რა შეცდომებს უშვებენ მშობლები მანქანით მგზავრობისას?

ბავშვის უსაფრთხოებაზე ზრუნვა  მშობლისთვის ყველაზე მნიშვნელოვანი, პრიორიტეტული საკითხი უნდა იყოს, თუმცა ამ თვალსაზრისით ზოგჯერ ისინი მიუტევებელ შეცდომებს უშვებენ.

როცა ბავშვის უსაფრთხოებაზე ვსაუბრობთ, ერთ-ერთი მნიშვნელოვანი საკითხია ავტომობილში მათთვის განკუთვნილი სავარძლის მოხმარების წესების ცოდნა და გათვალისწინება.

სამწუხაროდ, საქართველოში მშობლების დიდმა ნაწილმა ამ კუთხით ელემენტარული წესებიც კი არ იცის, რის გამოც, პატარებს საფრთხე ექმნებათ.

ვნახოთ მთავარი შეცდომები, რომლებსაც უფროსები ბავშვის ავტომობილით წაყვანის დროს და მათთვის განკუთვნილი სავარძლის მოხმარებისას უშვებენ:

• შეცდომას უშვებთ, თუ ბავშვის სავარძელს მანქანის წინა სკამზე ათავსებთ:

პატარა შეჯახების დროსაც კი, შეიძლება უსაფრთხოების ბალიში  გაიხსნას (გასაგებია, რომ მამა შუმახერზე კარგი მძღოლია, მაგრამ ხომ შეიძლება სხვა შეგეჯახოთ?!). გიფიქრიათ ასეთ დროს პატარას რა შეიძლება დაემართოს?  ბავშვი საჭესთან, უფროსის კალთაში ხომ  წარმოუდგენელი უპასუხისმგებლობაა?!

• შეცდომას უშვებთ, თუ ფიქრობთ, რომ მანქანაში ბავშვს ხელში დაიჭერთ და ის უსაფრთხოდ იქნება:

ეს  ფიზიკის ელემენტარულ კანონებს ეწინააღმდეგება. ბავშვის ხელში დაჭერა, ისე რომ ის არ დაზიანდეს მსუბუქი შეჯახების დროსაც კი, თითქმის შეუძლებელია.

• შეცდომას უშვებთ, თუ ბავშვს სპეციალურ სავარძელში სვამთ, მაგრამ სავარძელს მანქანაში არ ამაგრებთ:

 ეს კიდევ ერთი აბსურდია და შესაძლოა, ორმაგად სახიფათო იყოს.

• ხშირად სავარძლის ყიდვისას მშობლებს აქვთ ასეთი კითხვა – აქვს თუ არა სავარძელს „დაწოლის რეჟიმი“?

უსაფთხოების წესებიდან გამომდინარე, სავარძელში დაწოლა არ შეიძლება. შესაბამისად, ვერ ნახავთ ავტომობილის სავარძელს, რომელსაც ეს ფუნქცია ექნება. შეიძლება სავარძელი ოდნავ უკან გადადიოდეს.

სამწუხაროა ის ფაქტი, რომ ე.წ. ქარსითთან დაკავშირებით, საქართველოს ამჟამინდელი კანონმდებლობა არ არის მკაცრი და აცდენილია დასავლურ ქვეყნებში არსებულ კანონებს და სტანდარტებს. გასაგებია, რომ შესაძლოა პოლიტიკოსებს ფინანსური ჯარიმების შემოღება არ სურდეთ მოსახლეობისთვის, მაგრამ ყველამ უნდა გავაცნობიეროთ, რომ პატარების უსაფრთხოება უმნიშვნელოვანესია.

