახვეწილ მუსიკას ითხოვენ და შესაბამისად, ხმის ჩამწერი სტუდიებიც გემოვნებიანი მუსიკოსების ვინილებს უშვებენ.

3. შეგიძლია ფული გამოიმუშავო

ვინილები დღესდღეობით ერთ-ერთ საუკეთესო ინვესტიციად არის აღიარებული. ფირფიტების, განსაკუთრებით კი მაღალი ხარისხის, ან საკოლექციო ეგზემპლარების ფასი წლიდან წლამდე მატულობს. 10 წლის წინ ფირფიტების მოკრძალებული კოლექცია რომ შეგექმნათ, დღეს მისი ფასი სამჯერ მეტი იქნებოდა. ეს კი ოქროზე კარგი კაპიტალდაბანდებაა.

4. ვინილი მუსიკალური აღმოჩენების გაკეთების შესაძლებლობაა

ფირფიტის კიდევ ერთი უპირატესობა მსმენელის მუსიკალური თვალსაწიერის გაფართოებაა. ვინილის თავისებური ხიბლია ის, რომ ფირფიტას თავიდან ბოლომდე უნდა მოუსმინო, სიმღერიდან სიმღერაზე გადახტომის გარეშე, რაც საშუალებას გაძლევს, ახალ-ახალი აღმოჩენები გააკეთო. თანამედროვე ციფრულ სამყაროში დაგვავიწყდა, რას ნიშნავს ერთი ალბომის თავიდან ბოლომდე მოსმენა. მხოლოდ ცალკეულ, გაჰიტებულ სიმღერებს ვუსმენთ და ბევრი კომპოზიცია უყურადღებოდ გვრჩება. ამ დროს, ალბომის სრულად მოსმენის შემთხვევაში, ბევრ უფრო ღრმა და საინტერესო, საყოველთაო აღიარების მიღმა უსამართლოდ დარჩენილ სიმღერას აღმოაჩენ, უკან რომ ჩამოიტოვებს ატაცებულსა და გაპიარებულს, პირველი მოსმენით რომ ვერ დაამუღამებ, მერე კი დაუკვირდები, მიაყურადებ, აიკვიატებ და უსმენ და უსმენ უსასრულოდ.

5. ვინილი ნივთი არაა. ეს ცხოვრების სტილია

ფირფიტის ჩასადებიდან ამოღება, ფირსაკრავზე განთავსება, ნემსის დადება ერთგვარი რიტუალია. ვინილების შეძენა აზარტულიცაა – როცა რაღაცას პოულობ, დიდხანს რომ ეძებდი, განსაკუთრებული სიხარული გიპყრობს. როგორც ვინილომანები ამბობენ, ვინილს პატივისცემით უნდა მოეპყრა, მოუარო, გაწმინდო, შეინახო. შედეგად, სხვაგვარი ემოციური კავშირი გიჩნდება მასთან და ის აღარაა ერთი ჩვეულებრივი ნივთი, მაგალითად, დისკი, რომელსაც მიაგდებ მანქანაში და აღარც გაგახსენდება. ვინილი გიყვარს, უვლი და საბოლოოოდ, ის შენი ცხოვრების განუყოფელი ნაწილი ხდება.

თუ დაინტერესდი, რა არის ამისთანა, ამდენი ხალხი რომ გადაირიაო, შედი აქ ფირსაკრავებისა და ოფიციალური ფირფიტების საუკეთესო არჩევანი დაგხვდება.