როგორ უნდა შეუთავსოთ დედობა კარიერას და იპოვნოთ ოქროს შუალედი?

ახალბედა დედებს, რომლებიც დედობას სამსახურსაც უთავსებენ, ხშირად აწუხებთ კითხვა: „ვარ თუ არა კარგი დედა, ვაკეთებ თუ არა ყველაფერს ჩემი შვილისთვის?“

არ არის მარტივი ბავშვზე ზრუნვას სამსახური შეუთავსო. გარდა ამისა, ჩვენ, ქალებს ისეთ სოციალურ გარემოში გვიწევს ცხოვრება, ისეთ საზოგადოებაში, რომელიც ერთგვარად გვაიძულებს ესა თუ ის ნაბიჯი გადავდგათ. თუ შვილი გვყავს და მასზე ზრუნვის პარალელურად ვმუშაობთ, საზოგადოების ნაწილი გვკიცხავს და ამბობენ, რომ ცუდი დედები ვართ. ზოგიერთ ქალს აღნიშნულის გამო უარის თქმა უწევს საყვარელი საქმის კეთებაზე.

ფსიქოლოგები ამბობენ, რომ პირველ რიგში, უნდა გაითავისოთ და გაიაზროთ, რომ დედობა არ ნიშნავს ცხოვრებაზე, ინტერესებსზე, საყვარელ საქმეზე უარის თქმას და თუ მოინდომებთ, დაგეგმავთ, წარმატებით შეძლებთ დროის განაწილებას, ოქროს შუალედის პოვნას და სამსახურისა და შვილზე ზრუნვის იდეალურად შეთავსებას.

როგორ უნდა შეუთავსოთ დედობა და კარიერა ერთმანეთს?

ნუ შეადარებთ საკუთარ თავს სხვა დედებს – ყველა ადამიანი ინდივიდუალურია, ცხოვრების სხვადასხვა წესები გვაქვს, განსხვავებულად ვცხოვრობთ, სხვადასხვა მისწრაფებები გვაქვს, შესაბამისად, ერთი გრაფიკი, დღის განრიგი ვერ გვექნება. იმოქმედეთ თქვენი საჭიროებებიდან და ინტერესებიდან გამომდინარე, სწორედ ამ შემთხვევაში იპოვნით ჰარმონიას.

აქციეთ ოჯახური შეხვედრები ისევე მნიშვნელოვნად, როგორც ოფიციალური შეხვედრებია – ოჯახური წვეულებები, ტრადიციული ვახშმები, მნიშვნელოვანესია და მას ისე შეხედეთ, როგორც ოფიციალურ შეხვედრას, რომელსაც არავითარ შემთხვევაში არ უნდა დააკლდეთ. შეუთავსეთ ეს წვეულებები თქვენს სამუშაო გრაფიკს, წინასწარ დაგეგმეთ და განსაზღვრეთ ისე, რომ ხელი არ შეგეშალოთ.

გააცანით შვილებს თქვენი გადაწყვეტილებები – არის შემთხვევები, როცა საქმიან დედებს რამდენიმე დღის განმავლობაში მთელი ყურადღების გადატანა რაიმე პროექტზე უწევთ, რა დროსაც შვილებს დედის მზრუნველობა შედარებით აკლდებათ. უმჯობესია, თუ შვილებს ამის შესახებ გულწრფელად და ღიად დაელაპარაკებით, აუხსნით თქვენი ამგვარი ქმედების რეალურ მიზეზს. ბავშვები ასე უფრო ახლო მეგობრები ხდებიან მშობლის და სწავლობენ, რომ ზოგჯერ დედებსაც სჭირდებათ შვილების მხარდაჭერა და გვერდით დგომა,

დააწესეთ საზღვრები – თუ დღეში 24 საათი, კვირაში შვიდი დღე მხოლოდ სამსახურის, ან მხოლოდ ოჯახის საქმეებით ხართ დაკავებულები, ბუნებრივია, ვერ იპოვნით ბალანსს და გექნებათ განცდა იმისა, რომ რაღაცას არასწორად აკეთებთ. გაწერეთ გეგმა, გათვალეთ ყველაფერი – ის, თუ რა დრო უნდა მოახმაროთ სამსახურის საქმეებს და რა დრო შვილებს. დააწესეთ საზღვრები. ასე გაცილებით გაგიმარტივდებათ ბალანსის პოვნა.

მოერიდეთ ისეთ სიტუაციებს, რომლებიც ხელს გიშლით წარმატების მიღწევაში – თუ ხედავთ, რომ ის საქმე, რომელსაც აკეთებთ ვერასოდეს იქნება წარმატებული, ან ზოგადად ისეთი გარემოა თქვენ გარშემო, რომელიც ხელს გიშლით წარმატების მიღწევაში, გაერიდეთ მას. იყავით რეალისტები, შეეშვით ოცნებას და გადადგით კონკრეტული ნაბიჯები.  უარი თქვით იმ ადამიანებთან ურთიერთობაზე, რომლებიც ცხოვრებას გირთულებენ და ნეგატივით გავსებენ.

უფრო ხშირად თქვით „არა“ – „არა“ თქვენს საუკეთესო მეგობრად აქციეთ. განსაზღვრეთ პრიორიტეტები და ნუ დაკარგავთ დროს ისეთ საქმეებში, რომლებიც არაფერში გჭირდებათ. ასე უფრო მეტი დრო დაგრჩებათ როგორც შვილებისთვის, ასევე საყვარელი საქმისა და საკუთარი თავისთვის.

ითხოვეთ დახმარება როცა გჭირდებათ – თამამად თქვით ის, თუ რა გსურთ, თქვენს აზრებს ვერავინ წაიკითხავს. მაგალითად, თუ შვილთან ერთად დროის გატარება გინდათ და არ გსურთ შაბათ-კვირას სამსახურზე იფიქროთ, ნუ ეტყვით თქვენს თანამშრომლებს, ან უფროსს, რომ დაგირეკონ ნებისმიერ დროს, როცა მოესურვებათ.

სწორად გაანაწილეთ დრო – ეს ყველაზე მნიშვნელოვანი კომპონენტია. წინასწარ გაწერეთ გასაკეთებელი საქმეების გეგმა და ეცადეთ, ზედმიწევნით ზუსტად მიჰყვეთ მას. ასე მარტივად შეძლებთ დრო ყველაფრისთვის დაგრჩეთ და მზრუნველობა არ მოაკლოთ არც სამსახურს და არც შვილებს.