გულძმარვა ორსულობისას

გულძმარვა (ე. წ. იჟოგა) – ორსულთა უმეტეს ნაწილს აწუხებს. იგი გამოწვეულია კუჭის წვენის საყლაპავში გადასვლით. ორსულობისას, ამას ორი მიზეზი აქვს:

ადრეული ორსულობისას, ორგანიზმის მიერ გამოყოფილი ჰორმონი პროგესტერონი, ხელს უწყობს კუჭსა და საყლაპავს შორის არსებული სფინქტერის (სარქველის) მოდუნებას და ამ გზით ხდება კუჭის მჯავე შიგთავსის საყლაპავში გადმოსვლა. (იხ. სურათი )

ორსულობის გვიან პერიოდში გულძმარვა გამოწვეულია გაზრდილი ნაყოფის ზეწოლით კუჭზე, რაც თავის მხრივ, აგრეთვე ხელს უწყობს ზემოთხსენებული სფინქტერის მოდუნებას.

ულძმარვის ძირითადი სიმპტომები:

• ტკივილისა და წვის შეგრძნება მკერდის ძვლის უკან
• ბოყინი
• სისავსის და სიმძიმის შეგრძნება კუჭში
• პირში ცუდი გემოს შეგრძნება
• მეტეორიზმი (მუცლის შებერილობა)

არის თუ არა საშიში გულძმარვა?

მიუხედავად არასასიამოვნო შეგრძნებისა, გულძმარვა არ წარმოადგენს საშიშროებას არც მომავალი დედიკოებისათვის და არც ნაყოფისათვის. პირიქით, ზოგიერთი მეცნიერი ამტკიცებს, რომ არსებული გულძმარვა ნაყოფის განვითარებისათვის კარგიც კია. რასაც ჰორმონ პროგესტერონის ნაყოფზე სასიკეთო გავლენას უკავშირებენ.

როგორ შევიმსუბუქოთ მდგომარეობა?

• ეცადეთ მიირთვათ მცირე ულუფები და ხშირ-ხშირად
• მოერიდეთ კოფეინის შემცველი სასმელების დალევას (ყავა, ენერგო სასმელები, კოკა-კოლა …)
• მოერიდეთ გაზიანი სასმელების დალევას
• მიიღეთ სითხე ხშირად
• მოერიდეთ ზედმეტად ცხიმიან, მჟავე და ცხარე საკვებს
• შეეცადეთ დაწოლისას ისეთი მდგომარეობა შეარჩიოთ, რომ გულმკერდი კუჭის ზემოთ იყოს მოთავსებული. ამისათვის შეგიძლიათ დაიხმაროთ ბალიში
• შეგიძლიათ მიიღოთ მედიკამენტი, თქვენს ექიმთან შეთანხმებით.