რატომ აქვთ პატარებს გემრიელი სუნი?

დამეთანხმებით რომ პატარა ბავშვები, ჩვენში საოცარ შეგრძნებებს იწვევენ. მოფერების, ჩქმეტის და ,,შეჭმის” სურვილი, რომელიც პატარა ბავშვის დანახვაზე გვიჩნდება, ნაწილობრივ გამოწვეულია მათი ,,გემრიელი” სუნით.

კვლევამ, რომელიც ფსიქოლოგიაში ერთ-ერთ მოწინავე ჟურნალში, ,,Frontiers in psychology”-ში, გამოქვეყნდა ცხადყო, რომ ქალების სურვილი ,,შეჭამონ” ბავშვი გამოწვეულია სასიამოვნო სუნის გამო, რომელიც ტვინში ააქტიურებს დაჯილდოების წრედს. წრედი, ამავე მექანიზმით, აქტიურდება საჭმლის სუნზეც და გააქტიურება განაპირობებს კონკრეტული პროდუქტის ჭამის ძლიერ სურვილს. ის, ასევე არის ჩართული მოწევასა და ნარკოტიკებზე დამოკიდებულების დროსაც.

ზემოთხსენებულ კვლევაში მონაწილეობდა ქალების 2 ჯგუფი, თითოეულში 15 ქალბატონი. ერთ ჯგუფში იყვნენ ქალები, რომლებსაც არასდროს უმშობიარიათ, მეორეში კი – ახლად ნამშობიარები ქალბატონები. ორივე ჯგუფს მისცეს 2 დღის ჩვილის საღამური და სთხოვეს ეყნოსათ ის. ამ პროცესში კი ხდებოდა თითოეული მათგანის თავის სკანირება.

შედეგი:  ბავშვის საღამურის ყნოსვის დროს ორივე ჯგუფში აქტიურდებოდა დაჯილდოების წრედი – უფრო მეტად ნამშობიარებ ქალბატონებში. ბავშვის ჩახუტების შეგრძნება ასოცირდებოდა გემრიელი საჭმლის მიღებით გამოწვეულ სასიამოვნო შეგრძნებასთან.

მეცნიერები არ არიან დარწმუნებულები რატომ აქვთ ბავშვებს სასიამოვნო სუნი, თუმცა არსებობს რამდენიმე თეორია:

• სუნი მოდის მათი საოფლე ჯირკვლებიდან
• ეს არის ვერნიქსის სუნი, რომელიც ჩნდება მოგვიანებით (ვერნიქსი არის თეთრი ნადები რომელიც ბავშვს დაბადებისას აქვს)

,,არსებობს მექანიზმები, რომლებიც უზრუნველყოფენ მშობელსა და ბავშვს შორის მჭიდრო კავშირს, განსაკუთრებით კი დედასა და ბავშვს შორის. ჩვენ ვფიქრობთ, რომ ბავშვის სუნი არის ერთერთი ამ მექანიზმებს შორის” – ამბობს კანადაში არესბული კვებეკის უნივერსიტეტის ანატომიის პროფესორი იოჰანეს ფრასნელი.