ყავა და ალკოჰოლი ორსულებში

თავის უამრავ დადებით ემოციასა და შეგრძნებასთან ერთად, ორსულობას თან სდევს თავისი შეზღუდვები. მაგალითად, უნდა მოერიდოთ სუშის, ყავის, ალკოჰოლის მიღებას. თუმცა, ახალი კვლევები გვამცნობს, რომ ზემოთხსენებული პროდუქტები შესაძლოა არ იყოს ისეთი მავნე ორსულებისთვის, როგორც ეს წლებია ვიცით.

რამდენად უსაფრთხოა ორსულისთვის ღვინის მიღება?

ალკოჰოლის მიღების საკითხი ოდითგანვე სადაო თემას წარმოადგენდა. თუმცა, ბოლოს დროს ჩატარებული კვლევის თანახმად, რომელიც გამოქვეყნდა ბრიტანეთის სამედიცინო ჟურნალში, სასმელი შეიძლება არ იყოს ისეთი მავნე ორსულისთვის, როგორც ამას აქამდე გვასწავლიდნენ. მეცნიერებმა გამოიკვლიეს დაახლოებით 7000 ბავშვი, რომელთა დედებიც ორსულობისას კვირაში 3-7 ერთეულ ალკოჰოლურ სასმელს იღებდნენ. 10 წლის ასაკისთვის ამ ბავშვებს არ აღენიშნებოდათ არანირი დაბადების დეფექტი, შეეძლოთ ისეთი დავალებების დამოუკიდებლად შესრულება, როგორიცაა: ცალ ფეხზე დგომა,  სწორ ხაზის გავლა წონასწორობის შენარჩუნებით და ა.შ.

სხვა კვლევები ადასტურებს, რომ მსუბუქად ალკოჰოლის მიღება: დღეში 1 ერთეული ან ნაკლები, ორსულობის დროს დასაშვებია. ამის მიუხედავად,  მთელი მსოფლიოს მასშტაბით ორსული ქალბატონები, თავს არიდებენ ალკოჰოლის მიღებას. ამ ყველაფერთან ერთად CDC (დაავადებათა კონტროლის და პრევენციის ცენტრი) ამბობს, რომ ალკოჰოლის არანაირი დოზა არ არის უსაფრთხო ორსული ქალბატონისთვის. ჩვენც ვეთანხმებით: ჯობია უსაფრთხოდ იგრძნოთ თავი, ვიდრე შემდეგ ნანობდეთ და თავს იდანაშაულებდეთ, რადგან იმ შემთხვევაშიც კი როდესაც გამომწვევი არის სხვა რამ, დედა თავს იდანაშაულებს.

 რამდენად უსაფრთხოა ორსულისთვის ყავის მიღება?

დიდი ხნის განმავლობაში ექსპერტები თვლიდნენ, რომ კოფეინის ჭარბი რაოდენობით მოხმარება შესაძლებელია ცუდი იყოს ბავშვის განვითარებისთვის. ის შეტანილი იყო ორსულებისთვის კატეგორიაში ,,არ არის უსაფრთხო’’. ამ მიზეზით დანიაში ჩატარდა ახალი კვლევა, რომელიც გამოქვეყნდა პედიატრიის ჟურნალში. მეცნიერები აკვირდებოდნენ 8000 ქალბატონს, რომლებიც ორსულობის დროს იღებდნენ კოფეინს. ჩატარებული კვლევის დასკვნა იყო შემდეგი: კოფეინის მიღების შედეგად ბავშვები არც ჰიპერაქტიურობის და არ სხვა ქცევითი პრობლემების განვითარების რისკის ქვეშ არ დგანან. უფრო ადრე ჩატარებული კვლევის თანახმად კი – კოფეინის მიღება არ იწვევს ბავშვში ძილთან დაკავშირებულ პრობლემებს.

მედიცინის წრეებში ასევე არსებობს მოსაზრება, რომ დიდი რაოდენობით კოფეინმა შეიძლება შეამციროს სისხლის მომარაგება პლაცენტისთვის და გაზარდოს მუცლის მოშლის რისკი. იმისთვის, რომ თავი უსაფრთხოდ იგრძნოთ ორსულობისას, მეანთა და გინეკოლოგთა ამერიკული კოლეჯი გვაძლევს რეკომედაციას:  შეზღუდეთ კოფეინის მიღება დღეში 200მგ.-მდე (დაახლოებით 350მლ. ყავა)