როგორ მოქმედებს მუსიკა ბავშვის გონებრივ განვითარებაზე?

ბავშვებს უყვართ მუსიკა. ახალშბოლთა უმეტესობა, სიცოცხლის პირველსავე კვირას რეაგირებს მუსიკაზე. დედის მუცელში მათ უკვე შეუძლიათ გაარჩიონ ხმები და მუსიკის ჰანგები. ყველამ ვიცით, რომ იავნანა, ხშირ შემთხვევაში, სასიამოვნო და დამამშვიდებელ ეფექტს იწვევს პატარებში, რაც თავისთავად მშვიდ ძილს უზრუნველყოფს. თუმცა, მუსიკის დადებითი ზეგავლენა ბავშვებზე, მხოლოდ ამით არ შემოიფარგლება. მისი დახმარებით ასევე შესაძლებელია ბავშვის მენტალური შესაძლებლობების მიზანიმართული განვითარება.

პატარები მუსიკას მთელი სხეულით შეიგრძნობენ, იგი ხელს უწყობს ბავშვებში როგორც კოგნიტური, ისე კოორდინაციული უნარ-ჩვევების განვითარებას. ადრეული მისუკალური განათლება კი, არის კრეატიული გზა, გავაცნოთ იგი პატარას და მივცეთ შესაძლებლობა უკეთესად განვითარდეს.

მუსიკის მოსმენა ადამიანის ტვინში ბევრ კომპლექსურ სტიმულს წარმოქმნის. ეს ეხება როგორს ცნობიერად, ასევე არაცნობიერად მოსმენას. მაგალითად, ჯერ კიდევ საშვილოსნოში, ბავშვს შეუძლია გაარჩიოს სხვადასხვა ხმაური და დედის ხმა ერთმანეთისაგან.

ტვინს, განსაკუთრებით, კლასიკური მუსიკა ასტიმულირებს, თავისი რთული სტრუქტურის  საშუალებით. კლასიკური მუსიკის მოსმენისას, ტვინის რამდენიმე მიდამო ერთდროულად სტიმულირდება, რაც დადებით ეფექტს იწვევს. უპირველეს ყოვლისა, ეს ხელს უწყობს კომპლექსური აზროვნების განვითარებას და კრეატიულობის გაზრდას, იმიტომ, რომ თითოეული მუსიკის მოსმენით, ტვინს აზროვნების სხვადასხვა ნიმუშს ვაწვდით.

საბავშო სიმღერებს (ხშირად განმეორებადი ტექსტებით) შეუძლიათ ბავშვებს  საუბრის კონცენტრაციისა და დასწავლის უნარი განუვითარონ. ერთი და იგივე სიმღერის ხშირი მოსმენის შემდეგ, ბავშვები ზეპირად იმახსოვრებენ სიმღერის ტექსტს, რაც, თავისთავად, მათ სიტყვათა მარაგს ზრდის.

ადამიანის ტვინზე მუსიკის გავლენას მრავალი წლის განმავლობაში აკვირდებოდნენ ნეიროფიზიოლოგები და მუსიკის პედაგოგები. ვარაუდი, რომ განსაკუთრებული სირთულის ტონები და მელოდიები ტვინის განვთარებაზე დადებითად მოქმედებენ, დიდი ხნის განმავლობაში არ იყო დამტკიცებული. გერმანიის მუსიკალური სკოლის ასოციაციამ გამოაქვეყნა კვლევა, თუ რა დადებით ეფექტს უნდა ველოდოთ მუსიკასთან ბავშვის ადრეული შეხებისას. კვლევამ, სახელად  ,,ადრეული მუსიკალური განათლების წინაპირობები და ეფექტები“, რამდენიმე საინტერესო შედეგი წარმოადგინა:

• მნიშვნელოვნად უმჯობესდება სოციალური უნარები
• იზრდება სწავლისა და მიზნის მიღწევის მოტივაცია
• მნიშვნელოვნად იმატებს IQ-ს მაჩვენებელი
• იზრდება კონცენტრაცია
• ვითარდება კრეატიულობა
• უმჯობესდება ემოციური მდგომარეობა
• მცირდება შფოთვა

რასაკვირველია, ყველა ბავშვი ვირტუოზ პიანისტად ან მსოფლიო დონის მევიოლინედ არ იბადება, თუმცა კარგი იქნებოდა მშობლებმა თავიანთ შვილებს ხელი შეუწყონ, სცადონ თავიანთი შესაძლებლობები მუსიკალურ ასპარეზზე.

მიუხედავად მუსიკის ესოდენ დადებითი ზეგავლენისა, მშობელმა არ უნდა დააძალოს ბავშვს ისწავლოს რომელიმე ინსტრუმენტზე დაკვრა. ეს უნდა მოხდეს მხოლოდ ბავშვის დაინტერესების შემთხვევაში. მშობლის ძალიან დიდი სურვილის შემთხვევაში კი, სასურველია სწავლებას უფრო თამაშის სახე მიეცეს, რომ პატარისათვის უფრო მისაღები და საინტერესო გახდეს. ვინ იცის, იქნებ სახლში მომავალი მოცარტიც კი გვეზრდება.