რა არის მეექვსე დაავადება და გვეშინოდეს თუ არა მისი ?

მეექვსე დაავადება როზეოლას ან უეცარი ეგზანთემის სახელწოდებითაც შეიძლება შეგხვდეთ. იგი ვირუსული ინფექციაა და მისი გამომწვევია  ადამიანის ჰერპეს ვირუსი 6 და 7

ძირითადად 6 თვიდან 2 წლამდე ასაკში ვლინდება

ბავშვისთვის დამახასიათებელია მაღალი ტემპერატურა (ზოგჯერ 39.5-ზე მეტი) რასაც შეიძლება თან დაერთოს ცხვირიდან გამონადენი, შეშუპებული ქუთუთოები, კისრის ლიმფური კვანძების გადიდება,უმადობა, გაღიზიანებადობა და თხიერი განავალი. ბავშვს ცხელება დაახლოებით 3-5 დღე აღენიშნება

შემდეგ კი ტემპერატურა იკლებს და თავს იჩენს გამონაყარი, რომელიც ძირითადად ლოკალიზებულია კისერზე, სახეზე, ზედა და ქვემო კიდურებზე. იგი რამდენიმე საათიდან რამდენიმე დღემდე გრძელდება

ინფექცია ვრცელდება ლაპარაკის, ხველების, ცემინების დროს, თუმცა გადამდებია მხოლოდ ცხელების ფაზაში და არა მაშინ, როცა კანზე უკვე გამონაყარი ვლინდება

დაავადების გადატანის შემდეგ იმუნიტეტი მთელი ცხოვრების მანძილზე ნარჩუნდება

ტემპერატურის უეცარი მატება და ტიპიური გამონაყარი ექიმისთვის დიაგნოზის დასმის სირთულეს არ წარმოადგენს. მხოლოდ იმ პირებში, ვისაც აქვთ რაიმე გართულება, ან დაქვეითებული იმუნიტეტი, შეიძლება საჭირო გახდეს დამატებით სისხლის ტესტების ჩატარება

უეცარი ეგზანთემა სპეციალურ მკურნალობას არ საჭიროებს და იგი ძირითადად ტემპერატურის დაწევისკენაა მიმართული

გახსოვდეთ, რომ ამ დროს არ გამოიყენება ანტიბიოტიკები, რადგან დაავადებას იწვევს ვირუსი და არა ბაქტერია

არ მისცეთ ბავშვს ასპირინი ვირუსული დაავადებების დროს, რადგან ამან შესაძლოა გამოიწვიოს რეიეს სინდრომი, რაც საკმაოდ მძიმედ მიმდინარეობს

მაღალი ტემპერატურის გამო, დეჰიდრატაციის თავიდან ასაცილებლად იზრუნეთ რომ ბავშვმა საკმარისი რაოდენობის სითხე მიიღოს