Lenco-ს განვითარების გზა

Lenco არის ტრენდული სამომხმარებლო ელექტრონიკის ბრენდი. მისი სახელწოდება სათავეს იღებს პატარა და მოკრძალებული კომპანიისგან, რომელიც შვეიცარიის ცივ გორაკებში შეიქმნა. 

ლენკო მეორე მსოფლიო ომის დასრულებიდან მალევე დააფუძნა შვეიცარიელმა წყვილმა ფრიცმა და მარი ლაენგებმა, რომლებიც ფიქრობდნენ, რომ ევროპას შეეძლო გარკვეული ინოვაციების წამოწყება განადგურების ხანგრძლივი პროცესის შემდეგ. ფრიცმა და მარიმ შექმნეს საყოფაცხოვრებო ელექტრონიკის საცალო მაღაზია, რომელიც დროთა განმავლობაში გადაიქცა ქარხანად, რომელშიც იწარმოებოდა პროდუქტები და შემდგომ მათ თავიანთვე მაღაზიაში ყიდდნენ. წყვილმა თავიანთი გვარი ცოტათი „შეალამაზა“, რომ უფრო საერთაშორისო ჟღერადობა მიეცათ მისთვის და ქარხანას დაარქვეს სახელი "ლენკო", რომელიც “ლაენგსისგან“ განსხვავებით უფრო მარტივი წასაკითხი და წარმოსათქმელი იყო სხვა ქვეყნის მომხმარებლებისთვის. შვეიცარიელ წყვილს ჰქონდა დიდი ამბიცია, რომ მათი კომპანია გასულიყო გლობალურ მასშტაბებზე და მათ ეს შეძლეს კიდეც სანდო და ხელმისაწვდომი ელექტრონული პროდუქტების წარმოებით, რომლებიც დღემდე მუდმივად ამართლებენ მოლოდინს ზუსტად ისე, როგორც შვეიცარიული საათები. 

60-იან წლებში ლენკომ წარმოადგინა თავისი პირველი რიგის ხარისხის ფირსაკრავები, პროდუქტის კატეგორია, რომლითაც კომპანია დღემდე იწონებს თავს. დიდი ხნის განმავლობაში ეს საკრავები იყო ლენკოს ყველაზე გაყიდვადი პროდუქტი. 60-იანი წლების ბოლოს ლენკომ დიდი ყურადღება მიიპყრო, როდესაც L75 ხმის ჩამწერი პლეერი გამოუშვა. L75 იყო უმაღლესი ხარისხის ხის „მონსტრი“, რომლის წონა დაახლოებით 4 კილოგრამს შეადგენდა და ჰქონდა ძალიან სუფთა ჟღერადობა. მომხმარებლები ხშირად ხუმრობდნენ მოწყობილობის ზომებსა და წონაზე. დროთა განმავლობაში პროდუქტი დაიხვეწა, გახდა მსუბუქი და პორტატული. 

70-იან წლებში ლენკოს ყველაზე „ცხელი“ წლები ჰქონდა, რადგან კომპანიას 1 300-ზე მეტი თანამშრომელი ჰყავდა, რომლებიც 3 სხვადასხვა ქარხანაში მუშაობდნენ. იმ დროისთვის თანამშრომლების ეს რაოდენობა წარმოუდგენლად დიდი იყო განსაკუთრებით ელექტრონიკის კომპანიისთვის, რადგან მაშინ ელექტრონიკა არ იყო ისეთი გავრცელებული, როგორც ახლაა. გარდა ამისა, ლენკო პროდუქციას ექსპორტზე უშვებდა მსოფლიოს 80 სხვადასხვა ქვეყანაში, რაც საკმაოდ შთამბეჭდავია თუნდაც დღევანდელი გადმოსახედიდან. 

1974 წელი კომპანიისთვის განსაკუთრებით მძიმე წელი იყო. სერიოზული დანაკლისი განიცადეს, როცა მარი ლაენგი, კომპანიის გული და სული გარდაიცვალა. კომპანიამ თითქოს მამოძრავებელი ძალა დაკარგა. გარდა ამისა, ამ პერიოდში მთელ მსოფლიოში ეკონომიკური პრობელემები იყო, ნავთობის კრიზისი და ა.შ. ასეთ პირობებში, ბუნებრივია, ფირსაკრავებზე და მსგავს პროდუქტებზე მოთხოვნა საგრძნობლად შემცირდა. კიდევ ერთი პრობლემა წამოჭრა ამომავალი მზის ქვეყნებმა. აზიამ „დატბორა“ ევროპის ბაზარი კარგი ხარისხისა და დაბალი ფასის მქონე პროდუქტით, რამაც საკმარისი ზიანი მიაყენა ევროპულ ბრენდებს, მათ შორის ლენკოსაც. ეს უკანასკნელი იძულებული გახდა შეემცირებინა პროდუქციის წარმოება და პერსონალი. 

1977 წელს Lenco–მ გაკოტრება დაიწყო. მაშინვე დაარსდა Lenco Audio AG, რომლის ამოცანა იყო ლენკოს არსებული პროდუქციის შეკეთება და მსგავსი მომსახურებები. მომდევნო წელს გარდაიცვალა კომპანიის მეორე დამფუძნებელი, ფრიც ლაენგი. ამის შემდეგ ბრენდის სახელი Lenco მიიღო ჰოლანდიურმა Lenco STL ჯგუფმა, რომელიც მდებარეობს ვენლოში. იმ დროს ეს კომპანია ყიდდა დაბალბიუჯეტიან პროდუქტებს, რომელთა უმეტესობა ჰონგ კონგში მზადდებოდა 

90–იანი წლებიდან ლენკო გადავიდა თანამედროვე ელექტრონული მოწყობილობების წარმოებასა და ონლაინ გაყიდვებზე, როგორიცაა ინტერნეტ რადიოები, DAB + რადიოები, DVD ფლეერები, ასევე დინამიკები და ბრენდის ყველაზე მნიშვნელოვანი პროდუქტი – ფირსაკრავები. 

დღესდღეობით ლენკო ყიდის როგორც რეტრო პროდუქტებს, ასევე თანამედროვე ტექნიკას ფიზიკურ და ონლაინ მაღაზიებში. 70 წლიანი გამოცდილების შედეგად კომპანია ახერხებს შეინარჩუნოს დაბალი ფასები ხარისხის გაუმჯობესების პარალელურად. წლების განმავლობაში მრავალი მომხმარებლისთვის ლენკოს პროდუქტები გახდა მათი ყოველდღიური ცხოვრების ნაწილი. ლენკოს ფირსაკრავების წყალობით შეგიძლიათ განიცადოთ უდიდესი ნოსტალგიური ემოციები თანამედროვე ტექნიკასთან ერთად.