არსებობს თუ არა ბედნიერების მომტანი ინტერიერი?

ადრე, „ხრუშჩოვკებისა“ და სხვა საბჭოური კორპუსების ეპოქაში, ინტერიერის დიზაინს ბევრი არავინ აქცევდა ყურადღებას. „ზალაში“ დადგამდი „სტენკას“, დაკიდებდი ჩეხური „ხრუსტალის“ „ლუსტრას“, დადგამდი ტელევიზორ „ივერიას“ და იყავი არხეინად. ერთადერთი საზრუნავი ის გრჩებოდა, ტელევიზორის ანტენა გეტრიალებინა მუდმივად, რომ რომელიმე არხი დაგეჭირა. მერე ქვეყანა შეიცვალა, გავიზარდეთ, დავიხვეწეთ, თვალსაწიერი გავიფართოეთ და სხვა ათას სიკეთესთან ერთად, ინტერიერის დიზაინითაც დავინტერესდით. 

ამ ბლოგპოსტში ინტერიერის დიზაინის ტენდენციებს არ ჩავუღრმავდებით. ზოგს სკანდინავიური ტიპის ინტერიერი მოსწონს, ზოგს – „ბოჰო“ სტილის ფერადოვნება, თუმცა, როგორც აღმოჩნდა, ინტერიერს არა მხოლოდ ესთეტიკური სიამოვნების მონიჭება, არამედ ადამიანის მენტალური ჯანმრთელობისა და ზოგადი კეთილდღეობის გაუმჯობესებაც შეუძლია. სწორედ ამ მიმართულებას ავითარებენ „ფენ შუის“, უძველესი ჩინური სისტემის, მიმდევრები. ამ საქმის პროფესიონალები გვარწმუნებენ, რომ სივრცის განაწილებით, ოთახში ნივთების განლაგებით, ფერებით, ფორმებით, განათებით, დეკორით, შესაძლებელია არა მხოლოდ განწყობის ამაღლება, არამედ იღბლის, წარმატების, ბედნიერების, სიმდიდრისა და სიყვარულის მოტანა. „ფენ შუის“ ტექნიკა საცხოვრებელ სივრცეში ბალანსის დამყარებასა და დადებითი ენერგიის მოზიდვაში გვეხმარება. 
ახლა იმის ახსნა რომ დავიწყოთ, საძინებელი სამხრეთით უნდა იყოს, თუ ჩრდილოეთით, ძალიან შორს წავალთ, ამიტომ მხოლოდ იმ მარტივ რჩევებს გაგიზიარებთ, რომელთა გამოყენებაც არსებულ საცხოვრებელ სივრცეში შეგიძლიათ. 

1. უმთავრესი წესი, „ფენ შუის“ გარეშეც რომ უნდა დავიცვათ
სახლი უნდა იყოს სუფთა და დალაგებული. არეულობა იზიდავს სტრესს, დეპრესიას, მოწყენილობასა და ათას ჯანდაბას და დოზანას. მტვერი სტაგნაციის ნიშანია. მტვრიან, არეულ ოთახებში სასიცოცხლო ენერგია ვერ ჩქეფს და ჩვენც ვჭკნებით, ვდნებით და ვიმჩვარებით. 

2. შემოსასვლელი
პირველ რიგში, მიაქციეთ ყურადღება, რომ შემოსასვლელი კარი და ჰოლი არ იყოს ჩახერგილი.  შემოსასვლელი სახლის არტერიაა, ამიტომ აუცილებელია, იყოს სუფთა, ნათელი და შეძლებისდაგვარად, ფართო. ბინაში და ზოგადად, ყველა ოთახში, სწორედ შემოსასვლელიდან შემოედინება და ნაწილდება სასიცოცხლო ენერგია. თუ დაახვავებთ ტალახიან ფეხსაცმელებს, ქურთუკების მთებს, გასატანი ნაგვის პარკებს და შემოსვლისას ნივთების ბარიერების დაძლევა მოგიწევთ, მორჩა, წასულია თქვენი საქმე. კარგი იქნება, თუ ფოტოებსაც დაკიდებთ. განსაკუთრებით სასარგებლო მოგრძო ფორმის სურათები ყოფილა.  

