როგორ დავამარცხოთ ისტერიკა?

ალბათ მშობელთა უმრავლესობა გამხდარა ერთხელ მაინც შვილის ისტერიკის მოწმე. მშობლები ძალიან განიცდიან ამას, განსაკუთრეით მაშინ, როცა ისტერიკა და გაუთავებელი ტირილი ხშირი მოვლენაა. გთავაზობთ რამდენიმე გზას, თუ როგორ ავიცილოთ თავიდან შვილის ზედმეტად გაღიზიანება და როგორ გავუფრთხილდეთ მათ ნერვებს.

თავიდან ავიცილოთ მოულოდნელი შიმშილი

ეს ადვილად გადასაჭრელი პრობლემაა. კარგი იქნება, თუ ჩვენი შვილის „შიმშილის შემოტევას“ ყოველთვის მზად დავხვდებით. როდესაც ბავშვი მშიერია, რთულია მისი კონტროლი და საერთო ენის გამონახვა. განსაკუთრებით მაშინ, როდესაც გარეთ ხართ. ასე რომ, როდესაც სახლიდან სასეირნოდ გადიხართ, ყოველთვის იქონიეთ თან რაიმე „სასუსნავი“. სასურველია, რომ სასუსნავი ჯანსაღ კვებას შეესაბამებოდეს (ბოსტნეული, ხილი, ჩირი…)

როგორ მოვიქცეთ, თუ ბავშვი მარკეტში ჭირვეულობს?

საყიდლებზე ყოფნისას, მარკეტში შესვლისთანავე შესთავაზეთ თქვენს პატარას, იყოს თქვენი დამხმარე. მიაწოდეთმათ მსუბუქი ნივთები, რომ ჩააწყოს საყიდლების კალათაში. თან შეგიძლიათ დაითვალოთ ჩაწყობილი სურსათი, რომ მისი ყურადღება უფრო კარგად მიიპყროთ.

მიეცით არჩევანის გაკეთების უფლება

გინდათ დაასრულოთ ყოველდღიური „ბრძოლა“ ჩაცმის გამო? გააკეთებინეთ შვილს არჩევანი ორ სამოსს შორის: „ჩაცმის დროა, წითელ მაისურს ჩაიცვამ თუ ლურჯს?“ ეს მეთოდი ნამდვილად ღირს ცდად.

გააცინეთ მოულოდნელად

ბავშვის ერთ-ერთ დამამშვიდებელ მეთოდად მისი გაცინება ხშირად საკმაოდ ეფექტურია. მაგალითად, მიბაძეთ რომელიმე მის საყვარელ მულტფილმის პერსონაჟს, დაიწყეთ უცნაურ და სასაცილო ხმაზე საუბარი და ა.შ. მოიფიქრეთ რამე იმისდამიხედვით, თუ რა მოსწონს და ამხიარულებს თქვენს შვილს.

მთავარია სიმშვიდის შენარჩუნება

რაც უნდა მოხდეს, არ გაებათ სიბრაზის მახეში, ეს ცეცხლზე ნავთის დასხმაა! მოიფიქრეთ რაიმე ფრაზა, რომელიც სიმხნევეს შეგმატებთ, მაგალითად,“მე სუპერ-დედა ვარ!“, „მე ამას შევძლებ!“, „ეს მალე გაივლის!“ და ა.შ. ჩაისუნთქეთ და ამოისუნთქეთ ღრმად და შეეცადეთ რამდენიმე წუთის განმავლობაში იმეოროთ თქვენი შერჩეული ფრაზა გულში. ეს გადაგატანინებთ ისტერიკის ყველაზე რთულ ნაწილს.

არ დანებდეთ! არ შეუსრულოთ  მას სურვილი, რომელიც თვლით, რომ მისთვის საზიანოა. მაგალითად თუ ის ითხოვს ძალიან ბევრ ტკბილეულს და ყოველი ჭირვეულობის შემდეგ მაინც იღებს სასურველ ტკბილეულს, იცოდეთ, რომ ყოველთვის ამ გზით შეეცდება სასურველის მიღებას.

არ დააიგნოროთ და არ დასაჯოთ! მსგავს სიტუაციებზე დაკვივრვებები ადასტურებს, რომ არც დასჯა და არც იგნორი სიტუაციას არ შველის. წარმოიდგინეთ, რომ ვინმემ დაგვსაჯოს, ან გაგვიბრაზდეს და ამის მერე კარგ ხასიათზე დავდგეთ, ეს ხომ ზრდასრულთათვისაც წარმოუდგენელია. მითუმეტეს არ გაჭრის ბავშვთან.

ნუ დაუსვამთ შეკითხვებს და ნუ მოითხოვთ მისგან პასუხს, ნუ დაუწყებთ სიტუაციის ლოგიკურ ახსნა-განმარტებას. ამით კიდევ უფრო გაახანგრძლივებთ მის ჭირვეულობას.

აღიარეთ მისი გრძნობები, ეს დაგემხარებათ მისი გულის მოგებაში. რამდენიმე მაგალითი, რომელიც დაგვეხმარება:

• „ისეთი გაბრაზებული ხარ! ვხვდები, როგორ გინდა შოკოლადი.“
• „ვწუხვარ, რომ გაბრაზებული ხარ, როცა დამშვიდდები, ჩაგეხუტები და დავილაპარაკოთ იმაზე, რაც მოხდა.“
• „ვხედავ, რომ აღელვებული ხარ, როგორ მინდა დაგეხმარო, რომ ახლავე დამშვიდდე, მოდი, დამიხატე სურათი, სადაც მაჩვენებ თუ როგორი გაბრაზებული ხარ?“
• „ძალიან მიყვარხარ, არ აქვს მნიშვნელობა რას ამბობ, შენ ძალიან კარგი ხარ, მაგრამ უნდა შევჩერდეთ და დავილაპარაკოთ ამაზე (გაბრაზების მიზეზი)“
• ჩაეხუტეთ მას, თუკი ამის საშუალებას მოგცემთ. საშუალოდ 6 წამია საჭირო, რომ ჩახუტებისას სიტუაცია განიმუხტოს.
• დაელაპარაკეთ მას „აჯანყების“ მიზეზზე მას შემდეგ, რაც საბოლოოდ დამშვიდდება. გამოიყენეთ მასთან ფიზიკური კონტაქტი, მოჰკიდეთ ხელი ხელებზე, ჩაისვით კალთაში ან მოეხვიეთ და ისე ესაუბრეთ. ეს ყველაფერი დაგვეხარება, რომ მომავალში საგრძნობლად შემცირდეს უთანხმოებათა რაოდენობა.