პირველი ტიპის დიაბეტი ბავშვებში-როგორ მოვიქცეთ?

დიაბეტი-ეს ის სიტყვაა, რომელიც ყველა ადამიანს აშინებს და კიდევ უფრო საშიში ხდება მაშინ, როცა საქმე ჩვენს შვილებს ეხება.

დიაბეტით დაავადებულ ადამიანთა დაახლოებით 95%-ს აქვს მეორე ტიპის დიაბეტი, დანარჩენ 5%-ს კი პირველი ტიპის დიაბეტი.

ბავშვთა ასაკში ძირითადად სწორედ პირველი ტიპის, ანუ ინსულინდამოკიდებული დიაბეტი გვხვდება,თუმცა ბოლო დროს, იმატა მეორე ტიპის დიაბეტის შემთხვევებმაც ბავშვებში, რაც შესაძლოა მათ წონაში მატებასთან, ნაკლებ ფიზიკურ აქტივობასთან იყოს დაკავშირებული

პირველი ტიპის დიაბეტის დროს ორგანიზმის იმუნური სისტემა უცხოდ აღიქვამს კუჭქვეშა ჯირკვლის ბეტა-უჯრედებს და მათ მიმართ წარმოქმნის ანტისხეულებს. სწორედ ეს ბეტა-უჯრედები გამოიმუშავებენ ინსულინს, რომელიც აუცილებელია იმისათვის, რომ გლუკოზა მოხვდეს უჯრედებში

ბეტა-უჯრედების აუტოიმუნური დაზიანების შედეგად ვითარდება ინსულინის აბსოლიტური უკმარისობა, რაც სისხლში გლუკოზის დონის მატებას იწვევს

დიაბეტი შემდეგი სიმპტომებით ვლინდება:

• წყურვილის და შიმშილის გაძლიერებული შეგრძნება
• ხშირი შარდვა
• წონის უეცარი კლება
• დაღლილობა
• გაღიზიანებადობა და ქცევის ცვლილებები

დიაბეტის დიაგნოზი უნდა დაისვას ადრეულ ეტაპზევე და ადამიანმა მთელი ცხოვრების მანძილზე უნდა დაიცვას ის რეკომენდაციები, რასაც ექიმი მისცემს. ეს კი მინიმუმამდე შეამცირებს იმ ქრონიკული გართულებების რისკს, რომლებიც ქვემოთაა ჩამოთვლილი:

• გულ-სისხლძარღვთა დაავადებები
• დიაბეტური რეტინოპათია- ბადურას სისხლძარღვების დაზიანება, რამაც შეიძლება მხედველობის დაქვეითებამდე ან სიბრმავემდე მიგვიყვანოს
• დიაბეტური ნეფროპათია- თირკმლის დაზიანება
• დიაბეტური ნეიროპათია- ნერვების დაზიანება

დიაგნოზის დასმისთვის საჭიროა განისაზღვროს სისხლში გლუკოზის დონე დღის ნებისმიერ დროს და უზმოზე, აგრეთვე გლიკოზილირებული ჰემოგლობინი

იმისათვის რომ მოხდეს პირველი ტიპის დიაბეტის, მეორე ტიპის დიაბეტთან დიფერენცირება შესაძლებელია დამატებით ჩატარდეს კვლევა აუტოანტისხეულებზე

რაც შეეხება მკურნალობას, მნიშვნელოვანია გაანალიზოთ, რომ ბავშვს ის მთელი ცხოვრების განმავლობაში დასჭირდება და გულისხმობს სისხლში გლუკოზის მონიტორიგს, ინსულინოთერაპიას, ჯანსაღ კვებას, რეგულარულ ფიზიკურ აქტივობას