ვნახოთ, რა წესებს ითვალისწინებენ ცივილიზებულ ქვეყნებში ავტომობილის საბავშვო სავარძლის მოხმარებასთან დაკავშირებით, ქვეყნებში, სადაც საქართველოსთან შედარებით გაცილებით უსაფრთხო გზებია. ყველა მშობელს ვურჩევთ მათ გათვალისწინებას:

• სავარძელი უნდა შეირჩეს ბავშვის წონის მიხედვით (ნახეთ გრაფიკი ქვემოთ):

გაითვალიწინეთ, რომ ერთი სავარძელი არ გეყოფათ. ბავშვის ზრდასთან ერთად, სავარძლის გამოცვლაც დაგჭირდებათ. რა თქმა უნდა, ეს დამატებით ხარჯებთან არის დაკავშირებული, მაგრამ სჯობს სასეირნო ეტლზე, მანეჟზე და სხვა ნივთებზე დაზოგოთ თანხა და ბიუჯეტი გამოყოთ ყველაზე მნიშვნელოვანისთვის – ავტომობილის სავარძლისთვის.

• უმნიშვნელოვანესია მანქანაში ე.წ. ქარსითის სწორად დაყენება:

ეს დასავლურ ქვეყნებში მცხოვრები ადამიანების თავის ტკივილიცაა, რადგან ბევრი მომხმარებელი მას მანქანაში სწორად ვერ ამაგრებს. კარგად წაიკითხეთ ინსტრუქცია და დარწმუნდით, რომ სავარძელს მანქანაში სწორად ამონტაჟებთ.

• 2 წლამდე (15 კგ-მდე) ბავშვი აუცილებლად უკანა ხედვის (შემობრუნებულ) სავარძელში უნდა იჯდეს:

ბავშვებს აქვთ შედარებით დიდი თავი და სუსტი კისერი. ავარიის დროს, ბიძგით ბავშვი თუ წინ წავიდა, შეიძლება მან ხერხემლის სერიოზული დაზიანება მიიღოს.

• და რაც ყველაზე მთავარია, ბავშვი მანქანით მგზავრობის დროს ყოველთვის უნდა იჯდეს სპეციალურ სავარძელში და ამ საკითხთან დაკავშირებით არ არსებობს არანაირი გამონაკლისი:

ეს წესი უნდა გაითვალისწინოთ მანამდე, სანამ ბავშვი 145 სმ-ს არ მიაღწევს. როცა 145 სმ-ს  მიაღწევს, ის უნდა დასვათ სპეციალურ ასამაღლებელ „ბუსტერზე“.  „ბუსტერი“ საჭიროა იმისთვის, რომ ღვედი ბავშვს კარგად გაუკეთდეს (ღვედი უნდა გაუკეთდეს ბავშვს ორ ადგილას, მხოლოდ მუცელზე შეკვრა არ არის საკმარისი. აუცილებელია, რომ ის კისრამდე, მუცლის ზედა ნაწილზეც დაამაგროთ).

ღვედის მხოლოდ მუცელზე შეკვრა არ არის უსაფთხო, რადგან პატარას სხეულის ზედა ნაწილს ის საკმარისად ვერ იჭერს.

ავტომობილის საბავშვო სავარძლის გამოყენება ამერიკასა და ევროპაში უკვე 50 წელია სავალდებულოა. მის გარეშე ბავშვის წაყვანა დანაშაულია და ცივილიზებულ ქვეყნებში ამის გამო ადამიანები ციხეშიც კი ხვდებიან. მკაცრმა მიდგომამ ათიათასობით ოჯახი დიდ ტრაგედიას გადაარჩინა, თუმცა აღსანიშნავია ისიც, რომ მიუხედავად სიმკაცრისა, დღესაც კი, ამერიკაში ბავშვების 57%-ის სიკვდილიანობის მიზეზი ავტოკატასტროფაა. საქართველოში, ჩვენს გზებზე კი, ავარიების შედეგად ყოველდღიურად ბავშვი იღუპება.

იყავით ფრთხილად და არ გარისკოთ პატარა მონაკვეთზეც კი! ნუ ჩააგდებთ ბავშვებს საფრთხეში!

ავტომობილის სავარძლის ასარჩევად უფასო კონსულტაციას გაგიწევენ nido baby-ს მაღაზიაში (ნუცუბიძის 82, მ2-is შენობა) ან nido.ge-ს Facebook გვერდზე აქ