შეუძლია თუ არა C ვიტამინს თავიდან აგვარიდოს გაციება?

C ვიტამინის შესახებ

C ვიტამინი – საზოგადოებაში ცნობილია როგორც ბუნებრივი საშუალება გაციების საწინააღმდეგოდ. ადამიანის ორგანიზმი არ წარმოქმნის მას, თუმცა აუცილებლად სჭირდება იმუნური ფუნქციისთვის, ძვლის სტრუქტურისთვის, რკინის შეწოვისთვის და ჯანმრთელი კანისთვის. მისი მიღება შესაძლებელია შემდეგი პროდუქტებიდან: ციტრუსები, მარწყვი, მწვანე ბოსტნეული, პომიდორი. დღიური რეკომენდირებული დოზა არის – მამაკაცისთვის 90 მგ. დღეში, ქალისთვის 75 მგ. დღეში.

ვიტამინის  ეფექტი  გაციებაზე

ყველაზე სანდო და სარწმუნო კვლევა, ვიტამინ C-ს ეფექტების შესახებ, ჩატარდა 2013 წელს ჰელსინკის უნივერსიტეტში (კვლევა შეგიძლიათ იხილოთ აქ) რომელშიც მონაწილეობდა 11,000 ადამიანი. მკვლევარებმა აღმოაჩინეს, რომ ნორმაზე მეტად აქტიურ ადამიანებში – როგორებიც არიან, მარათონელები, მოთხილამურეები და ა.შ.  – დღეში მინიმუმ 200 მგ. ვიტამინის მიღება ამცირებს გაციების შანს 50%-ით. ამავე კვლევის თანახმად, სხვა ადამიანებში და ზოგადად მოსახლეობაში ვიტამინი არ ამცირებს გაციების რისკს. მიუხედავად ამისა, მას შეუძლია შეამციროს გაციების ხანგრძლივობა და სიმწვავე. ამისთვის საჭიროა ყოველდღიურად მივიღოთ მინიმუმ 200 მგ. დღეში. თუმცა, აქაც საჭიროა ოქროს შუალედის დაცვა, რადგან ვიტამინის ხანგრძლივად და დიდი დოზებით გამოყენება შეიძლება საზიანო იყოს ჩვენი ჯანმრთელობისთვის, კერძოდ: შეიძლება გამოიწვიოს დიარეა (ფაღარათი), მუცლის ტკივილი და ხელი შეუშალოს სისხლში შაქრის განსაზღვრას (არასწორი შედეგი მოგვცეს).

როგორ მოვიქცეთ?

ისმის კითხვა:  როგორ მოვიქცეთ, რომ არც ჩვენს ორგანიზმს ვავნოთ და ამასთან ერთად,  C ვიტამინის სასარგებლო თვისებებიც გამოვიყენოთ?

გამოსავალი არის ერთი: მივირთვათ ის საკვები, რომელიც მდიდარია C ვიტამინით.