3. მისაღები
ნუ გაავსებთ მისაღებს ავეჯით. დატოვეთ თავისუფალი სივრცე. თუ მოშვებული ხართ და ენერგიის ნაკლებობას უჩივით, მწვანე დივანი შეიძინეთ, ან კედლები გადაღებეთ მწვანედ. ეს ფერი სიცოცხლისა და ენერგიის სიმბოლოა და დადებითად დაგმუხტავთ. მისაღებში რეკომენდებულია მცენარეების განთავსება. ამით კეთილდღეობას, სიკეთესა და გამრავლებას მოიზიდავთ. ბოტანიკური ბაღის გაშენება არაა საჭირო. რამდენიმეც საკმარისია. ხალიჩის, ან ფარდაგის დაფენა ოჯახის მთლიანობის შენარჩუნებაში დაგეხმარებათ.

4. საძინებელი
საძინებელზე ძალიან მკაცრი წესები მოქმედებს, რადგან ესაა ოთახი, სადაც უნდა დავისვენოთ და განვიმუხტოთ. აქ უნდა დაგვხვდეს სიმშვიდე და ჰარმონია, სიყვარული და სექსი (სასურველია, ასევე ჰარმონიული). ჯერ საწოლის შერჩევით დავიწყოთ. ლოგინს აუცილებლად უნდა ჰქონდეს მყარი საზურგე და უსათუოდ კედელთან უნდა იყოს მიდგმული. არ დადგათ საწოლი ფანჯრის ქვეშ. ანუ, როცა გძინავთ, თქვენი თავი ფანჯრის ქვეშ არ უნდა მოექცეს. ლოგიკა იმაშია, რომ დასვენებისას გონებასა და სხეულს მხარდაჭერა და გარეგანი ზემოქმედებისგან დაცვა სჭირდება. ლოგინი განათავსეთ ისე, რომ კარს ხედავდეთ. ამგვარად პოზიტიურ ენერგიას შემოუშვებთ თქვენში. თუ თავს არასტაბილურად გრძნობთ, ან თქვენი ურთიერთობები მორყეული კბილივით ყანყალებს, აარჩიეთ მუქი, ხის ავეჯი. საწოლის გარშემო ენერგიამ უნდა იცირკულიროს, ამიტომ ნუ დაასაწყობებთ მის ქვეშ რაღაცებს და ნუ აქცევთ მტვრის ბუდედ. თუ მარტოხელა ხართ, ან დაოჯახებაზე ოცნებობთ, ლოგინი კედელს არ მიადგათ. ამით სიმბოლურად დაბლოკავთ და თქვენ გვერდით დაძინების პერსპექტივას მოუსპობთ პოტენციურ პარტნიორებს. ჰო, კიდევ ერთი. დაივიწყეთ ლოგინში მუშაობა, საწოლში ძილის წინ სერიალების ყურება და მერე კომპიუტერის იქვე მიგდება. ეს დაანგრევს სიმშვიდეს თქვენს ცხოვრებაში.

5. კაბინეტი
სამუშაო ოთახში კარისკენ ზურგშექცევით არ უნდა ისხდეთ (ეს წესები ოფისზეც მოქმედებს). ეს გადამწყვეტია თქვენი წარმატებისთვის. გამოიყენეთ საზურგიანი სკამი. ეს არის ნიშანი, რომ კარიერაშიც მხარდაჭერა გექნებათ. თუ ვერ კონცენტრირდებით, დაიდგით მეტალის რაიმე ნივთი, ან კედელი შეღებეთ ვერცხლისფრად. თუ სულ დასტრესილი ხართ, ნეიტრალურ და ბუნებრივ კრემისფერებს და მოყავისფროებს მიეძალეთ.

6. სააბაზანო
აქ ძაან ჩახლართული ამბავია. მიიჩნევა, რომ გამდინარე წყალს სიმდიდრე მიაქვს, ამიტომ უნიტაზს ყოველთვის დაახურეთ თავსახური. ონკანთან დადგით ყვავილი, რადგან მცენარე წყლით იკვებება და გამდინარე წყლის მავნე ზეგავლენას გაანეიტრალებს. სარკეები სულ სუფთად შეინარჩუნეთ და იმგვარად დაკიდეთ, რომ შიგ უნიტაზი არ ირეკლებოდეს. 

