ბავშვის ჯანსაღი კვება

იმისთვის, რომ ბავშვმა კარგად იკვებოს, ძალ-ღონეს არ ვიშურებთ. ყველაფერს ვცდილობთ, დაწყებული მისი მოქრთამვით (თუ გინდა შოკოლადი, ბროკოლი უნდა ჭამო!), ვედრებით დამთავრებული. როგორც ყველაფერს ცხოვრებაში, ამ თემასაც დაფიქრება და სისტემატური მიდგომა სჭირდება.

გაასინჯეთ ბევრჯერ, ძალიან ბევრჯერ!

პირველ რიგში, არ დააძალოთ ბავშვს. მშობელი თვითონ წვყეტს რას, როდის და სად აჭმევს თავის ბავშვს, ხოლო ბავშვი კი-რამდენს ან, საერთოდ, შეჭამს თუ არა. ბავშვს ხშირად საჭმლის გასინჯვა სჭირდება 15-20 -ჯერ, სანამ მოეწონება. შეიძლება შეეხოს, უსუნოს, უბრალოდ პირი დაადოს, ან, თუნდაც, გასინჯოს და გადმოაფურთხოს. ბოსტნეული განსაკუთრებით დიდი გამოწვევაა, მაგრამ მოთმინებით თუ მიუდგებით საქმეს, “გამარჯვების” დიდი შანსი გექნებათ.

არ გაუკეთოთ მხოლოდ ის, რაც უყვარს

საყვარელ საჭმელთან ერთად შეაპარეთ ის, რაც ნაკლებად უყვარს. დიდი ალბათობით თავიდან არ შეჭამს და შეიძლება დაგღალოთ კიდეც იმის გაკეთებამ, რასაც არ ჭამს, მაგრამ არ დანებდეთ, დროთა განმავლობაში სხვა რაღაცების ჭამას დაიწყებს. თუ ნერვიულობთ ბავშვის არასრულფასოვან კვებაზე, მულტივიტამინების შესახებ გაესაუბრეთ თქვენს პედიატრს.

ბავშვი ასადილეთ ოჯახთან ერთად

კვლევების მიხედვით, ბავშვები, რომლებიც ოჯახთან ერთად კვირაში 5-ჯერ მაინც სადილობენ, უფრო ჯანსაღად იკვებებიან და ნაკლები პრობლემები აქვთ წონასთან დაკავშრებით. ბავშვი როცა ხედავს, რომ უფროსი სხვადასხვა სახეობის საკვებს მიირთმევს, თვითონაც უჩნდება ახალი რაღაცების გასინჯვის სურვილი. იმ შემთხვევაშიც, თუ ბავშვმა გითხრათ, არ მშიაო, მაინც დასვით სუფრაზე რამდენიმე წუთით.

ყურადღება მიაქციეთ სად, როგორ და როდის ჭამს ბავშვი

ბავშვს თუ მაშინ აჭმევთ, როცა მოგთხოვთ, ოჯახთან ერთად სუფრაზე დაჯდომა გაუჭირდება. დათქვით საუზმის, სადილის, ვახშმის და შუალედური წახემსებების დრო. თუ ბავშვმა საჭმელი სხვა დროს მოგთხოვათ, უთხარით, რომ ახლახანს ჭამა და წახემსება მალე უწევს. თამაშის და ტელევიზორის ყურებისას დროს არ აჭამოთ ბავშვს, ბავშვი მაგიდასთან ჭამას უნდა შეეჩვიოს.

შეაჩვიეთ თვითმომსახურებას

იმის მაგივრად, რომ ყველაფერი გადაუღოთ ბავშვს თეფშზე, მიაჩვიეთ თვითმომსახურებას. მოათავსეთ საჭმელი ჯამში და ასწავლეთ პატარა პორციების გადმოღება ისე, რომ ბევრი არ მოუვიდეს.

გაასინჯეთ საჭმელი, სანამ ის მაგიდაზე მოხვდება

წაიყვანთ სუპერმარკეტში და დაიხმარეთ პროდუქტების შერჩევაში. ახალ ხილს თუ დაიანხავთ, რაც აქამდე არ გაუსინჯავს, სთხოვეთ, რომ თვითონ ამოარჩიოს. საჭმელი შეგიძლიათ ბავშვის სხვა აქტივობებშიც მოაქციოთ, მაგალითად, ფერებზე საუბრისას, დაელაპარაკეთ წითელ, ყვითელ და ვარდისფერ პომიდორზე, შემდეგ კი გაასინჯეთ.

საჭმელი არ არის ჯილდო

არასდროს არ გამოიყენოთ საკვები, როგორც ჯილდო. როცა ბავშვს ეუბნებით, რომ უნდა ჭამოს სტაფილო, რათა მიიღოს შოკოლადი, ბავშვი ავტომატურად ასკვნის, რომ შოკოლადი უკეთესია, ვიდრე სტაფილო. მშობლების უმეტესობას ომი აქვს ბავშვის ჭამასთან დაკავშირებით, მაგრამ კვლევები აჩვენებს, რომ რაც უფრო დაწყნარდებით და მსუბუქად მიუდგებით ამ თემას, მით უფრო პოზიტიური შედეგები დადგება ბოლოს.