ეპიდურული გაუტკივარება

რა არის ეპიდურული გაუტკივარება?

ეს არის პროცედურა, რომლის დროსაც ხდება ადგილობრივი ანესთეტიკის (პრეპარატი რომლის მოქმედებითაც ხდება გაუტკივარება) შეყვანა ეპიდურულ სივრცეში ანუ ხერხემლის წელის ნაწილში. ამ პრეპარატის შეყვანის შედეგად ხდება იმ ნერვების (სპინალური ნერვების) ბლოკირება, რომლებსაც გადააქვთ ტკივილების იმპულსები თავის ტვინისკენ.

როგორ ტარდება პროცედურა?

პროცედურას ატარებს ექიმი-ანესთეზიოლოგი:

• ექიმი გთხოვთ, რომ დაჯდეთ და გადაიხაროთ წინ, დაწვეთ ერთ გვერდზე და მოხაროთ ფეხები.
• ექიმი შეიყვანს ადგილობრივ ანესთეტიკს იმისთვის, რომ მოხდეს იმ ადგილის გაბუჟება/გაყუჩება სადაც უნდა შევიდეს ეპიდურული.
• ნემსი გამოიყენება წვრილი პლასტიური მილის ჩასაყენებლად, რომელსაც ქვია ეპიდურული კათეტერი.
• ამ კათეტერის მეშვეობით ხდება ტკივილგამაყუჩებელი საშუალებების შეყვანა. სრული ეფექტის მისაღებად საჭიროა 20-30 წუთი.

ეპიდურული გაუტკივარების დადებითი და უარყოფითი მხარეები: 

დადებითი:

• უმეტეს შემთხვევაში ძალიან ეფექტურია ანუ კარგად აყუჩებს ტკივილს.
• ცნობიერება არის ნათელი ანუ პაციენტი არის ფხიზელი.
• თუ საჭირო გახდა დამატებითი მანიპულაციის ჩატარება (მაგ: გაკერვა), დამატებითი პრეპარატის გამოყენება აღარ არის საჭირო.
• თუ საჭირო გახდა საკეისროს გაკეთება, საკმარისია მხოლოდ წამლის დოზის დამატება.

უარყოფითი:

• მშობიარობის I სტადიის გახანგძლივება.
• წნევის დავარდნა, ამიტომ საჭიროა მშბობიარობის დროს წნევის მუდმივი კონტროლი.
• სიცივის შეგრძნება.
• პროცედურის დროს ფეხის კუნთების სისუსტის გამო სიარული არ შეიძლება, საჭიროა წოლა.

და ბოლოს, მედიცინაში არ არსებობს არაფერი, რისი მტკიცებაც 100%-ით შეიძლება. ყოველთვის არსებობს გართულების შანსი, ამიტომ საბოლოო არჩევანი არის პაციენტზე – ჩაიტარებს ის ამ პროცედურას თუ არა. თუმცა, მიუხედავად ამ ყველაფრისა მედიცინაში არსებული წინსვლა და უამრავი კვლევა, საშუალებას აძლევს ანესთეზიოლოგს ეპიდურული გაუტკივარებით გამოწვეული გვერდითი მოვლენები მინიმუმამდე დაიყვანოს.