როცა ბავშვი იკბინება

ბავშვები ხშირად იკბინებიან. კბენის ობიექტი კი ხან ოჯახის წევრი, ხან კი სრულიად უცხო ადამიანია.

შეიძლება გაგიკვირდეთ, მაგრამ ეს საქციელი ბავშვის ნორმალური განვითარების ნაწილია და სულაც  არ ნიშნავს იმას, რომ მის უკან რაიმე სერიოზული პრობლემა იმალება. თუმცა ნებისმიერ შემთხვევაში, ჩვენი, როგორც მშობლების მოვალეობაა, სწორად მივუდგეთ ჩვენს შვილს და არ მივცეთ საშუალება კბენა ჩვევაში გადაიზარდოს.

მიზეზები, თუ რატომ იკბინებიან ბავშვები მრავალგვარია. მათ აინტერესებთ, თუ რა მოხდება კბენის შემდეგ, ბაძავენ თავიანთ თანატოლებს, რომლებიც ასევე იკბინებიან, ცდილობენ ამ გზით გარკვეული ყურადღება მიიქციონ. ისიც უნდა გავითვალისწინოთ, რომ ბავშვებს ხშირად იმპულსური ქცევები ახასიათებთ.

კბილების ამოჭრის პერიოდში კბენა მათში სასიამოვნო შეგრძნებას იწვევს. ბავშვი შეიძლება იკბინებოდეს მაშინაც, როცა დაღლილი, მშიერი ან გაღიზიანებულია

როგორ მოვიქცეთ ჩვენ?

• თუ ბავშვს კბილები ამოსდის, მუდამ თან იქონიეთ სპეციალური რეზინის რგოლები, რათა ბავშვმა თქვენი ხელის ნაცვლად, მას უკბინოს.
• თავი აარიდებინეთ სიტუაციებს, სადაც შეიძლება გაღიზიანდეს და დარწმუნდით, რომ სანამ თანატოლებთან თამაშს დაიწყებს, ნაჭამი და დამშვიდებულია.
• როცა შეამჩნევთ რომ ვინმეს კბენს, მოარიდეთ მას
• აუხსენით, რომ თავისი ემოციების გამოხატვა სხვაგვარადაც შეუძლია და უთხარით, რომ კბენა ძალიან მტკივნეულია

როგორ არ უნდა მოვიქცეთ?

შეიძლება იმ მომენტში ძალიან გინდოდეთ თქვენც უკბინოთ, ან გაუბრაზდეთ, თუმცა ეს არ გააკეთოთ და ასევე არ აიძულოთ ბავშვი თავის თავს უკბინოს იმ მიზნით, რომ გაიგოს თუ როგორი მტკივნეულია ის.

იმ შემთხვევაში, თუ ბავშვმა ვერ დაძლია ეს ჩვევა და თვლით, რომ კბენა შეიძლება რაიმე სხვა პრობლემაზე მიუთითებდეს, მიმართეთ სპეციალისტს.