როგორ ავარჩიოთ ბავშვის საკვები ბოთლი?

ჩვენი შვილებისთვის ყველაფერი საუკეთესო გვინდა, განსაკუთრებით როდესაც საქმე მათ ჯანმრთელობას და განვითარებას ეხება. ბოთლების და საწოვარების არჩევა მშობლებისთვის ერთ-ერთი პატარა თავის ტკივილია, ამიტომ შევეცდებით, რომ საქმე ცოტა შეგიმსუბუქოთ.

დღესდღეობით ქართულ ბაზარზე ძალიან კარგი ბოთლები და საწოვარები იყიდება. არჩევანიც საკმაოდ დიდია. ბავშვი სანამ არ ცდის რამდენიმე ბოთლს და საწოვარას, ვერ მიხვდებით რომელი მოწონს. საუკეთესო გამოსავალია, რამდენიმე ბოთლი შეიძინოთ და ბავშვს მისცეთ „არჩევის“ საშუალება. თუმცა სანამ ბოთლის ყიდვას გადაწყვეტთ, შემდეგი ფაქტორები შეგიძლიათ მიიღოთ მხედველობაში:

რა ზომის ბოთლი შევიძინო?

ახალშობილები თავიდან ცოტას ჭამენ მაგრამ ასაკის მატებასთან ერთად იმდენად იზრდება ულუფების ზომა, რომ შეიძლება არ გიღირდეთ ბევრი პატარა ზომის ბოთლის შეძენა.

შუშა თუ პლასტმასი?

არც თუ ისე დიდი ხნის წინ, მხოლოდ შუშის ბოთლები არსებობდა. მას შემდეგ რაც მწარმოებლებმა პლასტმასის ბოთლის წარმოება დაიწყეს, შუშის ბოთლები ამერიკაში და ევროპაში ფაქტიურად მთლიანად ჩანაცვლდა პლასტმასის ბოთლებით.

თუმცა, რადგან პლასტმასის ბოთლები ხშირად შეიცავდა საშიშ ნივთიერებას BPA-ს, შუშის ბოთლები ისევ დაბრუნდა ბაზარზე. დიდი მწარმოებლების პლასტმასის ბოთლები უკვე აღარ შეიცავს BPA-ს, რაც შეგიძლიათ ნახოთ პროდუქციის აღწერილობაში (ბოთლები შეგიძლიათ ნახოთ აქ).

შუშის ბოთლი ძალიან კარგია სტერილიზაციისთვის, თუმცა, ყოველთვის არის გატეხვის საშიშროება. ასევე, გაითვალისწინეთ, ბავშვი როდესაც წამოიზრდება და ბოთლის ხელში დაჭერას შეძლებს, შუშის ბოთლი შეიძლება მძიმე მოეჩვენოს.

პლასტმასის ბოთლი მჩატეა თუმცა მალე ფუჭდება. მისი მოთავსება არავითარ შემთხვევაში არ შეიძლება მიკროტალღურ ღუმელში.

საწოვარა: ლატექსი თუ სილიკონი?

სილიკონი. მიუხედავად იმისა, რომ ლატექსი უფრო იაფია, ის უფრო ადვილად ცვდება და შესაბამისად უფრო მეტის ყიდვა მოგიწევთ. ასევე, გაითვალისწინეთ, რომ ლატექსის გარეცხვა არ შეიძლება ჭურჭლის სარეცხ მანქანაში.

უფროსი ბავშვის ძველი ბოთლების გამოყენება თუ შეიძლება მეორე ბავშვზე?

თუ ეს თქვენი მეორე ბავშვია, არ გამოიყენოთ პირველი ბავშვის ბოთლები, რადგან დიდი შანსია ბოთლები უსაფრთხოების სტანდარტებს აღარ აკმაყოფილებდეს. რა თქმა უნდა, საწოვარებიც აუცილებლად უნდა გამოვცვალოთ.

ვაპირებ ძუძუს მიცემას და ბოთლიდან კვებას, როგორ მოვიქცე?

ძალიან მნიშვნელოვანია,რომ ბავშვი ძუძუს შეეჩვიოს სანამ ბოთლზე გადაიყვანთ. ამ პროცესს 4-6 კვირა სჭირდება. ჩვილს თუ ბოთლს ძალიან ადრე მისცემთ, შეიძლება ძუძუ აღარ ჭამოს, რადგან ბოთლიდან ჭამა უფრო ადვილია. თუ 2-3 კვირის ჩვილი ძუძუს კარგად ჭამს, შეგიძლიათ ბოთლი მისცეთ, მაგრამ,მაინც ფრთხილად იყავით, პირველი 2 კვირა იშვიათად მიეცით .

ძალიან დიდი ხანი არ დაიცადოთ. თუ 6 კვირას გადააცილებთ, შეიძლება ბოთლი აღარ მიიღოს.

ღირს თუ არა მექანიზმიანი ბოთლის ყიდვა?

საქართველოს ბაზარზე მექანიზმიანი ბოთლი Dr Brown’s-ს აქვს, რომელსაც გააჩნია დაპატენტებული შიდა გამწოვი სისტემა. მისი შიდა გამწოვი სისტემა უზრუნველყოფს დადებით წნევით ნაკადს, არ ქმნის ვაკუუმს კვებისას, რაც მაქსიმალურად მიახლოებულია ბუნებრივ კვებასთან. იგი რძის ან ხელოვნური რძის ნარევის ჰაერის ბუშტუკებით დაჟანგვის შესაძლებლობას ამცირებს და ინარჩუნებს ბავშვის ჯანმრთელობისთვის აუცილებელ  ვიტამინებს: C, A და E და ლიპიდებს.