გარდატეხის ასაკი – რას უნდა ველოდოთ?

პუბერტატული პერიოდის გარდატეხის ასაკად მოხსენიება შემთხვევითობას ნამდვილად არ წარმოადგენს. ამ დროს თქვენი შვილის ორგანიზმში მართლაც გარდამტეხი ცვლილებები ხდება, რომლის გამომწვევი მიზეზი ჰორმონებია.

საშუალოდ პუბერტატული პერიოდი გოგოებში მოიცავს 10-11 წლიდან 15-17 წლამდე პერიოდს და ბიჭებში 11-12 წლიდან 16-17 წლამდე პერიოდს.  თუმცა შესაძლებელია იგი უფრო ადრეც დაიწყოს, მაგალითად გოგოებში 8 წლიდან და ბიჭებში 9 წლიდან, ან მოგვიანებით – 13 წლიდან გოგოებში და 14 წლიდან ბიჭებში.

რას უნდა ელოდოთ ორივე სქესის წარმომადგენლებში?

• ცხიმიანი კანი (შესაძლებელია აკნეს განვითარება)
• ცხიმიანი თმა
• ოფლიანობა
• სიმაღლეში სწრაფი ზრდა

რას უნდა ელოდოთ გოგოებში?

• იწყებს ზრდას სარძევე ჯირკვლები. შესაძლოა იყოს მტკივნეულიც
• იცვლება ფიგურა-თეძოები განიერდება, ცხიმი ლაგდება მუცლის, დუნდულოების მიდამოში
• იზრდება თმა ბოქვენზე და იღლიისქვეშ
• იწყება მენსტრუაცია, რასაც წინ საშოდან მოთეთრო გამონადენი შეიძლება ახლდეს

 რას უნდა ელოდოთ ბიჭებში?

• იზრდება სასქესო ასო და სათესლეები
• აგრეთვე იზრდება თმა ბოქვენზე, იღლიისქვეშ და სახეზე
• აღინიშნება ერექცია და ეაკულაცია, რაც შესაძლოა ღამე ძილის დროსაც გამოვლინდეს
• ხმა ბოხდება

გარდატეხის ასაკში ცვლილებები მხოლოდ ფიზიკური კუთხით არ შემოიფარგლება. ამ დროს მოზარდები ხდებიან უფრო აგრესიულები, გაღიზიანებულები, დაბნეულები, აქვთ დაბალი თვითშეფასება, არ მოსწონთ საკუთარი გარეგნობა, უმიზეზოდ ეცვლებათ ხასიათი. საკუთარი სივრცე და პრივატულობა მათთვის ძალიან მნიშვნელოვანი ხდება

ამ პერიოდში ისინი უკეთ ეცნობიან საკუთარ თავს, უჩნდებათ გარკვეული ინტერესები და სახავენ მიზნებს.

ცხოვრების ამ ეტაპზე თქვენი მხარდაჭერა თქვენი შვილისთვის აუცილებელია. ესაუბრეთ მას და აუხსენით თუ რა ხდება მის თავს და რას უნდა ელოდოს