თვითმფრინავით მგზავრობა ორსულობისას

სანამ ორსულად მყოფი თვითმფრინავით მგზავრობას გადაწყვეტთ, არ დაგავიწყდეთ რომ ეს საკითხი თქვენს ექიმთან შეათანხმოთ. აგრეთვე გაითვალისწინეთ და წინასწარ იზრუნეთ იმაზეც, რომ უცხო ქვეყანაშიც შესაძლოა დაგჭირდეთ მეან-გინეკოლოგის კონსულტაცია.

ორსულობის დროს თვითმფრინავით მგზავრობისთვის ყველაზე სასურველი პერიოდი მეორე ტრიმესტრია.

ავიაკომპანიების უმეტესობა 37 კვირაზე, ან ტყუპებზე ორსულობის შემთხვევაში 32 კვირაზე დიდ ორსულს არ უშვებს თვითმფრინავში. ეს პოლიტიკა განპირობებულია იმ მიზეზით, რომ ქალს თვითმფრინავში არ დაეწყოს მშობიარობა.

თვითმფრინავით მგზავრობა არ არის უსაფრხთო იმ ორსულებისთვის, რომლებსაც აქვთ საშვილოსნოს ყელის უკმარისობა, პრეეკლამფსია, მაღალი არტერიული წნევა ან დიაბეტი, რომელიც კარგად არ ექვემდებარება მკურნალობას  და სხვა ორსულობასთან დაკავშირებული პრობლემები.

იმისათვის, რომ თქვენი ფრენა უფრო კომფორტული იყოს, ქვემოთ ჩამოთვლილია გარკვეული რეკომენდაციები:

• ფრენამდე კარგად გამოიძინეთ
• ჩაიცვით თავისუფალი ტანსაცმელი
• ფრენისას მიიღეთ საკმარისი სითხე და თავი აარიდეთ კოფეინის შემცველ სასმელებს, როგორებიცაა ყავა, ჩაი, კოკა-კოლა და ა.შ
• თუ კონტაქტურ ლინზებს ხმარობთ, მის მაგივრად გაიკეთეთ სათვალე, რადგან მშრალმა ჰაერმა შესაძლოა თვალები გაგიღიზიანოთ
• იმის გამო, რომ ფრენის დროს იზრდება ღრმა ვენების თრომბოზის განვითარების რისკი, იმოძრავეთ შესაძლებლობის ფარგლებში, გააკეთეთ მარტივი ვარჯიშები. ექიმმა შესაძლოა გირჩიოთ სპეციალური კომპრესიული თეთრეულის გამოყენება
• აირჩიეთ თქვენთვის ყველაზე მოსახერხებელი ადგილი – ასეთი კი თვითმფრინავის წინა ან შუა რიგებია გასასვლელთან და არა ფანჯარასთან
• თუ ჯერ კიდევ გულისრევა და ღებინება გაწუხებთ უთხარით ამის შესახებ თქვენს ექიმს და ის დაგინიშნავთ რაიმე მედიკამენტს

არ შეგეშინდეთ და გაითვალისწინეთ, რომ უსაფრთხოების შემოწმების გავლისას გამოყენებული მოწყობილობები არ აზიანებს ბავშვს

გისურვებთ სასიამოვნო ფრენას!