რა უნდა ვიცოდეთ სიცხის შესახებ?

რა არის სიცხე?

მოგეხსენებათ, რომ პერიოდულად ყველა ბავშვს აქვს სიცხე. უმეტეს შემთხვევაში ის არ მიგვანიშნებს რაიმე სერიოზულ პროცესზე, პირიქით – ეს არის გზა, რომლითაც სხეული ებრძვის ინფექციას.

ადამიანის სხეულს გააჩნია თავისი ,,თერმოსტატი”, რომელიც არეგულირებს სხეულის ტემპერატურას. ის მდებარეობს თავის ტვინის ნაწილში, რომელსაც ჰქვია ჰიპოთალამუსი.

რა იწვევს სიცხეს?

მნიშვნელოვანია იმის ცოდნა, რომ სიცხე არ არის დაავადება, ეს არის სხვა, არსებული პრობლემის სიმპტომი. მისი გამომწვევი შეიძლება იყოს:

• ინფექცია – უმეტეს შემთხვევაში სიცხის გამომწვევი არის ინფექცია. სიცხე ეხმარება ადამიანის ორგანიზმს ინფექციის წინააღმდეგ ბრძოლაში, კერძოდ: ამ დროს ხდება სხეულის ბუნებრივი დამცავი მექანიზმების სტიმულირება.
• ჩაფუთვა/გადახურება – ჩვილებს, განსაკუთრებით ახალშობილებს, შეიძლება ჰქონდეთ სიცხე თუ ზედმეტად ჩაფუთულები არიან. მიუხედავად ამისა, როდესაც საქმე გვაქვს ჩვილთან, შესაძლებელია სიცხე სერიოზულ პრობლემაზე მიგვითითებდეს, ამიტომ უმჯობესია მივიყვანოთ ექიმთან და მან შეაფასოს ბავშვის მდგომარეობა.
• აცრები – აცრის შემდგომ დაბალი სიცხე არ არის უჩვეულო.
• კბილების ამოჭრა – კბილების ამოჭრამ შესაძლებელია გამოიწვიოს დაბალი სიცხე, თუმცა, თუ ტემპერატურა ასცდა 37.8 გრადუსს, დიდი ალბათობით კბილები არაფერ შუაშია.

როდის მიგვითითებს სიცხე სერიოზულ პრობლემაზე?

ბავშვებს, ვისაც აქვთ სიცხე 38.9-ზე  ნაკლები, არ სჭირდებათ ხოლმე მედიკამენტი. გამონაკლისია მდგომარეობა, როდესაც ბავშვი არ გრძნობს თავს კარგად, აქვს დისკომფორტი. მნიშნელოვანი გამონაკლისია: თუ ჩვილი არის 3 თვის ან ნაკლების, აქვს ტემპერატურა 38 ან მეტი, აუცილებლად დაურეკეთ ექიმს ან წადით კლინიკაში დაუყონებლივ.

თუ ბავშვის ასაკი არის 3 თვიდან 3 წლამდე, აქვს სიცხე 39 ან უფრო მაღალი, ამ შემთხვევაში დაურეკეთ ექიმს და ის გეტყვით როგორ მოიქცეთ. უფრო დიდი ბავშვის შემთხვევაში, აუცილებლად დააკვირდით მის ქცევას, აქტიურობას.

დიდი ალბათობით დაავადება არ არის სერიოზული, თუ:

• თუ ბავშვი აქტიურად არის ჩართული თამაშში
• კარგად ჭამს და სვამს
• არის ფხიზლად და იღიმის
• აქვს კანის ნორმალური ფერი

არავითარ შემთხვევაში არ ინერვიულოთ თუ ბავშვი არ ჭამს კარგად სიცხის დროს. ეს ბუნებრივია. მთავარია მიიღოს სითხე, რათა არ მოხდეს დეჰიდრატაცია (დეჰიდრატაცია – როდესაც ორგანიზმი კარგავს იმაზე მეტ სითხეს, ვიდრე იღებს).

რისი გაკეთება შეუძლია მშობელს?

 შეინარჩუნეთ ოთახში გრილი ტემპერატურა.

• დარწმუნდით რომ ბავშვს აცვია თხლად, ისე რომ არ გადახურდეს.
• ეცადეთ მისცეთ დიდი რაოდენობით სითხე, თუნდაც წვენის სახით. იდეალურია ელექტროლიტების ხსნარი (იყიდება ნებისმიერ აფთიაქში).
• შეათანხმეთ ექიმთან სიცხის დამწევი მედიკამენტის მიცემის დოზა და დრო.

ყველა მშობელმა უნდა იცოდეს:

 იბუპროფენი გამოიყენება მხოლოდ 6 თვის ასაკის ზემოთ ბავშვებში. არ უნდა მივცეთ ბავშვს, რომელიც მუდმივად აღებინებს ან აქვს დეჰიდრატაცია.

• არავითარ შემთხვეაში არ დაალევინოთ ბავშვს ასპირინი სიცხის ან დისკომფორტის მოსახსნელად!!! მისი გვერდითი ეფექტები მოიცავს კუჭის გაღიზიანებას, სისხლდენას ნაწლავში და ყველაზე სერიოზულ – რეიეს სინდრომს (შეუძლია ყველა ორგანოს დაზიანება, განსაკუთრებით ტვინის და ღვიძლის).
• თუ ბავშვი აღებინებს და ვერ ასმევთ სიცხის დამწევ საშუალებას, შეგიძლიათ გამოიყენოთ სიცხის დამწევი რექტალური სანთლები.