რა არის გესტაციური დიაბეტი და როგორ ვმართოთ ის?

გესტაციური დიაბეტი გვხვდება ორსულობის დროს. იგი ხასიათდება სისხლში მომატებული გლუკოზის დონით. ირღვევა უჯრედების მიერ გლუკოზის მოხმარება და ეს ყველაფერი საბოლოოდ გავლენას ახდენს, როგორც თვით ორსულობაზე, ისე ბავშვის ჯანმრთელობაზე.

როგორც წესი გესტაციური დიაბეტის მქონე ორსულის გლუკოზის დონე  მშობიარობის შემდეგ ნორმას უბრუნდება, თუმცა რისკი იმისა, რომ მომავალში დედას განუვითარდეს მეორე ტიპის დიაბეტი იზრდება, ამიტომ აუცილებელია ექიმთან კონსულტაცია და მუდმივი მონიტორინგი

გესტაციური დიაბეტი ძირითადად უსიმპტომოდ მიმდინარეობს. იგი შეიძლება ნებისმიერ ორსულს განუვითარდეს, თუმცა არსებობს გარკვეული რისკ-ფაქტორები, ესენია:

• 25 წელზე მეტი ასაკი
• ორსულის პრე-დიაბეტური მდგომარეობა
• ოჯახის წევრი, რომელსაც აქვს მეორე ტიპის დიაბეტი
• გესტაციური დიაბეტი წინა ორსულობისას
• წინა ორსულობისას დიდი ზომის, 4 კილოზე მეტი ბავშვის დაბადება
• გაურკვეველი მკვდრადშობადობა
• ჭარბი წონა

ნაყოფის შესაძლო გართულებები:

• დიდი წონის ნაყოფის დაბადება, რამაც თავის მხრივ შესაძლოა გააძნელოს მშობიარობა
• ჰიპოგლიკემია, ანუ სისხლში გლუკოზის დაბალი დონე
• ნაადრევი მშობიარობა და რესპირატორული დისტრეს-სინდრომი, რომელიც იწვევს სუნთქვის დარღვევებს

დედის შესაძლო გართულებები:

• არტერიული ჰიპერტენზია და პრეეკლამფსია
• როგორც დედის, ისე ბავშვის შემთხვევაში იზრდება რისკი იმისა, რომ მათ მომავალში განუვითარდეთ მეორე ტიპის დიაბეტი

გესტაციური დიაბეტის მკურნალობა მოიცავს:

• სისხლში გლუკოზის მუდმივ მონიტორინგს
• ჯანსაღი ცხოვრების წესს
• ფიზიკურ აქტივობას
• მედიკამენტებს
• დაკვირვებას ბავშვის მდგომარეობაზე

მშობიარობის შემდეგ კვლავ ხდება სისხლში გლუკოზის განსაზღვრა.

იმ შემთხვევაში, თუ მისი მაჩვენებლი ნორმას არ დაუბრუნდა, აუცილებელია ექიმთან კონსულტაცია.