მშობიარობის შემდგომი დეპრესია – რა სირთულეების წინაშე შეიძლება აღმოჩნდეთ და როგორ უნდა გაუმკლავდეთ მათ?

ახლადნამშობიარები დედიკოები ხშირად უჩივიან გუნება-განწყობის ცვლილებებს და ემოციურ არასტაბილურობას. რაც სხეულში მიმდინარე ჰორმონალური ცვლილებებითაა გამოწვეული და  მშობიარობიდან რამდენიმე დღის გასვლის  შემდეგ ქრება. ეს არის ე.წ. „ბეიბი ბლუზი“, ხოლო მშობიარობის შემდგომი დეპრესია (პოსტნატალური დეპრესია / PND) გაცილეთ ღრმა და სერიოზული პრობლემაა.

PND ყოველთვის უშუალოდ მშობიარობის შემდეგ არ ვლინდება. შესაძლოა კვირები და თვეც კი გავიდეს, სანამ განწყობის მსუბუქი ცვლილებიდან რეალურ დეპრესიას მიაღწევს.

მშობიარობის შემდგომი დეპრესიისას, ხასიათისა და განწყობის ცვლილება გაცილებით ინტენსიურია, ვიდრე „ბეიბი ბლუზის“ დროს. თუმცა საკმაოდ ხშირად, სწორი დიაგნოსტირება გვიანდება.

აუცილებელია ამ დაავადების სპეციალისტთან მკურნალობა, ამიტომ თავად ახალნამშობიარებმა, ასევე ოჯახის წევრებმა და ახლობლებმა უნდა იზრუნონ იმაზე, რომ არ გამოეპაროთ მნიშვნელოვანი ცვლილებები და მიმართონ ექიმს.

PND-ს გამოვლინება ინდივიდუალურია. მისი სირთულეც ასევე მერყეობს, დაწყებული დედობის გამო არანაირი სიხარულის შეგრძნებიდან,  დამთავრებული თვითმკვლელობაზე გაუთავებელი ფიქრით.

შესაძლო სიმპტომები

• ქალი ზედმეტ ყურადღებას აქცევს წვრილმანებს, აქვს იმედგაცრუების გრძნობა საკუთარი თავის, ოჯახის წევრებისა და ახალშობილის მიმართ
• ხშირი ტირილი, რაც დროთა განმავლობაში კიდევ უფრო ხშირდება
• თავის ტკივილი
• თავბრუსხვევა
• პანიკის შეტევა
• შინაგანი სიცარიელის შეგრძნება
• საკუთარი თავის გმობა
• გადაღლილობა და უძილობა
• კონცენტრაციის დაქვეითება
• გაუცხოვების შეგრძნება საკუთარი შვილის მიმართ, თითქოს სხვის შვილს უვლის
• უმადობა, ან პირიქით მადის ძლიერი შემოტევები

დაავადების გამომწვევი მიზეზები

ის, თუ რის გამო ხდება პოსტნატალური დეპრესია, ნაწილობრივ ჯერ ისევ გაურკვეველია, თუმცა მეცნიერების აზრით იგი განპირობებულია შემდეგი ფაქტორებით:

• ჰორმონალური ცვლილებებით
• ფსიქოლოგიური ფაქტორებით
• სოციალური ზეგავლენით

ამასთან, თუკი ქალს  მშობიარობამდეც აწუხებდა დეპრესია, შანსი იმისა, რომ პოსტნატალური დეპრესია განუვითარდეს, უფრო მაღალია.

ზეგავლენა შეიძლება იქონიოს აგრეთვე ტრაგიკულმა ცხოვრებისეულმა გამოცდილებამ და სტრესმა. მაგალითად თუ ქალს ბავშვობის ასაკში გარდაეცვალა დედა, ბავშვის დაბადებამდე  დაკარგა მეუღლე, კარიერა და ა.შ.

რა მოვიმოქმედოთ

• აუცილებლად მივმართოთ სპეციალისტს, რომელიც გადაწყვეტს, თუ მკურნალობის როგორი მიდგომა იქნება ჩვენთვის სასარგებლო
• ჩვენ რაც შეგვიძლია ისაა, რომ ვიკვებოთ ჯანსაღად
• ვიფიქროთ რაც შეიძლება პოზიტიურად
• მოვუსმინოთ სასიამოვნო მუსიკას
• ვიზრუნოთ ჩვენს პატარაზე
• ვიქონიოთ მოთმინება და იმედი იმისა, რომ ყველაფერი ცუდი ძალიან მალე წარსულს ჩაბარდება და კვლავ შევძლებთ ცხოვრებით მაქსიმალურად ტკბობას