ძილისწინა რიტუალები

ბავშვებს სჭირდება რიტუალები, რადგან რიტუალები ქმნიან უსაფრთხოებისა და ნდობის შეგრძნებას. ყველა ოჯახს აქვს მისთვის დამახასიათებელი ჩვეულება, მაგრამ ბავშვის დაძინებისას თითქმის ყველა ოჯახში ერთი და იგივე ხდება: მშობელი მთლიანად უთმობს თავის დროს ბავშვის დაძინებას. ეს ეხმარება ბავშვს დაასრულოს დღე სიმშვიდისა და სიყვარულის შეგრძნებით და გადავიდეს სიზმრების სამყაროში. თან, ვის ენდომებოდა საღამოს მოსაწყენი რუტინის შემდეგ, ისე დაძინება რომ დედიკოს ან მამიკოს ერთხელ კიდევ არ ჩახუტებოდა და მათგან რაიმე ისტორია ან იავნანა არ მოესმინა?!..

გამოვიყენოთ ეს დრო შვილებთან ემოციური კონტაქტის დასამყარებლად

მოზრდილი ბავშვები ძალიან აფასებენ ამ დროს და იყენებენ მას, როგორც შესაძლელობას, გაუზიარონ მშობლებს დღის განმავლობაში დაგროვილი სხვადასხვა ემოცია და გამოცდილება, მათ შორის, შიშები და საზრუნავი. შეიძლება ზოგიერთ ჩვენგანს ერთი შეხედვით სასაცილოდ მოეჩვენოს ბავშვების საზრუნავის ხსენება, მაგრამ ეს „ ბავშვური საზრუნავებია“ სწორედ ის, რაც მომავალში ამ პატარა ადამიანების დიდ ადამიანებად გარდაქმნაში მნიშვნელოვან როლს ასრულებენ. საღამოს კომფორტული ატმოსფერო კი ზედგამოჭრილია გარკვეულ საკითხებზე შვილებთან სალაპარაკოდ. ასევე მნიშვნელოვანია მკაცრად განსაზღვრული დრო (ლოგინში ყოველ დღე ერთსა და იმავე დროს დაწოლა).

შევარჩიოთ საინტერესო ისტორია

მცირე ასაკის ბავშვები აგრეთვე დიდ მნიშვნელობას ანიჭებენ დაძინებამდე მშობლებთან ერთად გატარებულ დროს. თუმცა მათთვის პრიორიტეტი ღამის ამბავს ენიჭება. ჩვენს საუკუნეში განებივრებულნი ვართ  საინტერესო საბავშვო წიგნებით და თანდართული ულამაზესი ილუსტრაციებით. თუ რომელი ისტორია უნდა წავიკითხოთ, უმჯობესი იქნება შვილთან შევათანხმოთ. თუმცა უნდა გავითვალისწინოთ, რომ ამბავი არ უნდა იყოს ზედმეტად დაძაბული, რომ პატარაში შიში და შფოთვა და უძილობა ან ცუდი სიზმრები არ გამოვიწვიოთ. ჩვენი მიზანი ხომ ბავშვის მოდუნება, დამშვიდება და საძილე განწყობის შექმნაა.

წავუკითხოთ შვილს თავად

მიუხედავად იმისა რომ ზოგ ბავშვს უკვე თავად შეუძლია კითხვა, კარგი იქნება ძილის წინ მაინც მშობელმა წაუკითხოს, რადგან დედიკოს და მამიკოს ხმა სასიამოვნოდ და დამამშიდებლად მოქმედებს პატარაზე.

ტკბილი იავნანა

იავნანა ძილის წინ – ამ მეთოდს დედათა უმრავლესობა წარმატებით იყენებს. ბავშვს შეგვიძლია ვუმღეროთ აგრეთვე ნებისმიერი სხვა სიმღერა, რომელსაც წყნარი მელოდია აქვს. ბავშვი ადვილად სწავლობს სიტყვებს და მალე შეუძლია დედიკოსთან ერთად იმღეროს.

ძილისპირული ახალშობილებში

განსაკუთრებული მნიშვნელობა აქვს ძილისწინა რიტუალებს ჩვილებში, რადგან ის ეხმარება ახალშობილს იპოვოს დღე-ღამის რითმი. სიმღერას შეგვიძლია თან დავურთოთ რომელიმე ფუმფულა სათამაშო. ღამის ტკბილ  ჰანგებთან ერთად, რეგულარულად ჩავუდოთ პატარას ძილის რიტუალისათვის სპეციალურად  განკუთვნილი სათამაშო თავის საწოლში და ამით შევიტანოთ კიდევ ერთი განსხვავება დღისა და ღამის ციკლს შორის, რაც სამომავლოდ ძალიან გამოგვადგება შვილის ადვილად დაძინებაში.

ძილის წინა ლოცვა

ზოგიერთ ოჯახში ჩვეულებადაა ძილის წინა ლოცვა. იმისდა მიხედვით, თუ რა ასაკისაა ბავშვი, ან მშობლები წარმოთქვამენ ლოცვას ან  თავად პატარა, თუ უკვე შეუძლია ლაპარაკი. ეს კარგი ჩვეულებაა იმ მშობლებისათვის, ვისაც უნდა თავისი შვილი რელიგიურად აღზარდოს.

მშობელმა დროგამოშვებით უნდა დააკვირდეს, მიესადაგება თუ არა მისი შინაარსი შვილის ასაკს და ხომ არ იქნებოდა უკეთესი მისი სხვა ჩვეულებით ჩანაცვლება. მაგალითად  10 წლის ბავშვისათვის უკვე მოსაწყენია ძილის წინ იავნანას მოსმენა, ნაცვლად ამისა, ალბათ უკეთესი იქნებოდა თუკი მშობელთან სკოლის ამბებზე ისაუბრებდა, ან რაიმე ისტორიას მოისმენდა მისგან. მნიშვნელოვანია, ყურადღებით ვადევნოთ თვალი ბავშვის ქცევას ძილის წინ, რათა შევნიშნოთ, ახდენს თუ არა ძილისწინა ქმედებები მასზე სასიამოვნო გავლენას.