რა უნდა გაითვალისწინოთ სარბენი ბილიკის შეძენისას

სარბენი ბილიკი საუკეთესო შენაძენია როცა დარბაზში ან ქუჩაში ვარჯიშს ვერ ახერხებთ. დარბაზში სარბენი ბილიკის გამოყენება ერთია, მაგრამ სახლისთვის მისი არჩევა სხვა საკითხია. კარგი სარბენი ბილიკი არც თუ ისე იაფი ღირს, ამიტომ მის შეძენამდე კარგი იქნება, თუ მის ყველა მახასიათებელს შეისწავლით და ისე შეარჩევთ სასურველ სავარჯიშო მოწყობილობას.

გირჩევთ გაითვალისწინოთ შემდეგი ფაქტორები:

• ბიუჯეტი – რამდენის დახარჯვა გსურთ

• ყურადღება მიაქციეთ აქვს თუ არა გულისცემის მთვლელი და სხვა პროგრამული მახასიათებლები

• რამდენი ადამიანი შეძლებს მის გამოყენებას და რა სიხშირით

• ზომა – დასაკეცი ჯობია თუ არა

• ღვედის სიგრძე და გამძლეობა

ძრავა

სარბენი ბილიკის ძრავა პირდაპირ გავლენას ახდენს მის ხარისხზე და იმაზე, თუ როგორ იგრძნობთ თავს ვარჯიშისას. ძრავის მახასიათებლების დადგენა შეიძლება დამაბნეველი პროცესი აღმოჩნდეს. ამის გასაადვილებლად ეძებეთ მინიმუმ 1.5 ცხენის ძალის (CHP) მქონე ძრავიანი ბილიკი. თუ ხშირად აპირებთ მის გამოყენებას, უკეთესია, აირჩიოთ 2.5-დან 3.0-მდე CHP.

ტექნიკური მახასიათებლები

• ღვედის სიგრძე: სირბილისთვის აუცილებელია, რომ ღვედი იყოს მინიმუმ 122 სმ სიგრძეში და 46 სმ სიგანეში. თუ 180 სმ–ზე მაღალი ხართ, მაშინ მინიმუმ 132 სმ სიგრძის ღვედი დაგჭირდებათ.

• მართვის პანელი: ის უნდა იყოს ადვილად ხელმისაწვდომი და მარტივად გასაგები.

• დახრილობა: ზოგიერთ სარბენ ბილიკს აქვს დახრის ფუნქციაც. შეგიძლიათ ამ ფუნქციის წყალობით შექმნათ ილუზია, თითქოს აღმართზე ადიხართ, რაც მეტად დაგეხმარებათ კუნთების ტონუსში მოყვანაში.

• ამტანობა წონასთან მიმართებაში: ეს გასათვალისწინებელია იმ შემთხვევაში, თუ დიდი წონა გაქვთ. დააკვირდით წონის მაქსიმალურ მაჩვენებელს და თავის დაზღვევის მიზნით გამოაკელით დაახლოებით 22 კგ.

• სიჩქარე: თუ ბილიკზე სიარულის გარდა სირბილსაც აპირებთ, შეარჩიეთ ისეთი, რომელსაც სიჩქარე მინიმუმ 16 კმ/სთ ექნება.

• სიმყარე: სარბენი ბილიკი არ უნდა ირყეოდეს ვარჯიშისას. როდესაც მასზე დარბიხართ ან თუნდაც დადიხართ, მისი კორპუსი უნდა დარჩეს სტაბილურ მდგომარეობაში. 

სივრცე და ზომები

სარბენი ბილიკი მაღაზიაში ბევრად უფრო პატარა ჩანს, ვიდრე სინამდვილეში თქვენს ოთახში იქნება, ასე რომ ყიდვამდე დარწმუნდით, რომ კარგად გაზომეთ მისთვის განკუთვნილი ფართი. დასაკეცი სარბენი ბილიკი კარგი აზრია, მაგრამ დაკეცილ მდგომარეობაშიც საკმაო ადგილს იკავებს.

შეამოწმეთ სანამ იყიდით

ეს შეიძლება არ იყოს მარტივი პროცესი და ბევრი დროც წაგართვათ, მაგრამ აუცილებლად შეამოწმეთ მოწყობილობა ყიდვამდე, თუ ამისი საშუალება გექნებათ. შეადგინეთ თქვენთვის საინტერესო სარბენი ბილიკებისა და მათი მახასიათებლების სია, გაატარეთ მინიმუმ 10 წუთი თითოეულ სარბენ ბილიკზე. დარწმუნდით, რომ სანდო და უსაფრთხოა. მასზე სიარულის დროს ნახეთ სად აქვს ბოთლის დასადები, აქვს თუ არა ადგილი მუსიკალური პლეერის ან მობილური ტელეფონის მოსათავსებლად და ა.შ. გაითვალისწინეთ, რომ ვარჯიშის დროს თავს უნდა გრძნობდეთ მაქსიმალურად კომფორტულად და არცერთი მიზეზის გამო არ უნდა მოგიწიოთ ვარჯიშის შეწყვეტა.

საბოლოო გამოყენება

სარბენი ბილიკის სახლში მიტანის შემდეგ, უამრავი შესაძლებლობა გექნებათ, გამოსცადოთ სხვადასხვა სავარჯიშო პროგრამა. სარბენი ბილიკის ვარჯიშები საკმაოდ მოსაწყენი ხდება, თუ სულ ერთსა და იმავეს აკეთებთ. გადმოიწერეთ სავარჯიშო აპლიკაციები, ყოველი ვარჯიშის დროს აკონტროლეთ პულსი, წონა, დარწმუნდით, რომ საკმარისი დრო დაუთმეთ ყველა ვარიაციას, რათა თქვენი ახალი სარბენი ბილიკი მალევე არ აღმოჩნდეს მიტოვებული და კუთხეში მიგდებული. რაც მთავარია, არ დაგავიწყდეთ ჩვენი ბილიკების დათვალიერება.