კრეატიული გასართობი აქტივობები ბავშვის განვითარებისთვის

შეიგრძენით ტექსტურა

ბავშვები განვითარების საწყის ეტაპზე, სამყაროს შეგრძნებებით აღიქვამენ -შეხებით, გემოთი და სუნითაც კი. ქაღალდზე დახატეთ ანბანის ასოები ან ციფრები. მიეცით ბავშვს  სხვადასხვა ტექსტურის მასალა (ლობიო, ბამბის ბურთულები, ბრინჯი, მძივები) და დაეხმარეთ დახატულ ასოზე შერჩეული მასალის განთავსებაში და ასევე წარმოთქვით ასო-ბგერა, რომ ბავშვმა დაიმახსოვროს მისი ჟღერადობა. ასოების ხელით შეხებისას ბავშვი კარგად აღიქვამს მის ფორმას, რაც მოგვიანებით წერა-კითხვის სწავლაში დაეხმარება. სულ ცოტა ხანში თქვენი პატარა საგზაო ნიშნებსა და ბილბორდებზე ასოების ამოცნობას დაიწყებს.

გაზომეთ ყველაფერი

გაზომეთ თქვენ ირგვლივ არსებული ნივთები, სახაზავის გარეშე. აიღეთ ვაშლები, დააწყვეთ ერთმანეთზე და დაატოლეთ პატარას, რომ გავიგოთ, რამდენი ვაშლის ტოლია ის. გაიგეთ, რამდენი ლეგოს ტოლია მისაღებში სავარძელი ან რამდენი სათამაშო კუბიკი ეტევა მაცივრის სიგანეზე. ძილის წინ კი ვნახოთ, რამდენი საბავშვო წიგნი ფარავს საწოლის ზედაპირს, აუცილებლად ხმამაღლა დათვალეთ ნივთების მათი განთავსებისას. სულ ცოტა ხანში თქვენი პატარა თვლას ისწავლის, ფანტაზიის განვითარებაზე რომ არაფერი ვთქვათ.

დააწერეთ ნივთებს სახელები

აარჩიეთ სახლის ნივთები, მაგალითად, სკამი, ფანჯრა, მაცივარი (პერიოდულად ცვალეთ ნივთების ჯგუფები). შემდგომ დაჭერით თანაბარ ზომაზე ქაღალდი, დააწერეთ ნივთების სახელები და დააკარით შესაბამის ნივთს ორმაგი სკოჩით.

თქვენს პატარას ეს დაეხმარება იმის გაცნობიერებაში, რომ ყველაფერს საერთო სიმბოლო აქვს, რაც შეიძლება წერილობით გადმოიცეს. თუ ბავშვს უკვე ასოების ამოცნობა შეუძლია, ჰკითხეთ, რა ასოზე იწყება, მაგალითად, სიტყვა „თარო“ და შემდეგ სთხოვეთ, რომ გიპოვოთ ყველა საგანი,  რომლიც „თ“-ზე იწყება.

მიაჩვიეთ წესრიგს

დაიხმარეთ ბავშვი სახლში წესრიგის შესანარჩუნებლად. შეიძლება, ბავშვის ჩართულობით, სახლის დალაგების პროცესი დროში გაგეწელოთ, მაგრამ ბავშვის განვითარებისთვის ეს აუცილებელია. სათამაშოების და სახლის ნივთების დალაგებისას დაიხმარეთ ბავშვი და თამაშად აქციეთ ეს პროცესი. ჩააწყვეთ გარეცხილი კოვზები თეთრეულის ადგილას და სთხოვეთ ბავშვს, რომ თქვენი “შეცდომა” გამოასწოროს. ეს თამაშები თქვენს პატარას დაეხმარება პასუხისმგლებობის განვითარებაში, შეეჩვევა სხვების დახმარებას და, რაც მთავარია, ოჯახის სრულფასოვან წევრად იგრძნობს თავს.

სურათების დაფა 

მეგობრების და ნათესავების სურათები გააკარით დაფაზე და ბავშვის ოთახში ჩამოჰკიდეთ. ფერად დასაკრავ ქაღალდზე, ცალ-ცალკე დაწერეთ „ბიძა“, „მამიდა“, „ბიძაშვილი“ და შესაბამისი სურათების ქვეშ დააკარით. თქვენი პატარა რომ ცოტა წამოიზრდება, უკვე „ოჯახის ხის” გაკეთება შეგეძლებათ – სურათებითა და სახელებით.

დანომრეთ დღეები

დიდი ზომის ქაღალდზე, კალენდარის ფორმატში, დახაზეთ 31 კუბიკი, ზევით კი კვირის დღეები ჩამოწერეთ. ცალკე 31 კუბიკის ზომის პატარა ქაღალდებზე დაწერეთ რიცხვები 1-დან 31-მდე. თვის პირველ რიცხვში, დაეხმარეთ ბავშვს იპოვოს კვირის სწორი დღე და ნომერი 1 ბარათი სწორ კუბიკში დააწებეთ (ორმაგი სკოჩი გამოდგებათ). მეორე დღეს, ნომერი 2 ბარათით სცადეთ სწორი კვირის და დღის პოვნა. ბავშვი კვირის დღეების, კალენდარის სისტემის და დანომვრის პრინციპს გაიგებს და შეეჩვევა.

გასეირნება ქალაქში

გააცანით ბავშვს მშობლიური ქალაქი და უბანი. ასწავლე, სად არის სუპერმარკეტი, პოლიცია, ბენზინგასამართი სადგური. ამ ადგილებს რომ ჩაუვლით, აუხსენით ბავშვს თითოეული დაწესებულების დანიშნულება. ვინ მუშაობს პოლიციაში და რა საქმეს აკეთებს პოლიციელი. სეირნობის წინ, სახლში, ბარათებზე დახატეთ სხვადასხვა დაწესებულება და სეირნობისას სთხოვეთ პატარას, მოძებნოს შესაბამისი ბარათი.

ამინდის კედელი

სთხოვეთ თქვენს პატარას, დახატოს, როგორი ამინდია გარეთ. შეგიძლია მუქი მუყაოს ქაღალდით, ფანჯრის მსგავსი ჩარჩო გამოუჭრათ და მისი დახატული შედევრები ყოველ დღე ჩარჩოში ჩასვათ. არ დაგავიწყდეთ, რომ დააწეროთ ნახატს, როგორი ამინდია – მზიანი, თოვლიანი, წვიმიანი, მოღრუბლური. სულ ცოტა ხანში პატარა მეტეოროლოგი გეყოლებათ სახლში.