როგორ მოქმედებს ოთახის ფერი ბავშვის ძილზე?

ახდენს თუ არა ოთახის ფერი გავლენას ბავშვის ხასიათზე და ძილზე? დიახ! არსებობს ცალკე დარგი, რომელიც შეისწავლის ფერის ზემოქმედებას ადამიანის აღქმაზე, ხასიათზე  და გონებრივ მდგომარეობაზე. ამ დარგს ეწოდება – ,,ფერის ფსიქოლოგია’’.

ყველაზე არასასურველი ფერები ბავშვის ოთახისთვის

 წითელი/ნარინჯისფერი: წითელი ზრდის ოთახის ენერგიის დონეს. ინტენსიური წითელი ტოვებს აღგზნების და მერყეობის შეგრძნებას. ამ ფერის ოთახი ენერგიით ავსებს ადამიანს. კვლევები ადასტურებს, რომ წითელმა ფერმა შესაძლებელია გამოიწვიოს წნევის, სუნთქვის სიხშირის და პულსის მომატება. ამ მიზეზების გამო, წითელი ითვლება ძალიან მასტიმულირებელ, აღმგზნებ ფერად ბავშვის ოთახისთვის. ეს ყველაფერი ეხება ნარინჯისფერსაც.

ყვითელი: ყვითელი არის უფრო ბედნიერი ფერი, რადგან ის გვახსენებს გარეთ, მზის სხივებში გატარებულ დროს. ის ასოცირდება დილასთან ან შუადღესთან, ამიტომ ყვითელი არის დიდებული ფერი სამზარეულოსთვის. მკრთალი ყვითელი, რომელიც გადადის თეთრ ფერში, ვიზუალურად ადიდებს ოთახს. ამიტომ ის შესანიშნავი არჩევანია პატარა ოთახებისთვის, როგორიცაა საპირფარეშო, შემოსასვლელი და ა.შ. თუმცა, რაოდენ გასაკვირიც არ უნდა იყოს, კველევებმა აჩვენა, რომ ადამიანები კარგავენ ტემპერამენტს ყვითელი ინტერიერის მქონე სახლში. ბავშვებიც უფრო მეტად ტირიან ამ ფერის ოთახში. აქედან გამომდინარე, სახლში დიდი დოზით ყვითელი ფერი ასოცირდება აღელვებასთან. ამიტომ უმჯობესია ბავშვის ოთახისთვის სხვა ფერი შეარჩიოთ.

საუკეთესო ფერები ბავშვის ოთახისთვის

ლურჯი/იისფერი: ლურჯ ფერს აქვს მიდრეკილება წნევის, სუნთქვის სიხშირის და პულსის შემცირებისკენ. ამ მიზეზით ის ითვლება მშვიდ, მყუდრო და მომადუნებელ ფერად. ამიტომ ლურჯი ფერი რეკომენდირებულია საძინებელი ოთახებისთვის. გაითვალისწინეთ, რომ ფერმკრთალი, პასტელისფერი ლურჯი გამოიყურება ძალიან ცივად. ამიტომ არ გირჩევთ ამ ფერს, უმჯობესია უფრო იასამნისფერში გარდამავალი ლურჯი ფერი. არ შეარჩიოთ მუქი ლურჯი, რადგან ის გამოიყურება ძალიან მოსაწყენად.

მწვანე: და ჩვენ გვყავს გამარჯვებული! ეს არის მწვანე. ფერებს შორის ის ითვლება დასვენებისთვის საუკეთესო ფერად. რადგან მწვანე არის მზის ფერის – ყვითელის და დამამშვიდებელი ლურჯი ფერის კომბინაცია, ის ხელსაყრელია ნებისმიერი ოთახისთვის. მწვანე ფერი ტოვებს რელაქსაციის შეგრძნებას და ამასთან ერთად თბილი ფერია. ასევე, კარგი დამხმარეა სტრესის მოსახსნელად.