რატომ ეცვლებათ ახალშობილებს თვალის ფერი?

როგორ უხდება ჩემს პატარას ცისფერი თვალები!.. ნეტა, დარჩება ეს ფერი, თუ შეეცვლება? ბოლოსდაბოლოს, როდის გავიგებ რა ფერის თვალები ექნება ჩემს შვილს?

ალბათ ეს კითხვები ბევრ თქვენგანს მოსვლია თავში. უმეტესობას კი უოცნებია  შვილს ღია ფერის (ცისფერი, მწვანე, ზღვისფერი) თვალები ჰქონოდა. რა თქმა უნდა, ისევე როგორც სხვა  ნებისმიერ საკითხში, აქაც არიან გამონაკლისები, ვინც პირიქით, მუქ თვალებს ანიჭებს უპირატესობას.

ახალშობილთა უმრავლესობა ქვეყანას ცისფერი თვალებით ევლინება. მათი თვალების საბოლოო ფერი კი, მხოლოდ რამდენიმე თვის შემდეგ ხდება ნათელი.

რატომ იცვლის ბავშვის თვალები ფერს?

თვალის ფერს განსაზღვრავს თვალის გუგის ირვლივ არსებული ფერადი უჯრედები, რომლებიც გამოიმუშავებენ პიგმენტ მელანინს. მელანინის საშუალებით სხეული თავს იცავს მზის სხივების საზიანო მოქმედებისაგან. ეს პიგმენტი აგრეთვე კანსა და თმაშიც მდებარეობს. (აღსანიშნავია, რომ ღია კანის მქონე ადამიანებს უმეტესად თვალებიც ღია აქვთ.) მელანინის ინტენსიური წარმოქმნა მხოლოდ ცხოვრების პირველ წელს ხდება, ესაა მიზეზი იმისა, თუ რატომ ხდება თვალის საბოლოო ფერის დადგენა დაბადებიდან მხოლოდ რამდენიმე თვის შემდეგ.

ცისფერი, მწვანე თუ ყავისფერი თვალები?

იმისდამიხედვით, თუ რა კონცენტრაციითაა თვალებში მელანინის რაოდენობა, განისაზღვრება თვალის ფერი. ცისფერი თვალებისათვის მელანინის ყველაზე ცოტა რაოდენობაა საჭირო. ცოტატი უფრო მეტი მწვანე თვალებისთვის, კიდევ უფრო მეტი რაოდენობა კი, წარმოქმნის ყავისფერ თვალებს.

ზოგიერთი ბავშვი ინარჩუნებს თვალების ცისფერ ფერს, მაგრამ, თუკი თქვენ თქვენი ბავშვის თვალებში ყავისფერ ლაქებს შეამჩნევთ, ეს იმას ნიშნავს, რომ თქვენი შვილის თვალები ჯერ კიდევ შეცვლის პროცესშია. სხვათა შორის, მაშინაც კი, თუ ორივე მშობელს ყავისფერი თვალები აქვს, არის შანსი იმისა, რომ შვილს საბოლოოდ ღია თვალები დარჩეს, ამისთვის კმარა ღია ფერის თვალების ბებია-ბაბუაში არსებობა. თუმცა, შანსი შედარებით მცირეა, რადგან ყავისფერი თვალების გენი დომინანტურია.

დასასრულში, მინდა გისურვოთ, თქვენს შვილს ისეთი თვალის ფერი ჰქონოდეს, როგორიც თქვენ გინდათ.