ბავშვის აღზრდა გენდერული სტერეოტიპების გარეშე

„გოგოა!“. ბევრი ჩვენგანისთვის, პირველი ‘იარლიყი’ რასაც გვაკრავენ, სქესია. ძალიან კარგად გვესმის ყველას, განსაკუთრებით ჩვენს საზოგადოებაში, რამხელა ნეგატიური ეფექტი შეიძლება მოჰყვეს გენდერულ სტერეოტიპებს. დაწყებული კარიერული სიტუაციებიდან დამთავრებული არაჯანსაღი ოჯახური გარემოთი. მაგალითები უამრავია, ბიჭებს ეუბნებიან, რომ გარკვეული პროფესია მათთვის არ არის შესაფერისი – ექთანი იქნება ეს თუ მოცეკვავე (საბედნიეროდ, მამაკაც მოცეკვავეების რაოდენობით, არ არის გამორიცხული, ევროპაზე წინ ვიყოთ ქართული ცეკვის დამსახურებით). ოჯახში კიდევ, გოგოებს 21-ე საუკუნეში ისევ ზრდიან პათოსით – „გათხოვდები, და პატრონს ჩაბარდები“.

იმისათვის, რომ ჩვენმა შვილებმა, გოგოებმა თუ ბიჭებმა, თანაბარი შესაძლებლობის საზოგადოებაში იცხოვრონ, მშობლებმა შეგვიძლია ამ პრინციპებით ვიხელმძღვანელოთ:

ზედმეტ ყურადღებას ნუ დაუთმობთ სქესს…

„გოგოსავით რატომ ტირი“ – ნუ აკნინებთ გოგოებს!

„გოგო, ხარ და რატომ ხარ ასეთი ფეთხუმი“ – ნუ აკნინებთ ბიჭებს!

„გოგოა და დაუთმე“ – ასწავლეთ, რომ ყველას დაუთმოს.

ეს ფრაზები თითქოს ყოველ დღე გვესმის, სეირნობისას თუ მეგობართან. თითქოს არაფერი, ამ ფრაზებით ქვეყანა არ დაიქცევა, მაგრამ გენდერული სტერეოტიპები, და უარესიც, ოჯახური ძალადობა სწორედ, რომ აქედან იწყება.

… მაგრამ სტერეოტიპებით გამოწვეულ პრობლემებზე მიუთითეთ

სკოლაში თუ სათამაშო მოედანზე, ბავშვი ადრეული ასაკიდან შეეჯახება გენდერული სტერეოტიპების არაჯანსაღ გამოვლინებებს. ამ თემის იგნორირებას, სჯობს მას დაელაპარაკოთ და აუხსნათ ასეთი ტიპის მიდგომების უარყოფითი ეფექტები. ამითი, ბავშვები დაინახავენ, რომ გენდერული დაყოფა, არა სქესის შესაძლებლობებიდან, არამედ კულტურული სტერეოტიპებიდან გამომდინარეობს.

 სათამაშოებს არა აქვთ სქესი

განსაკუთრებით 21-ე საუკუნეში, დრონი და ჰოვერბორდი მაინცდამაინც ბიჭების სათამაშოა? ნუ შეუზღუდავთ ბავშვებს სათამაშოების არეალს. კვლვევები აჩვენებს, რომ ბიჭების და გოგოების გემოვნება სათამაშოებში, უფროსების არჩევანით და სტერეოტიპებით განისაზღვრება. ბავშვები, რა ტიპის სათამაშოებით თამაშობენ, მათი ინტელექტუალური და ფსიქოლოგიური განვითარებისთვის, მნიშვნელოვანი ელემენტია. შესაბამისად, სათამაშოების არჩევანის შეზღუდვით, ვზღუდავთ ბავშვის განვითარების პოტენციალს.

არ სცადოთ სქესის ‘წაშლა“

ის კი არ არის მიზანი, რომ გენდერული განსხვავები აღარ არსებობდეს. თქვენი, როგოც მშობლის მიზანია, რომ ბავშვმა შესძლოს მისი ინტერესების, ჰობის და კარიერული მისწრაფეფების გაკვლევა და ცდა, ყოვლად უაზრო სტიგმების გარეშე. აქცენტები უნდა გააკეთოთ სქესის არარელევანტურობაზე ცხოვრების მნიშვნლოვან გადაწყვეტილებებში.

ხელი შეუწყვეთ გოგოების და ბიჭების ერთობლივ თამაშს

ნამდვილად არ არის ლამაზი სუფრაზე ცალკე მსხდომი კაცების ჯგუფი ერთ ბოლოში და მეორე ბოლოში ქალების. გოგოებსა და ბიჭებს, ადრეული ასაკიდან ხელი შეუწყვეთ, რომ ერთად ითამაშონ, იქნება ეს სათამაშო მოედანზე, სპორტულ აქტივობებში თუ დაბადების დღეებზე.