რა მივირთვათ ორსულობისას

ტოქსოპლაზმოზისა და ლისტერიოზის განვითარების შიში არის ძირითადი მიზეზი იმისა, თუ რატომ არ უნდა მივირთვათ გარკვეული საკვები თერმული დამუშავების გარეშე.

• ტოქსოპლაზმოზი – პარაზიტული დაავადება, რომელიც ხასიათდება ნერვული სისტემის, კუნთების, მხედველობის აპარატის და სხვ. დაზიანებით
• ლისტერიოზის – ინფექციური დაავადება, რომლის დროსაც შეიძლება განვითარდეს მენინგიტი, მენინგოენცეფალიტი, სეფსისი და სხვ.

ამ დაავადებების გამომწვევები (ლისტერიები და ტოქსოპლაზმები), უმეტეს წილად,  უვნებელია და ორსულის დაზიანება იშვიათად ხდება. მიუხედავად ამისა, მათ შეუძლიათ შეაღწიონ პლაცენტაში და ავნონ  ნაყოფს. თუმცა, ამ დაავადებების გამომწვევები სითბოს მიმართ მგრძნობიარენი არიან და მინიმუმ 2 წუთის განმავლობაში 70° C ტემპერატურაზე ყოფნისას იღუპებიან.

რა შემიძლია ორსულობისას ვჭამო?  რეკომენდაციები, რომლებსაც ვკითხულობთ, ან ვისმენთ, განსხვავებული და ზოგჯერ ურთიერთსაწინააღმდეგოც კია. შევეცდები მოკლედ ვისაუბრო იმ პროდუქტებზე, რომლებიც დაუფიქრებლად შეგვიძლია მივირთვათ და პირიქით, რომლებთანაც სიფრთხილე გვმართებს.

ხილი და ბოსტნეული

ბოსტნეული, სალათები, მწვანილები და ხილი შეგვიძლია მივირთვათ იმდენი, რამდენიც გვსურს, მაგრამ აუცილებელია მათი ჭამამდე საგულდაგულოდ გარეცხვა გამდინარე წყლით.

უნდა ვუფრთხილდეთ  მზა სალათების, კონტეინერებში შეფუთული ხილ-ბოსტნეულის ჭამას, რადან შესაძლოა ამგვარი საკვები წყარო გახდეს ბაქტერიებისა. ჯანმრთელობისათვის იდიალურია ხილისა და ბოსტნეულის დაჭრიდან მალევე მირთმევა.

რძის პროდუქტები

რძე და რძის პროდუქტები, თუკი ისინი პასტერიზებული რძისაგან მზადდება (უმეტესწილად რძის პროდუქტების შეფუთვაზე მითითებულია პასტერიზებულია პროდუქტი, თუ არა), შეგვიძლია დაუფიქრებლად მივირთვათ. მაგალითად იოგურტი, ხაჭო,  ძროხის, ცხვრისა და თხის ყველი. კარგი იქნება თუ ყველს ქერქის თხელ ფენას  მაინც შემოვაცლით და ისე მივირთმევთ.

უნდა ვუფრთხილდეთ უკვე გახეხილი ყველის ყიდვას ან მზა სალათების, რომლებიც შეიცავენ ყველს.

კვერცხი და კვერცხისშემცველი საკვები

კარგად მოხარშული კვერცი და საკვები, რომელშიც კვერცხი თერმულად კარგადაა დამუშავებული, საფრთხეს არ წარმოადგენს.

უნდა ვუფრთხილეთ  უმ და ნახევრადმოხარშულ კვერცხს და საკვებს რომელიც მას შეიცავს.

ხორცი და ზღვის პროდუქტი

შეგვიძლია მივირთვათ ხორცი რომელიც თერმულად კარგადაა დაუშავებული (მოხარშული/შემწვარი).

უნდა ვუფრთხილდეთ  უმ და ნახევრადუმ ხორცსა და ზღვის პროდუქტს, როგორიცაა მაგალითად სისხლიანი სტეიკი, სუში და ზღვის პროდუქტის მარინადები. ასევე აუცილებლად გასათვალისწინებელია, რომ თევზი ვერცხლის წყალს შეიცავს, მისი არასწორი დოზით მიღება კი ორგანიზმისთვის ტოქსიკური შეიძლება აღმოჩნდეს. ამერიკის საკვებისა და მედიკამენტების ასოციაციის (FDA) რეკომენდაციით, ორსულობისა და ძუძუთი კვებისას თევზის  დოზა უნდა შეადგენდეს 340 გრამზე ნაკლებს კვირაში, ესეც ე.წ. მცირე ვერცხლისწყლის შემცველობის თევზებში, როგორიცაა მაგალითად ჭიჭყინა, კალმახი, ქაშაყი, ორაგული.

სასმელები

ძალიან სასარგებლოა სახლში დაწურული  ნატურალური წვენები.  ასევე შეგვიძლია მივირთვათ ნაყიდი წვენები, რომლებიც ხილისა და ბოსტნეულისაგანაა დამზადებული, თუმცა აუცილებლად მივაქციოთ ყურადღება  რაოდენობას, რომ არ მოგვიწიოს დიდი დოზით შაქრის მიღება.

უნდა ვუფრთხილდეთ  დიდი რაოდენობით გაზიან და ენერგო სასმელებს.