რა არის ჩუტყვავილა?

ჩუტყვავილა არის მწვავე  ვირუსული ინფექცია. დაავადებას იწვევს ჩუტყვავილა-ზოსტერის ვირუსი (VZV). ამ დროს მთელ სხეულზე ჩნდება გამონაყარი, რომელიც იწვევს ქავილს და თან ახლავს გაციების მსგავსი სიმპტომები.

ვაქცინის წყალობით დღესდღეობით ის ძალიან იშვიათია. ჩუტყვავილას საწინააღმდეგო აცრა კეთდება 12-15 თვეზე და შემდგომ 4-6 წელზე.

ჩუტყვავილას ნიშნები და სიმპტოები

ჩუტყვავილა იწყება კლასიკური გამონაყარის გარეშე სიცხით, თავის ტკივილით, ყელის ან მუცლის ტკივილით. ეს სიმპტომები შესაძლებელია გაგრძელდეს რამდენიმე დღე და სიცხე ავიდეს 38.3-38.8 გრადუსამდე.

• თავდაპირველად გამონაყარი ჩნდება მუცელზე ან ზურგზე და სახეზე. შემდგომ კი ვრცელდება თითქმის მთელ სხეულზე. გამონაყარი არის წითელი და იწვევს ქავილს.
• გამონაყარი ჩნდება წითელი და პატარა ბორცვების სახით, რომელიც ჰგავს მუწუკს ან მწერის ნაკბენს. ისინი ნელნელა ჩნდება 2-4 დღის განმავლობაში, შემდგომ კი გარდაიქმნება თხელკედლიან ბუშტუკად, რომელიც სავსეა სითხით. ბუშტუკები შემდგომ სკდება, ტოვებს ღია ჭრილობებს. საბოლოოდ, იქერცლება და იკეთებს ყავისფერ ფუფხს.

არის თუ არა ჩუტყვავილა გადამდები?

დიახ! ჩუტყვავილა ძალიან გადამდები ინფექციაა. ის ვრცელდება როგორც ჰაერ-წვეთოვანი გზით (ხველა, დაცემინება), ასევე პირდაპირი კონტაქტით პაციენტის ლორწოსთან, ნერწყვთან ან დაავადებულის ბებერას სითხესთან. დაავადება გადამდებია გამონაყარის გამოჩენამდე  2 დღით ადრე მანამ, სანამ ყველა ჭრილობა არ გაიკეთებს ფუფხს.

ჩუტყვავილას მკურნალობა

ჩუტყვავილას იწვევს ვირუსი, შესაბამისად, ანტიბიოტიკის მიღებას არანაირი აზრი არ აქვს! ანტიბიოტიკი ინიშნება მხოლოდ იმ შემთხვევაში, თუ მოხდა ღია ჭრილობების დაინფიცირება ბაქტერიით. ბავშვებში კი ეს საკმაოდ ხშირია რადგან ისინი იფხანენ და კაწრავენ ამ ჭრილობებს.

ექიმმა შესაძლებელია დანიშნოს სიმპტომური მკურნალობა. ზოგჯერ ინიშნება ანტივირუსული წამლები, თუ პაციენტს უკვე აქვს ჯანმრთელობასთან დაკავშირებული გარკვეული პრობლემები. აუცილებელია ექიმთან ვიზიტი კონკრეტული პაციენტის მდგომარეობის მიხედვით მკურნალობის დასანიშნად.