ახალშობილი: რას ველოდოთ?

ყველა მშობელს აინტერესებს როგორი შესახედაობის იქნება მისი ახალშობილი. ალბათ, დამეთანხმებით რომ ბევრი ჩვენთაგანი წარმოიდგენს ხოლმე ვარდისფერ ლოყებიან, მშვიდ პატარას, თუმცა, თქვენი ახალშბილის შესახედაობამ შესაძლოა საკმაოდ გაკვირვებული დაგტოვოთ. ახალშობილებს თავიდან აქვთ მოწითალო ალისფერი შეფერილობა, შემდგომ კი – ვარდისფერი. ასევე, აქვთ პაწაწუნა ნაოჭები/ნაკეცები.

შევეცდები მოგაწოდოთ ის ძირითადი ინფორმაცია, რითაც მიხვდებით რომ საგანგაშო არაფერია და ახალდაბადებული ბავშვისთვის ეს ყველაფერი დამახასიათებელი და ნორმალურია:

• სველი, წებოვანი კანი – ეს გამოწვეულია იმით, რომ საშვილოსნოში მის ირგვლივ იყო თბილი ამნიოტური სითხე (ამნიოტური სითხე – სანაყოფე წყლები, რომელიც იცავს ნაყოფს და აუცილებელია მისი განვითარებისთვის). მოხდება მისი სწრაფად შემშრალება რათა ახალშობილის ტემპერატურა არ დაეცეს. თეთრ ნივთიერებას რომელსაც ბავშვის დაბადებისთანავე დაინახავთ ჰქვია – ვერნიქსი.  ვერნიქსი არის დამცავი საფარი რომელსაც აქვს ხაჭოსებრი კონსისტენცია და ჩანს საკმაოდ სქელი. ამ საფარის მოშორება აუცილებელი არ არის, მისი უმეტესი ნაწილი პირველივე ბანაობისას ბუნებრივად მოშორდება.
• ასიმეტრიული თავი – ხშირ შემთხვევაში ახალშობილის თავი არ არის იდეალურად სიმეტრიული. რადგან თავის ქალის ძლები ფორმირდება ისე, რომ მოერგოს გზას რომლიც უნდა გამოიაროს მშობიარობის დროს. საინტერესოა ის ფაქტი, რომ საკეისრო კვეთით დაბადებულ ბავშვებს აქვთ საკმაოდ მრგვალი თავი. ეს იმის შედეგია, რომ მათ არ უწევთ იმ გზის გავლა რასაც გადიან ბუნებრივი გზით დაბადებული პატარები.
• მოწითალო ან ვარდისფერი კანი – იმის გამო, რომ პატარას ჯერ არ ჩაუსუნთქავს მისი კანის ფერი შეიძლება იყოს ალისფერი ან მუქი წითელი. როდესაც ის პირველად იტირებს და ჩაისუნთქავს, მისი კანიც მიიღებს ვარდისფერ შეფერილობას.
• მუქი ფერის ხელები და ფეხები – ახალშობილის სისხლძარღვები ჯერ კიდევ განვითარების პროცესშია. თუ შეამჩნევთ მუქ ფერს მის ხელებზე და ფეხებზე სცადეთ პოზიციის შეცვლა და ნახავთ რომ ფერი შეიცვლება. თუმცა, თუ შეამჩნევთ, რომ მისი ფერი არა მუქი, არამედ წითელია და სხეულის უმეტესი ნაწილი წითელია, სასწრაფოდ აცნობეთ ექიმს, რადგან ეს შეიძლება მიუთუთებდეს ორგანიზმში ჟანგბადის ნაკლებობაზე.
• სიყვითლე – ახალშობილებში ხშირია კანის მოყვითალო ფერი, რადგან მათი ღვიძლი მოუმწიფებელია. როდესაც ხდება სისხლის წითელი უჯრედების დაშლა შედეგად გამოთავისუფლდება ყვითელი პიგმენტი – ბილირუბინი, რაც იწვევს კანისა და თვალის გუგების მოყვითალო შეფერილობას. ბავშის ნორმალურ ზრდასთან ერთად, როდესაც ღვიძლი არის მომწიფებული და სრულყოფილად მუშაობს, ის ინელებს ბილირუბინს და მოყვითალო ფერიც აღარ არის. თუ მოყვითალო ფერი დაბადებიდან 1 კვირაში იწყებს გაქრობას ამას ეძახიან – ფიზიოლოგიურ სიყვითლეს. თუ გაგრძელდა – აუცილებლად მიმართეთ ექიმს.
• აკნე – ხშირად, დაბადებიდან პირვლე კვირებში, ახალშობილებს სახეზე აღენიშნებათ პაპულები, პუსტულები (მუწუკის სხვადასხვა ფორმები). ეს არ არის პრობლემა – არის დროებითი და არ საჭიროებს მკურნალობას.
• აქერცვლადი კანი – ძალიან ხშირია ახალშობილებში. ეს არის იმის შედეგი, რომ ის ჯერ იყო თბილ ამნიოტურ სითხეში, შემდგომ კი მოხვდა მშრალ ჰაერში.