დედის და ბავშვის პირველი 24 საათი მშობიარობის შემდეგ

ფიზიოლოგიურმა მშობიარობამ კარგად ჩაიარა და ბავშვიც ჯანმრთელი დაიბადა. რა ხდება პირველი 24 საათის განმავლობაში?

როგორ გამოიყურება ახალდაბადებული ბავშვი?

როცა თქვენი შვილი დაიბადება, მისი კანის ფერი შეიძლება იყოს  წითელი, მოლურჯო, მუქი იასამნისფერი, თუმცა სუნთქვის დაწყებასთან ერთად ფერიც ნორმაში ჩადგება.

მის კანზე შეიძლება იყოს, სისხლი ან ხაჭოსებრი საცხი, რომელსაც დამცველობითი ფუნქცია აკისრია.

დაბადებისთანავე  თქვენს ბავშვს მოათავსებენ თქვენს გულმკერდზე რათა მოხდეს კანით კანთან კონტაქტი, რაც აუცილებელია:

• ახალშობილის სხეულის ნორმალური ტემპერატურის შენარჩუნებისთვის
• ბავშვის კანზე დედის მიკრობული ფლორის კოლონიზაციისთვის
• ლაქტაციის პროცესის სტიმულირებისთვის
• დედასა და ბავშვს შორის მჭიდრო ფსიქოემოციური კავშირის დამყარებისთვის

აპგარის შკალა

ეს არის მეთოდი, რომლის მიხედვითაც აფასებენ ახალშობილის სასიცოცხლო ფუნქციებს დაბადებისას და დაბადებიდან 5 წუთის შემდეგ. შკალა მოიცავს შემდეგ კრიტერიუმებს: გულის ცემა, კანის ფერი, სუნთქვა, კუნთების ტონუსი და რეფლექსები. მაქსიმალური ქულაა 10.

7-10 ქულის ინტერვალი ნორმადაა მიჩნეული

მომყოლის დაბადება

ბავშვის დაბადების შემდეგი ეტაპია მომყოლის დაბადება, რომელიც შედგება პლაცენტისგან, სანაყოფე გარსისა და ჭიპლარისგან. ამისათვის თქვენ კიდევ რამდენიმე გაჭინთვა დაგჭირდებათ.

რა შეიძლება იგრძნოთ  პირველი 24 საათის განმავლობაში?

ამ პერიოდში სხვადასხვა ემოცია, როგორიცაა სიხარული, დაღლა, ნერვიულობა სავსებით ნორმალურია. რაც შეეხება ფიზიკურ მდგომარეობას, შესაძლებელია გქონდეთ

• სისხლიანი გამონადენი საშოდან
• ტკივილები, რაც საშვილოსნოს შეკუმშვასთანაა დაკავშირებული
• ტკივილი შეიძლება გამოწვეული იყოს ასევე ნაკერებით შორისის მიდამოში.

პირველი კვება

ძუძუთი კვება დაბადებიდან მალევე იწყება. მის სწორად განხორციელებაში კლინიკის თანამშრომლები დაგეხმარებიან. პირველად რძეს, რომელიც მოყვითალო სითხეა ხსენი ეწოდება. მას დიდი მნიშვნელობა აქვს ახალშობილისთვის

ძილი

ახალშობილები  დღის უმეტეს ნაწილს, დაახლოებით 18 საათს ძილში ატარებენ და ეს სავსებით ნორმალურია.

რას ხედავს და რა ესმის  ახალშობილს?

თქვენს ბავშვს თქვენი ხმა ესმის ფეხმძიმობის მეორე ტრიმესტრის ბოლოდან და იგი იცნობს მას მაშინვე, როგორც კი დაელაპარაკებით. ამას ის თქვენსკენ თავის მოტრიალებით გამოხატავს.

რაც შეეხება მის მხედველობას, დაბადებისას ის საკმაოდ ბუნდოვანია.