სიმსუქნე ბავშვებში

დღეს სიმსუქნე ერთ-ერთ მთავარ პრობლემად არის ქცეული, რაც  სამწუხაროდ ბავშვებშიც საკმაოდ ხშირად გვხვდება.

ის ძალიან დიდ საფრთხეს უქმნის ჩვენს შვილებს. მოქმედებს არა მხოლოდ მათ ფიზიკურ, არამედ სულიერ ჯანმრთელობაზეც.

ბავშვი მსუქანია მაშინ, როცა მისი სხეულის მასის ინდექსი (რომელიც გამოითვლება წონის შეფარდებით – კილოგრამებში, სიმაღლის კვადრატთან – მეტრებში) ამ ასაკის და სქესის ბავშვებისთვის დადგენილი სტანდარტით ტოლია ან მეტია 95 პერცენტილზე.

სიმსუქნის განვითარებაში გენეტიკას, ფსიქოლოგიურ ფაქტორებს და ცხოვრების წესს მნიშვნელოვანი ადგილები უკავიათ. მაგალითად, თუ ოჯახის რომელიმე წევრი ჭარბწონიანია, მისი განვითარების რისკი ამ ოჯახში მყოფი ბავშვისთვის მაღალია, თუმცა სიმსუქნის ყველაზე მთავარი მიზეზი მაინც არასწორი კვება და ნაკლები ფიზიკური აქტივობაა.

მნიშვნელოვანია, რომ 2013 წელს ამერიკის სამედიცინო ასოციაციამ სიმსუქნე დაავადებად აღიარა. ეს ფაქტი კიდევ უფრო მეტად უსვამს ხაზს სიმსუქნის, როგორც დიდი საფრთხის არსებობას

მსუქანი ბავშვები არიან დიდი რისკის ქვეშ განუვითარდეთ ქვემოთ ჩამოთვლილი მდგომარეობები, ესენია:

• გულ-სისხლძარღვთა დავადებები
• მეორე ტიპის დიაბეტი
• კანის პრობლემები
• სახსრების ტკივილი
• სუნთქვის დარღვევები

არანაკლებ საყურადღებოა ფსიქოლოგიური პრობლემებიც, რომლებიც ძალიან დიდ გავლენას ახდენენ ბავშვზე, როგორც სოციალურ პიროვნებაზე. ისინი  ხდებიან ჩაკეტილები, მიდრეკილი არიან დეპრესიისადმი, აქვთ დაბალი თვითშეფასება და არიან ბულინგის მსხვერპლნი. ბულინგი კი ამ შემთხვევაში ყველაზე ხშირად დაცინვით გამოიხატება.

რა თქმა უნდა, საუკეთესო გამოსავალი თქვენი შვილის დასაცავად არის სიმსუქნის პრევენცია.

უკვე არსებული სიმსუქნის დასაძლევად კი არსებობს ერთი გზა და ეს ცხოვრების სტილის შეცვლაა, რაშიც იგულისხმება ჯანსაღი კვება და ბავშვის ასაკისთვის შესაფერისი ფიზიკური აქტივობა.

ამ რთულ პროცესში შესაძლოა ექიმის დახმარებაც დაგჭირდეთ.

არ დაგავიწყდეთ, რომ ბავშვები ჭამენ იმას, რასაც თქვენ ყიდულობთ ამიტომ შეავსეთ თქვენი მაცივარი სასარგებლო საკვებით

არ დაგავიწყდეთ, რომ ბავშვები ჭამენ იმას, რასაც თქვენ ყიდულობთ-თავიდან აიცილეთ სიმსუქნე.