ყურის ტკივილი ბავშვებში

ბავშვის ცხოვრების პირველ წელს, შუა ყურის ანთება ძალიან ხშირად გამოვლინდება. ეს განპირობებულია ანატომიური თავისებურებებით. ჰაერით სავსე ღრუ, ანუ შუა ყური, დაფის აპკსა და შიგნითა ყურს შორის მდებარეობს და მისი ანთება ხშირად თან სდევს ჩვეულებრივ გაციებას.

ყურის ანთების დროს, სასმენ ლულაში (ევსტაქის მილში) არსებული ლორწოვანი გარსი დიდდება და გამოჰყოფს ანთებით გამონადენს.  პატარა ბავშვებში სასმენი მილი ჯერ კიდევ ძალიან ვიწროა და სწრაფად ივსება გამოყოფილი სეკრეტით,რომელშიც ცხვირ-ხახიდან გადმოსული ბაქტერიები მრავლდებიან და იწვევენ შუა ყურის ანთებით პროცესს.

სიმპტომები:

• ყურის მუდმივი ტკივილი
• მადის დაკარგვა
• უგუნებობა
• სურდო
• ტემპერატურის მომატება

რა შველის პატარებში ყურის ტკივილს?

• ყურის ანთებისათვის განკუთვნილი წვეთები
• ბევრი სითხე – როგორც ყველა სხვა დაავადებისას, ამ დროსაც უნდა უზრუნველვყოთ ჩვენი პატარა სათანადო რაოდენობის სითხით.
• ხახვიანი საფენი -იყენებენ ტკივილის შესამსუბუქებლად სახლის პირობებში (იხილეთ აქ)
• ცხვირის წვეთები – თანმხლები სურდოს დროს, კარგია სურდოს სამკურნალოდ განკუთვნილი ცხვირის წვეთების დოზირებულად ჩაწვეთება, რაც ხელს უწყობს ყურის ანთებისაგან განკურნებასაც.
• სიცხის დამწევი და ტკივილგამაყუჩებელი საშუალებები

სხვა შესაძლო მიზეზები ყურის ტკივილისა:

• კბილის ან ნუშურა ჯირკვლების ანთება (გლანდების ანთება)
• უცხო სხეულისმოხვედრა ყურში
• ყურის ფიზიკური დაზიანება

როდის მივმართოთ ექიმს?

ექიმს უნდა მივმართოთ რაც შეიძლება მალე. არ შეიძლება წამლების (განსაკუთრებით ანტიბიოტიკების) თვითნებურად მიღება.  ყურის ტკივილის გამომწვევი მიზეზი,  ხშირად, სახლის პირობებში ვერ დგინდება. ხდება დაავადების გართულება, რამაც შესაძლოა გამოიწვიოს სმენის ნაწილობრივი ან მთლიანი დაკარგვა.