როგორ უნდა შეამციროთ ორსულობის დროს სტრიების გაჩენის რისკი და რომელია მათთან ბრძოლის ყველაზე ეფექტური მეთოდი

სტრიები ყველაზე ხშირად ორსულობის ბოლო პერიოდში იჩენს თავს. ძირითადად იგი მუცელზეა ლოკალიზებული, რაც მუცლის ზომაში სწრაფ ზრდასთანაა დაკავშირებული, თუმცა ზოგიერთ შემთხვევაში, შესაძლოა, დუნდულოებზე, ბარძაყებზე და მკერდზეც გაჩნდეს. ყველა შემთხვევაში მიზეზი  შემაერთებელ ქსოვილში მიმდინარე ცვლილებებია.

სტრიების ფერი ადამიანის კანის ფერზეა დამოკიდებული. თავდაპირველად ის შეიძლება იყოს  ვარდისფერი, მოწითალო-მოყავისფრო, იასამნისფერი ან მუქი ყავისფერი. ბავშვის გაჩენიდან დაახლოებით ერთ წელიწადში უფერულდება, თუმცა საბოლოოდ არასდროს ქრება.

მიუხედავად იმისა, რომ წინასწარ თითქმის შეუძლებელია იმის დადგენა, გექნებათ თუ არა სტრიები, არსებობს გარკვეული რისკ-ფაქტორები, ესენია:

• გენეტიკა: თუ თქვენს დედას ან დას ორსულობისას ჰქონდა სტრიები, მაღალი ალბათობით ის თქვენც გექნებათ
• წონაში სწრაფად მომატება
• ორსულობა ტყუპებზე
• ბავშვის დიდი წონა
• ამნიონური სითხის ჭარბი რაოდენობა

სამწუხაროდ, სტრიების პრევენცია თითქმის შეუძლებელია, თუმცა წონის რეკომენდებული და ნელი მატება, აგრეთვე საკმარისი რაოდენობით სითხის მიღება, A, E ვიტამინით მდიდარი საკვები და კანის დამატენიანებელი საშუალებები ამცირებს რისკებს.

რაც შეეხება მკურნალობას, ის საკმაოდ რთულია და დერმატოლოგის ჩარევას საჭიროებს. ქვემოთ ჩამოთვლილია რამდენიმე მეთოდი:

• ტრეტინოინის შემცველი კრემები, თუმცა მათი გამოყენება ორსულობისას და ძუძუთი კვების პერიოდში არ შეიძლება
• მიკროდერმაბრაზია, რომელიც ხელს უწყობს კანის სტრუქტურის განახლებას
• ლაზეროთერაპია, რომელიც ეხმარება კანს ელასტიურობის აღდგენაში. მისი მეშვეობით კანის ის არე, სადაც სტრიებია უფრო მეტად ემსგავსება კანის დანარჩენს ნაწილს
• პლასტიკური ქირურგია, რომელიც სტრიებთან ბრძოლის ყველაზე ეფექტური საშუალებაა