სიგარეტი – მუცლადმყოფი ბავშვის დიდი საფრთხე

“როცა ორსული ეწევა, მისი შვილის საფრთხისგან  დაცვა არაფერს  შეუძლია”- ამბობს ამერიკელი მეან-გინეკოლოგი რობერტ ველჩი.

სიგარეტის კვამლი 4000-ზე მეტ ქიმიურ ნივთიერებას შეიცავს. ისინი ყველა საზიანოა ორგანიზმისთვის, თუმცა მათგან ორი – ნიკოტინი და ნახშირბადის მონოქსიდი (იგივე მხუთავი აირი) განსაკუთრებით მავნებელია ნაყოფისთვის.

ისინი ხვდებიან დედის სისხლში და ამცირებენ ბავშვისთვის ჟანგბადის და სხვა საკვები ნივთიერებების მიწოდებას.

ორსულობის დროს სიგარეტის მოწევა ზრდის დაბალწონიანი ნაყოფის დაბადების, ნაადრევი მშობიარობის, სპონტანური აბორტის რისკს. ასევე, მკვდრადშობადობის და ჩვილის უეცარი გარდაცვალების სინდრომის განვითარების რისკს.

ბავშვებს, რომელთა დედაც ორსულობისას ეწეოდა, შესაძლებელია ჰქონდეთ სასუნთქი და გულ-სისხლძარღვთა სისტემის პათოლოგიები, სწავლის, ყოფაქცევის და აზროვნების პრობლემები.

კვლევების მიხედვით, სიგარეტის მოწევა ორსულობის დროს ზრდის იმის ალბათობასაც, რომ მომავალში შვილიც სიგარეტზე დამოკიდებული გახდება.

ერთადერთი გამოსავალი და ყველაზე დიდი საჩუქარი თქვენი ბავშვისთვის არის სიგარეტისთვის თავის დანებება. აქ კი ვხელმძღვანელობთ პრინციპით, რაც მალე მით უკეთესი, თუმცა დაიმახსოვრეთ, რომ მასზე უარის თქმას აზრი ორსულობის ნებისმიერ ვადაზე აქვს, თუნდაც ეს მერვე თვეში გააკეთოთ.

სიგარეტისთვის თავის დანებება დიდ ძალისხმევას მოითხოვს, თქვენ ნამდვილად რთული გზა გექნებათ გასავლელი და იცოდეთ, რომ ამ პროცესში ექიმის ჩართულობა მნიშვნელოვანია.

პირველ რიგში დაფიქრდით თუ რატომ და როდის ეწევით და ეცადეთ თავი აარიდოთ ასეთ სიტუაციებს. სახლიდან და სამსახურიდან გააქრეთ ყველა ის ნივთი, რომელიც სიგარეტთან ასოცირდება.

კარგად შეაფასეთ ის, თუ რა შედეგი შეიძლება მოუტანოს მოწევამ თქვენს შვილს და ამის შემდეგ  სიგარეტს თავს აუცილებლად დაანებებთ.

საინტერესოა ის სამწუხარო ფაქტი, რომ ქალების 50%-ზე მეტი, რომლებმაც ორსულობის დროს უარი თქვეს სიგარეტზე, კვლავ უბრუნდებიან მას მშობიარობის შემდეგ.