როგორ მოვამზადოთ ბავშვი ოჯახის ახალი წევრისთვის?

ოჯახში პატარას დაბადება დიდ ცვლილებებთანაა დაკავშირებული და ამ ცვლილებებთან შეგუება თქვენი უფროსი შვილის ან შვილებისთვის შესაძლოა გარკვეულ სირთულეებთან იყოს დაკავშირებული

პირველ რიგში ვისაუბროთ იმაზე, თუ როდის და როგორ უნდა ამცნოთ მათ ოჯახის ახალი წევრის შესახებ

ექსპერტები თვლიან, რომ რაც უფრო მეტი დრო აქვს ბავშვს იმ აზრთან შესაგუებლად, რომ მას ეყოლება პატარა და ან ძმა, მით უკეთესია. საუკეთესო მომენტია, როცა მუცელი უკვე შესამჩნევია.

კლინიკური ფსიქოლოგის, ექიმ მენდი სილვერმენის აზრით, საუბარი ადრე უნდა დაიწყოთ სუროგაციის ან ბავშვის აყვანის შემთხვევაშიც.

ის თვლის, რომ ბავშვებს უნდა ჰქონდეთ საკმარისი დრო იმისთვის, რომ დასვან ყველა ის კითხვა, რაც აინტერესებთ. მშობლებმა უნდა აუხსნან შვილებს, რომ  ახალი წევრი მათი ოჯახისთვის სასიამოვნო სიახლეა და ამ სიახლესთან შეგუებას გარკვეული დრო დასჭირდება, რაც სავსებით ნორმალურია.

თუ თქვენი უფროსი შვილი 1-2 წლის ასაკშია, მან შესაძლოა ბოლომდე ვერ გაიაზროს ის, თუ რა ხდება სინამდვილეში, მაგრამ თქვენ მაინც უნდა ელაპარაკოთ მას და მისთვის სიტყვები “და”, ძმა” ნელ-ნელა ნაცნობი გახდება. თუ სახელი მოფიქრებული გაქვთ გამოიყენეთ ეს სახელი ხშირად და პატარას დაბადების შემდეგ უფროსი შვილისთვის რაიმე განსაკუთრებული გააკეთეთ.

კლინიკური ფსიქოლოგის, ექიმ კრისტინ კეროტერის აზრით, 2-4 წლის  ბავშვებს არ მოსწონთ ის, რომ მშობლების ყურადღება უნდა გადანაწილდეს. ამ ასაკის ბავშვს უნდა აუხსნათ, რომ თქვენი ოჯახი იზრდება, შეგიძლიათ დაიხმაროთ სხვადასხვა გადაცემები, წიგნები, მულტფილმები პატარა ბავშვების შესახებ.

4-6 წლის ასაკის ბავშვს უთხარით, რომ მას შეეძლება თავის დასთან ან ძმასთან ერთად თამაში. აუხსენით, რომ პატარას დედის და მამის დახმარება დასჭირდება, თუმცა ხაზი გაუსვით იმ ფაქტს, რომ თქვენ ორივე ერთნაირად გიყვართ.

სკოლის ასაკის ბავშვები კი ჩართეთ სამზადისში, დაიხმარეთ ტანსაცმელების, სათამაშოების არჩევაში, ოთახის მოწყობაში და მადლობა გადაუხადეთ გაწეული დახმარებისთვის.

თქვენი უფროსი შვილისთვის აგრეთვე მნიშვნელოვანია იმის ცოდნა, თუ რა სირთულეებია მოსალოდნელი

მან უნდა იცოდეს რომ პატარას დასჭირდება მუდმივი ყურადღება, პამპერსის გამოცვლა, ჭამა, უნდა უთხრათ ისიც, რომ შესაძლებელია მთელი ღამე არ დაიძინოს და იტიროს.

ექიმი კრისტინ კეროტერი თვლის, რომ სასურველია მოიფიქროთ რაიმე რიტუალი, რასაც თქვენს უფროს შვილთან ერთად გააკეთებთ ორსულობისას და ამას გააგრძელებთ ბავშვის დაბადების შემდეგაც.

არ შეგეშინდეთ, თუ ოჯახში ახალი წევრის გამოჩენისთანავე თქვენი თითქოს კარგად მოზადებული უფროსი შვილი პატარასავით დაიწყებს მოქცევას. მან შესაძლოა დაივიწყოს ის ჩვევები, რაც გამომუშავებული ჰქონდა. მაგალითად, შეიძლება მოგთხოვოთ ჩააცვათ პამპერსი, მაშინ როცა პამპერსს უკვე კარგა ხანია დაემშვიდობა. ამას რეგრესული ქცევა ეწოდება, რაც ექიმ სილვერმენის აზრით სავსებით ნორმალურია და მიმართულია ყურადღების მიქცევისკენ.

და ბოლოს, მოამზადეთ უფროსი შვილი იმ პერიოდისთვის, როცა თქვენ სამშობიაროში იქნებით. აუხსენით რომ იქიდან მალე დაბრუნდებით მის დასთან, ან ძმასთან ერთად და თუ რაიმე რიტუალი გქონდათ, აცნობეთ ამის შესახებ იმ ადამიანს, რომელიც თქვენი არყოფნის პერიოდში იზრუნებს ბავშვზე.