7. სამზარეულო
სამზარეულო არის კეთილდღეობისა და სიმდიდრის სიმბოლო, ამიტომ ეცადეთ, რომ სამზარეულოს კარი სააბაზანოს კარს არ უყურებდეს (სიმდიდრე რომ არ გაედინოს, ასე ვთქვათ). იმგვარად დაგეგმეთ სივრცე, რომ წარამარა კუთხეებს არ ეჯახებოდეთ. საუკეთესო ფერი სამზარეულოსთვის? თეთრი. გაზქურა დღეში ერთხელ მაინც გამოიყენეთ. თუნდაც იმისთვის, რომ წყალი აადუღოთ. ეს ენერგიის გააქტიურებაში დაგეხმარებათ. ერთმანეთისგან მოშორებით განათავსეთ ბუნებრივად შეუთავსებელი ორი დაპირისპირებული სტიქიის სიმბოლო – ნიჟარა და ღუმელი, ანუ ცეცხლი და წყალი.  

8. სიმბოლოები
დეკორაციებად გამოიყენეთ იღბლიანობისა და ბედნიერების მომტანი სიმბოლოები. მაგალითად, მიიჩნევა, რომ ცხოველების ფორმის ნივთებს იღბალი შემოაქვს სახლში. კუ დღეგრძელობას ნიშნავს, ლომი ავ სულებს განდევნის, ოქროს გომბეშო ფულს მოგიტანთ.

9. ნახატები და ხელოვნების ნიმუშები
დიდი ნახატები და ხელოვნების ნიმუშები არასოდეს დაკიდოთ იმ ადგილების თავზე, სადაც ადამიანები წვანან, ან ისვენებენ. არა იმიტომ, რომ გრენლანდიასავით თავში არ დაეცეთ. ეს მოუსვენრობისა და შფოთვის შეგრძნებას იწვევს. ინტერიერში წარმოდგენილი ნებისმიერი ხელოვნების ნიმუში უნდა ტოვებდეს პოზიტიურ, დამამშვიდებელ შთაბეჭდილებას. ნუ დაკიდებთ ნამუშევრებს, რომლებიც იწვევს მწუხარების, ან ტკივილის გრძნობას. 

10. ზოგადი რჩევები
მაინცდამაინც სასაფლაოებთან ნუ იყიდით ბინებს. მით უმეტეს – ხედით სასაფლაოზე. 
არ შეინახოთ გატეხილი ნივთები.
უპირატესობა მიანიჭეთ ბუნებრივ ფორმებს. მთლად მრგვალი და ოვალური ვერ გექნებათ ყველაფერი, მაგრამ ძალიან კუთხოვან ავეჯსაც ნუ შეიძენთ. 
გადაყარეთ, ან გააჩუქეთ ტანსაცმელი, რომელსაც არ იყენებთ. კარადის მთლიანად გამოტენის ნაცვლად, ყოველთვის დატოვეთ იქ თავისუფალი სივრცე. ამით თქვენ მიანიშნებთ სამყაროს, რომ გაქვთ ადგილი და მზადყოფნა თქვენს ცხოვრებაში სიახლეების შემოსატანად.   

და ბოლოს, თქვენს იღბალსა და ბედნიერებას მარტო უნიტაზის თავსახურის დახურვა-გაღებას ნუ მიანდობთ. ნურც იმას იტყვით, აი, თურმე ოჯახი იმიტომ დამენგრა, საწოლი კედელთან მქონია მიდგმულიო. გომბეშოს იმედადაც ნუ დარჩებით, აქაოდა ფულს მომიტანსო. ყოველთვის გვახსოვდეს, რომ ჩვენს ბედ-იღბალს თავადვე განვაგებთ და ნივთების დახმარების გარეშეც შეგვიძლია ცხოვრების უკეთესობისკენ შეცვლა.