როგორ დავიცვათ ჩვენი პატარა კოღოს ნაკბენისაგან?

დათბა და კოღოებიც მომრავლდნენ. მათ შემაწუხებელ ხმას კბენაც „ბონუსად“ მოჰყვება, რაც არც დიდისთვის და მითუმეტეს, არც პატარისთვის არის სასიამოვნო. გთავაზობთ რამდენიმე რჩევას, თუ როგორ დავიცვათ ჩვენი პატარები კოღოსაგან და როგორ მოვიქცეთ კბენის შემთხვევაში.

როგორ ავიცილოთ თავიდან კბენა?

• ჩააცვით ტანსაცმელი, რომელიც მთლიანად დაფარავს კანის ზედაპირს. რეკომენდებულია თხელი წინდების გამოყენებაც
• ჩააცვით ღია ფერის, ყვავილებით დაუჩითავი ტანსაცმელი, რადგან არსებობს მოსაზრება, რომ ყვავილებიანი, მრავალფერიანი ტანსაცმელი იზიდავს კოღოებს
• უმჯობესია, რომ მწერსაწინააღმდეგო საშუალებები სხეულის მაგივრად ტანსაცმელს წავუსვათ ნაზად. დიდი ალბათობით, მწერის საწინააღმდეგო საშუალება, რომელსაც იყენებთ, შეიცავს პიკარიდინს ან გერონიოლს, რომელიც არ უნდა მოხვდეს ბავშვის ხელებსა და თვალზე
• მწერ-საწინააღმდეგო ბადის გამოყენება სახლის ფანჯრებზე – ძალიან კარგი საშუალებაა
• კარგად უნდა დაათვალიეროთ საცხოვრებელი მიდამო, ხომ არაა ცარიელი თუნუქის ქილები, ცარიელი უსუფთაო აუზი ან გამოუყენებელი სათამაშოები, რომლებიც, შესაძლოა, კოღოების მოზიდვის მიზეზი იყოს

როგორ მოვარჩინოთ კოღოს ნაკბენი?

• თუკი აღმოაჩენთ ნაკბენს ბავშვის კანზე, სწრაფად დაადეთ მას ნაკბენზე ყინულის ნატეხი, რაც შეაჩერებს ქავილსა და შეშუპებას
• შეგიძლიათ ზუსტად ნაკბენის ადგილზე წაუსვათ ალუმინის ქლორიდის შემცველი, ბურთულიანი დეოდორანტი
• შეგიძლიათ გამოიყენოთ კალამინის ლოსიონი
• სთხოვეთ ბავშვს, რომ არ მოიქავოს, რადგან ეს შეიძლება ნაკბენის ბაქტერიული დაბინძურების მიზეზი გახდეს
• იმ შემთხვევაში, თუ შეამჩნევთ ნაკბენის გამიზეზებას, შესიებას, შეწითლებას ან ჩირქს – მიმართეთ ექიმს
• თუკი ბავშვს აქვს გულისრევა, ღებინება, თავის ტკივილი და მომატებული ტემპერატურა – სასწრაფოდ მიმართეთ ექიმს

კოღოს ნაკბენის შედეგად განვითარებული ალერგიის სიმპტომებია (რაც იშვიათია, მაგრამ შესაძლებელი):

• ლიმფანგიტი – ლიმფური ძარღვების ანთება, რომელიც ხასიათდება კანზე წითელი ზოლების არსებობით, ზოლის მიმდებარედ კანის გამკვრივებით, დაჭიმულობით და მტკივნეულობით
• ჭინჭრის ციება – ხასიათდება კანზე ჭინჭრის ნასუსხის მსგავსი გამონაყარით, ტემპერატურის მომატებით, თავის ტკივილით
• მსტვინავი სუნთქვა
• ხორხის შესიება

ამ სიმპტომთაგან რომელიმეს არსებობის შემთხვევაში, აუცილებლად მიმართეთ ექიმს.