უკანა ტანის ქავილი ბავშვებში-ენტერობიოზის მთავარი ნიშანი

ენტერობიოზის გამომწვევია მცირე ზომის მოთეთრო ფერის ნაწლავის ჭია, რომელსაც მახვილას უწოდებენ.

დაავადება ძირითადად გვხვდება სკოლის და სკოლამდელი ასაკის ბავშვებში. ადამიანი ავადდება ჭიის კვერცხების გადაყლაპვის შედეგად.

ენტერობიოზის ტიპიური ნიშნებია

• განსაკუთრებით ღამით განვითარებული უკანა ტანის ქავილი.  ეს კი განპირობებულია იმით, რომ მდედრი ნაწლავის ჭიები სწორედ ღამით გამოდიან ანალურ არეში და იქ დებენ კვერცხებს. მათი მოძრაობა პერიანალურ ნაოჭებში კი იწვევს ქავილის შეგრძნებას. ქავილის დროს ჭიის კვერცხები ხვდება ბავშვის ფრჩხილებზე, შემდეგ კი ბავშვი ეხება სხვადასხვა საგნებს, რაც ქმნის როგორც ბავშვის ხელახალი დაინფიცირების, ისე სხვა ადამიანების დაინფიცირების საშიშროებას.
• გარდა ქავილისა ბავშვებს შეიძლება აღენიშნებოდეთ მოუსვენარი ძილი, გაღიზიანებადობა, ძილის დროს კბილების კრაჭუნი. ქავილის და კანის ზედაპირული დაზიანების შედეგად იშვიათ შემთხვევებში ვითარდება მეორადი ბაქტერიული ინფექცია.
• ენტერობიოზის დროს მუცლის ტკივილი იშვიათია.
• ჭიის კვერცხები შეუიარაღებელი თვალით არ ჩანს, ხოლო მოზრდილი ჭიები შესაძლოა დაინახოთ, ტუალეტის ქაღალდზე და ღამით ანუსის არეშიც.

დიაგნოზის დასმა ხდება სპეციალური წებოვანი ლენტის საშუალებით.

მოხმარების წესი შემდეგია: დილით, გაღვიძებისთანავე ბავშვს პერიანალურ მიდამოში უნდა დაადოთ წებოვანი ლენტი, რასაც ჭიის კვერცხები აუცილებლად მიეკრობიან. ამის შემდეგ კი უკვე ლაბორატორიაში მოხდება მისი გამოკვლევა და ჭიის კვერცხების აღმოჩენის შემთხვევაში ექიმი დაიწყებს მედიკამენტურ მკურნალობას

ენტერობიოზის პროფილაქტიკა გულისხმობს ჰიგიენის წესების დაცვას.

ბავშვმა უნდა დაიბანოს ხელები ხშირად, გამოიცვალოს საცვლები ყოველდღიურად. ფრჩხილები უნდა ჰქონდეს მუდმივად სუფთად და დაჭრილი.

თუ არ მოხდება მკურნალობა, ენტერობიოზი შეიძლება გართულდეს დიარეით, შარდ-სასქესო სისტემის ინფექციებით, წონაში კლებით.